أيث-روما 12
12
ثُوْذَارْث ن جْذِيذ خ وفُوْس ن سِيذِيثْنغ عِيْسَى
1إِذن فَا آي اَيثْمَا، س اَرَّاحْمث ن أَربِّـي تْشجَّاعغ-كنِّيو اَذ تْقدّْمم يخف نْوم إِ أَربِّـي اَمشْنَاو يجّن ن دْبِيحث ثدَّر، ذ ثَمْقدّسْت، أَخَاس يَارْضَا نتَّا. مَانَايَا ذ لْوَاجِب ن لْعِبَادَا خَاوم. 2وَار تݣّم شَا مِين تݣّن يِوْذَان ذِي ڒْوقْث-أَ ثَانِيتَا. ئِتْخصَّا اَغَارْوم يِيڒِي يجّن ن ڒَعْقڒ ذ جْذِيذ حمَا اَذ تْوَابدّْڒم، سّنِّي اَذ تسّْنم كنِّيو مِين يخس أَربِّـي، يعْنِي مِين يصبْحَان ذ مِين ذَاس يتعْجِيبن وَار ذَايس بُو وخطِّي.
3فَا س لْبَرَكَا إِي ذَايِي يُوْشَا أَربِّـي قَّارغ إِ مْكُڒ يجّن زَّايْوم: وَار حسّب شَا يخف نّش كْتَار زِي مِين ثعْنِيذ. شك فكَّر س ڒَعْقڒ نّش عْلَاحْسَاب مشْحَاڒ ن لإِيمَان إِي ذَاش يُوْشَا أَربِّـي. 4لِأَنَّا دَّات ذَايس اَطَّاس ن طْرُوْفَاث، مْكُڒ طَّارْف يخدّم ڒْخذْمث نّس. 5أَمنِّي إِي ندْجَا ؤُڒَا ذ نشِّين. وَاخَّا نشِّين اَطَّاس إِي إِذْنغ أَقَانغ مَارَّا إِذْنغ ذ يجّن ن دَّات ذِي لْمَسِيح، كُڒ طَّارْف يتحْذَاجَا ونّغْنِي. 6عْلَاحْسَاب لْبَرَكَا إِي ذَانغ يمُّوْشن غَارْنغ نشِّين لْقُدْرَاث، كُڒ لْقُدْرَا وَار تْشِيبِّيه شَا ذِي ثنّغْنِي. ئِجّن مڒَا يُوْشَا-اَس أَربِّـي لْوَاحِي، أُو لَابُد اَذ يسخْذم لْقُدْرَا-يَا عْلَاحْسَاب لإِيمَان نّس. 7ئِجّن مڒَا يتْسخَّار، أُو لَابُد اَذ يسخَّار. ئِجّن مڒَا يسڒْمَاذ، أُو لَابُد اَذ يسڒْمذ. 8ئِجّن مڒَا يتْشجَّاع، أُو لَابُد اَذ يشجّع. ئِجّن مڒَا يتْصدَّاق، أُو لَابُد اَذ يِيڒِي ذ اَسخَّاي. ئِجّن مڒَا يتْرَايَا، أُو لَابُد اَذ يرَاي س وُوْڒ نّس. ئِجّن مڒَا يرحّم، أُو لَابُد اَذ يرْحم س ڒفْرَاحث نّس.
مَامّش يتخصَّا اَذ يعِيش ڒْمُوْمن
9ڒمْحِبّث يتْخصَّا اَذ تِيڒِي بْڒَا نِّفَاق. عِيفّث مِين يدْجَان ذ شَّرّْ، طّْفث ذِي مِين يدْجَان ذ ڒْخِير. 10خْسث اَيَاوْيَا اَم ثَاوْمَات. وقَّارث اَيَاوْيَا كْتَار زِي جّْهذ. 11حَوْڒث وَار تعْݣِيزم شَا. خذْمث إِ سِيذِي أَربِّـي س وُوْڒ ذ اَرُّوْح. 12فَرْحث ذِي لْأَمَال. صْبَارث خ تَمَارَا. دَاوّْمث خ ثْࢲَادْجِيث. 13عَاوْنث ڒْمُوْمِنِين صَّالِحِين يِنِّي يتحْذَاجن. رحّْبث خ يِنِّي يتْسَفَارن.
14بَرْكث إِ يِنِّي كنِّيو يتْعدَّابن، بَرْكث وَار ثن نعّْڒم شَا. 15فَرْحث اَك يِنِّي يفَرّْحن، تْرُوْث اَك يِنِّي يتْرُوْن. 16عِيشث اَݣ وَايَاوْيَا ذِي ڒهْنَا. وَار سمْغَارث شَا يخف نْوم، مْعَشَارث اَݣ يپُـوْبْرِيثن. وَار تَارَّاث شَا يخف نْوم ذ يمِيغِيسن.
17وَار تَارَّام شَا شَّرّْ س شَّرّْ. أَرّم-د ڒْبَڒ نْوم بَاش اَذ تحْتَرْمم مَارَّا يوْذَان ذِي مِين تݣّم. 18عْلَاحْسَاب كنِّيو، مڒَا مُمْكن ݣّث اَذ تِيڒِيم ذِي ڒهْنَا اَك يِوْذَان مَارَّا. 19آي يمْعِيزّن ينُو، وَار تنْتَاقَامم زِي حَدّ، لْعِقَاب جّم-ث إ أَربِّـي. أَقَا لْكِتَاب يقَّار: <ذ نش إِݣ يتنْتَاقَامن، ذ نش إِݣ يتْخدْجَاسن، ئِقَّار-يت سِيذِي أَربِّـي.> 20لْعَكْس: ڒَعْذُو نّش مڒَا يدْجُوْز، ؤُش-اَس اَذ يشّ. مڒَا يفُّوْذ، ؤُش-اَس اَذ يسو. أُو مَايمِّي؟ مڒَا ثݣِّيذ-اَس اَمُّو، أَخْمِي ثْسرْغذ-اَس ڒفْحَم خ وزدْجِيف نّس. 21وَار تجَّا شَا شَّرّْ اَش يغْڒب، ذ شك إِي غَا يغڒْبن شَّرّْ س ڒْخِير.
Currently Selected:
أيث-روما 12: ريف
Highlight
Share
Copy
Want to have your highlights saved across all your devices? Sign up or sign in
