22 أيث-كورينث 12
12
جّْهذ ذ ضُّوْعف ن اَرَّسُوْل بُوْلُس
1أُو لَابُد اَذ فْتَخَرغ عَاذ، وَاخَّا وَار ذَايس بُو نّْفَع. أَذ سِّيوْڒغ ڒخُّو خ ثْمسْڒَايِين إِي د يهْوَان ذِي لْوَاحِي ذ ثْمسْڒَايِين ينُّوْفَرن إِي د يسْبيّن سِيذِيثْنغ. 2ئِجّن ن ورْيَاز يدْجَان ذِي لْمَسِيح،#12.2 ذِي لْأَيَاث-أَ اَرَّسُوْل بُوْلُس يسَّاوَاڒ خ يِيخف نّس. أَقَا سّْنغ-ث ذ نش. أَرْبعْطَاش يسݣّْوُوْسَا زݣ وَامِي يتْوَاخْضف غَار وجنَّا وِيس ثْڒَاثَا. مَا يتْوَاخْضف س دَّات نِغ بْڒَا دَّات مَانَاينِّي وَار ث سِّينغ شَا نش، ئِسّن-يث إِلَّا أَربِّـي. 3-4أَرْيَاز-أَ سّْنغ يتْوَاخْضف غَار جّنّث. مَا يتْوَاخْضف س دَّات نِغ بْڒَا دَّات مَانَاينِّي وَار ث سِّينغ شَا نش، يسّن-يث إِلَّا أَربِّـي. أَرْيَاز-أَ يصنّط إِ ثْمسْڒَايِين وَار تْوَانطِّيقنْت شَا، وَار ذَاس يتْوَاسْمِيح شَا إِ بْنَاذم اَثنْت ينْطق. 5ئِجّن ن ورْيَاز اَم وَانِيتَا زمَّرغ نش اَزَّايس فْتَخَرغ. وَلَكِن وَار تفْتَخَرغ شَا زِي مِين ذَايِي د يُوْسِين، تفْتَخَرغ زِي ضُّوْعف ينُو أُو صَافِي. 6شُوْف، مْڒِي خْسغ اَذ فْتَخَرغ زݣ يِيخف ينُو اَتَاف سَّاوَاڒغ س ڒْحَقّ مَاشِي س ثُوْبُّوْهْڒِيَا. وَلَكِن ؤُݣِيغ اَذ ݣّغ اَمُّو، مَايمِّي؟ حمَا اَذَايِي حسْبن يِوْذَان غِير س مِين تْوَاڒَان ذَايِي س ثِيطَّاوِين نْسن أُو ذ مِين تْصنَّاطن زَّايِي س يمجَّان نْسن.
7إِذن يمُّوْش-اَيِي يجّن ن وسنَّان ذݣ ويْسُوْم ينُو،#12.7 مَاشِي مَعْرُوْف مِين يعْنَا وسنَّان-أَ مِيخف يسَّاوَاڒ اَرَّسُوْل بُوْلُس، وَلَكِن يسَّاوَاڒ س ڒْمَعْنَا. يمْكن ذ يجّن ن لْمَرَض إِي ث يتْشُوْكَان س جّْهذ. مَايمِّي؟ حمَا وَار سمْغَارغ شَا يخف ينُو عْلَاحْسَاب ثِمسْڒَايِين-أَ يسْتْعجِّيبن إِي ذَايِي د يسْبيّن أَربِّـي ذِي لْوَاحِي. أَسنَّان-أَ ونِّي إِي د يسّكّن شِّيطَان يتْعدَّاب-اَيِي بَاش وَار سمْغَارغ شَا يخف ينُو. 8تَّارغ-اَس إِ سِيذِيثْنغ ثْڒَاثَا ن ثْوَاڒَاثِين بَاش اَخَافِي يسْبعّذ مَانَايَا. 9نتَّا ينَّا-ٱيِي لَّا، ئِشْفَا-يَاش أَرْضَا ينُو؛ جّْهذ ينُو اَذ يذْوڒ يكْمَاڒ س ضُّوْعف-أَ. فَلِهَاذَا فَرّْحغ اَطَّاس اَذ فْتَخَرغ س ضُّوْعف ن جّْهذ ينُو بَاش جّْهذ ن لْمَسِيح اَذَايِي يزْذغ. 10س مَانَايَا عْلَاحْسَاب لْمَسِيح نش فَرّْحغ س ضُّوْعف ينُو ذ ثُوْكّْوْرَا ذ تَمَارَا ذ وعدّب ذ ؤُزِيَّار. مَايمِّي؟ مڒَا ضعْفغ ڒخْدّنِّي نش اَذ يڒِيغ جهْذغ.
أَرَّسُوْل بُوْلُس يكسِّي اَمْنُوْس خ ڒْمُوْمِنِين ن أَيث-كُوْرِينْث
11عَاذ سَّاوَاڒغ س ثُوْبُّوْهْڒِيَا-يَا زَعْمَا، ذ كنِّيو إِي خَافِي يبزّن اَمُّو. شُوْف، تُوْغَا يتْخصَّا-كنِّيو اَذَايِي ثْشكَرم، مَايمِّي؟ لِأَنَّا نش وَاخَّا ذ وَالُو إِي دْجِيغ، وَار دْجِيغ بُو ذ اَنقْصِي زِي اَرُّسُل نِّي يمزْوُوْرَا. 12ثِمسْڒَايِين نِّي إِي د يسْبِيَّانن نش ذ اَرَّسُوْل إِي دْجِيغ نِثنْتِي تُوْغَا تْوَاخڒْقنْت-يد جَارَاوم س يِجّن ن صّْبَر ذ اَمقّْرَان، يعْنِي لْعَلَامَاث ذ لْمُعْجِزَاث ذ لْبُرْهَانَاث. 13مَا ذِنِّي شَا ن ثْمسْڒَايْث مِينْخف اَرْضِيغ نش ذِي ثْجُوْمَع ن ڒْمُوْمِنِين ثِنّغْنِي وَار خَاس اَرْضِيغ شَا جَارَاوم؟ وَاه ئِشْتن، يعْنِي وَار خَاوم تْبسِّيڒغ شَا!#12.13 يعْنِي وَار خَاسن يبسّڒ شَا بُوْلُس ڒَاحقَّاش يُوْݣِي اَذ يقْبڒ تْمنْيَاث زَّايْسن بَاش اَث عَاوْنن نِثْنِي ذِي ڒْخذْمث نّس ذِي لْإِنْجِيل. سمْحم-اَيِي خ فَالْطَا-يَا.
14ڒخُّو اَقَايِي وجْذغ اَغَارْوم د اَسغ ذِي زِّيَارَا وِيس ثْڒَاثَا، وَار خَاوم تْبسِّيڒغ شَا، وَار رزُّوْغ شَا خ وَاݣْڒَا نْوم رزُّوْغ خَاوم كنِّيو. ڒَاحقَّاش وَار يتْخصِّي شَا يحنْجِيرن اَذ سْمُوْنن اَݣْڒَا إِ لْوَلِدِين نْسن، ئِتْخصَّا لْوَلِدِين نْسن إِي غَا يسْمُوْنن اَݣْڒَا إِ يحنْجِيرن. 15نش س ڒفْرَاحث اَذ هْذِيغ يخف ينُو اَذ تْوَاهْذِيغ عْلَاحْسَاب ڒَعْمَار نْوم. مڒَا تخْسغ-كنِّيو اَطَّاس، مَا ثسْنقْصم ڒمْحِبّث نْوم خَافِي؟
16إِيوَا صَافِي، مڒَا وَار خَاوم بسّْڒغ شَا، مَا ثقَّارم ڒخُّو قَا نش ذ اَغشَّاش طّْفغ-كنِّيو س ثحْرَايْمِيث، اَه؟ 17مَا ثنْوِيم خوّْنغ-كنِّيو س يِجّن زݣ يِنِّي تُوْغَا غَارْوم د سّكّغ؟ لَّا، وَالُو. 18ذ نش إِي د يوصَّان تِيتُوْس اَغَارْوم د يَاس، سّكّغ-د اَكِذس ؤُمَاثْنغ نِّي. وَار يزمَّر اَكنِّيو يغشّ تِيتُوْس. نش ذ نتَّا نْخدّم س يِجّن ن ڒَعْقڒ ذ يجّن، ئِسُوْرِيفن نّغ ذ يجّن.
19مشْحَاڒ زݣ وَامِي ثْنوَّام زَعْمَا نْدَافع خ يِيخف نّغ زَّاثْوم وَاهَا؟ لَّا آي يمْعِيزّن ينُو، نسَّاوَاڒ مَارَّا مَانَايَا ذِي لْمَسِيح زَّاث إِ أَربِّـي بَاش اَكنِّيو نْسجْهذ. 20شُوْف، ݣّْوْذغ خْمِي د غَا اَوْضغ وَار كنِّيو تِيفغ شَا مَامّش تْمنِّيغ اَكنِّيو اَفغ. أُو عَاوذ وَار ذَايِي تِيفم شَا مَامّش تْمنِّيم اَذَايِي ثَافم. ݣّْوْذغ اَذ اَفغ جَارَاوم اَمنْغِي ذ ڒحْسذ ذ وعَصّب، كُڒ يجّن يرزُّو إِ يِيخف نّس وَاهَا، ذ ڒْبَاطڒ ذ نَّمِيمَا، ذَايْوم تَّكبُّور ذ ڒْفَاوْضَا. 21ݣّْوْذغ اَغَارْوم د عقْبغ اَذ سذْحِيغ زِي أَربِّـي ينُو اَذ رُوْغ اَطَّاس خ يِنِّي إِݣ يعْصَان زِي قْبڒ، عَاذ وَار تُوْبن شَا زݣ ؤُفلّس ذ لْفَسَاد ذ ڒقْبَاحث إِ تُوْغَا تݣّن.
Currently Selected:
22 أيث-كورينث 12: ريف
Highlight
Share
Copy
Want to have your highlights saved across all your devices? Sign up or sign in
