1 أيث-كورينث 14
14
ثْنَاين لْقُدْرَاث رُوْحِيَاث وَار تْوَافْهِيمنْت شَا مْلِيح
1ذْفَارث اَبْرِيذ ن ڒمْحِبّث، رْزُوْث مْلِيح خ لْقُدْرَاث رُوْحِيَاث خَاصَّتَن ثنِّي ن وَاوَاڒ يتْوَاعڒْمن زِي أَربِّـي. 2شُوْف، ونِّي يسَّاوَاڒن س لُّغَا رُوْحِيَا، مَا يسَّاوَاڒ اَك يِوْذَان؟ لَّا، ئِسَّاوَاڒ اَك أَربِّـي. وَار ذِنِّي حَدّ إِي ذَاس يفهّْمن، ئِقَّار ثِمسْڒَايِين س أَرُّوْح يقدّْسن ذَايْسنْت ڒْمَعْنَاث ينُوْفَّرن. 3وَلَكِن ونِّي يسَّاوَاڒن اَك يِوْذَان س مِين يعْڒم زِي أَربِّـي اَتَاف يسَّاوَاض-اَسن يجّن ن وَاوَاڒ بَاش اَذ تْوَاجهّْذن اَذ تْوَاشجّْعن اَذ تْوَاصبَّرن. 4ونِّي يسَّاوَاڒن س لُّغَا رُوْحِيَا يسْتنْفَاع يخف نّس. ونِّي يسَّاوَاڒن س مِين يعْڒم زِي أَربِّـي يسْتنْفَاع جْمَاعث ن ڒْمُوْمِنِين. 5إِيوَا خْسغ مَارَّا كنِّيو اَذ تسِّيوْڒم س لُّغَاث رُوْحِيَاث، وَلَكِن مْلِيح عَاذ اَذ تسِّيوْڒم س وَاوَاڒن إِي ثْعڒْمم زِي أَربِّـي. ونِّي يسَّاوَاڒن س وَاوَاڒ إِݣ يعْڒم زِي أَربِّـي نتَّا يمْغَر خ ونِّي يسَّاوَاڒن س لُّغَاث رُوْحِيَاث، إِلَّا مڒَا شَان يِجّن اَذ يسْتَرْجم حمَا اَذ يسْتنْفع جْمَاعث ن ڒْمُوْمِنِين.
6فَا ڒخُّو آي اَيثْمَا، مڒَا ؤُسِيغ-د غَارْوم سَّاوَاڒغ نش س لُّغَاث رُوْحِيَاث، مَان نّْفَع إِي زِي كنِّيو غَا نفْعغ إِلَّا مڒَا ؤُوِيغ-اَوم-د شَا ن لْوَاحِي نِغ شَا ن ثُوْسْنَا نِغ شَا ن وَاوَاڒ إِي عڒْمغ زِي أَربِّـي نِغ شَان ن تَّعْلِيم؟ 7أَمنِّي ؤُڒَا ذ لْأَلَاث ن لْمُسِيقَا وَار ذَايْسنْت بُو بُوْحْبڒ اَم ثمْجَا نِغ اَم ثْݣَامْبْرِيت. مڒَا وَار ثْصُوْضذ نِيشَان وَار ثْنقْطذ وَار ذَاش تِيشّن بُو نّغْمَا، وَار ثْزمَّرذ اَذ تسّْنذ لْمُوْسِيقَا نِّي مِين ثعْنَا. 8عَاوذ اَمشْنَاو زَّمَّار، مڒَا وَار ذَايس ثْصُوْضذ شَا س يِجّن ن ثْمِيجَّا ثصْفَا، وِي غَا يسْوجْذن إِ ڒْحَارْب؟ 9أَمُّو عَاوذ ؤُڒَا ذ كنِّيو، مڒَا تْوجْوِيجم وَاهَا س وَاوَاڒ نْوم، وِي ذَاوم غَا يفهْمن مِين ثقَّارم؟ أَتَاف اَوَاڒ نْوم كنِّيو اَم ونِّي يسَّاوَاڒن ذِي ڒهْوَا! 10بْڒَا شّكّ دْجَان اَطَّاس ن لْأَنْوَاع ن لُّغَاث ذِي دُّنشْت-أَ، وَلَكِن كُڒ يشْت س ڒْمَعْنَا نّس. 11إِيوَا مڒَا نش وَار سِّينغ شَا ڒْمَعْنَا ن لُّغَا نِّي، أَتَاف نش اَذ يڒِيغ اَم يِجّن ذ اَبَرَّانِي اَك ونِّي يسَّاوَاڒن اَتَاف نتَّا عَاوذ اَكِذِي يِيڒِي اَم يِج وبَرَّانِي. 12إِيوَا كنِّيو، وَامِي ثْرزُّوْم اَطَّاس خ لْقُدْرَاث رُوْحِيَاث، ݣّث لْمجْهُوْد نْوم حمَا اَذ تَرْنُوْم ذِي ثِنِّي إِي زِي يسْتنْفَاعن جْمَاعث ن ڒْمُوْمِنِين.
13س مَانَاينِّي، ونِّي يسَّاوَاڒن س لُّغَاث رُوْحِيَاث يتْخصَّا-يَاس اَذ يࢲَّادْجْ حمَا اَذ يسْتَرْجم مِين يقَّار. 14لِأَنَّا مڒَا ࢲُّوْدْجغ س لُّغَا رُوْحِيَا، أَرُّوْح ينُو يتْࢲَادْجَا وَلَكِن ڒَعْقڒ ينُو وَار يسْتنْفِيع شَا. 15إِيوَا مِين غَا ݣّغ؟ أَذ ࢲَّادْجغ س اَرُّوْح ينُو، أَذ ࢲَّادْجغ عَاوذ س ڒَعْقڒ ينُو. أَذ غنّْجغ س اَرُّوْح ينُو، أَذ غنّْجغ عَاوذ س ڒَعْقڒ ينُو. 16مڒَا تْشكَّرذ أَربِّـي س اَرُّوْح وَاهَا، ونِّي إِي غَارْوم د يُوْسِين س زِّيَارَا وَار يزمَّر اَذ يِينِي آمِين خ شُّكر نّش لِأَنَّا وَار يسِّين شَا مِين ثقَّارذ. 17وَاه، يمْكن شك ثْشكَّرذ أَربِّـي وَلَكِن ونِّي نّغْنِي وَار ث ينفّع شَا.
18تْشكَّرغ أَربِّـي نش سَّاوَاڒغ س لُّغَاث رُوْحِيَاث كْتَار زَّايْوم مَارَّا. 19إِنَّمَا، مڒَا سِّيوْڒغ اَك جْمَاعث ن ڒْمُوْمِنِين غِير س خمْسَا ن وَاوَاڒن اَتَاف اَذَايِي فهّْمن حْسن زِي مڒَا سِّيوْڒغ س عشْرَاڒَاف ن وَاوَاڒن س يِجّن ن لُّغَا رُوْحِيَا.
20لَّا آي اَيثْمَا، وَار تْفكَّرث شَا اَم يحنْجِيرن يمزْيَانن. إِڒِيث اَم يسيْمَان ذِي شَّرّْ؛ إِڒِيث اَم يمقّْرَانن عْلَاحْسَاب ڒَعْقڒ. 21ئِقَّار ذِي شَّرِيعَا ن مُوْسَى: "نش اَذ سِّيوْڒغ اَڒ يِوْذَان-أَ س لُّغَاث ن يثَرَّاسن س يينْشِيشن ن يبَرَّانِيْين، وَاخَّا اَمنِّي وَار ذَايِي تْصنِّيطن شَا. مَانَايَا يقَّار-يث سِيذِي أَربِّـي." 22س وَاوَاڒ-أَ، لُّغَاث رُوْحِيَاث نِثنْتِي ذ يجّن ن لْعَلَامَا وَار ثدْجِي بُو إِ يِنِّي يُوْمْنن؛ لَّا، أَقَات إِ يِنِّي وَار يُوْمِينن شَا. وَلَكِن اَوَاڒ نِّي يتْوَاعڒْمن زِي أَربِّـي يسْتنْفَاع يِنِّي يُوْمْنن مَاشِي إِ يِنِّي وَار يُوْمِينن شَا.
23إِذن، مڒَا ثْمُوْنم جْمَاعث ثكْمَاڒ ن ڒْمُوْمِنِين ثسَّاوَاڒم مَارَّا س لُّغَاث رُوْحِيَاث ؤُذْفن-د جَارَاوم يِوْذَان ن بَارَّا نِغ ذ لْكُفَّار، أَتَاف قَّارن خَاوم قَا يوْذَان-أَ ذ يبُوْهَاڒِيْين. 24-25وَلَكِن، مڒَا ثسَّاوَاڒم مَارَّا كنِّيو س وَاوَاڒن إِي ثْعڒْمم زِي أَربِّـي يُوْذف-د جَارَاوم حَدّ زِي بَارَّا نِغ ذ يجّن ن لْكَافِر، أَتَاف اَذ يحسّ ذݣ يِيخف نّس قَا اَذ يتْوَاحَاسب اَذ يقْنع زَّايْوم مَارَّا نتَّا ذ لْعَاصِي، أَتَاف اَزَّايس تْوَاسُوْفْغن مَارَّا لْأَسْرَار ن وُوْڒ نّس. ثُمَّا اَذ يسجّذ اَذ يعْبذ أَربِّـي اَذ يِينِي قَا أَربِّـي ذ صَّح اَقَاث جَارَاوم!
نِّيظَام إِي يدْجَان ذِي لْعِبَادَا ذِي جْمَاعث ن ڒْمُوْمِنِين
26إِذن فَا آي اَيثْمَا، خْمِي غَا ثْمُوْنم يجّن اَغَارس يِيڒِي يجّن ن وغنِّيج، ئِجّن اَغَارس يِيڒِي يجّن ن وَاوَاڒ ن وسڒْمذ، ئِجّن اَغَارس يِيڒِي لْوَاحِي، ئِجّن اَغَارس ثِيڒِي لُّغَا رُوْحِيَا، ئِجّن اَغَارس ثِيڒِي تَّرْجَمَا. مَارَّا ثِمسْڒَايِين-أَ اَذ يڒِينْت حمَا اَذ تْجهْذم. 27مڒَا ثسِّيوْڒم س يِجّن ن لُّغَا رُوْحِيَا، لَابُد اَذ تسِّيوْڒم ثْنَاين نِغ ثْڒَاثَا أُو صَافِي. أَذ تسِّيوْڒم ئِج-يج، أُو لَابُد اَذ يقِّيم يجّن زَّايْوم اَذ يسْتَرجم. 28مڒَا وَار ذِنِّي حَدّ اَذ يسْتَرْجم، ونِّي يسَّاوَاڒن اَذ يسْتُوْك اَذ يسِّيوڒ ذݣ وُوْڒ نّس ذ أَربِّـي.
29فَا لْأَنْبِيَا أُو لَابُد اَذ سِّيوْڒن ثْنَاين نِغ ثْڒَاثَا. ئِنّغْنِي اَذ ميّْزن اَوَاڒن نِّي. 30مڒَا يهْوَا-د شَا ن وَاوَاڒ ن لْوَاحِي خ شَان يِجّن جَار ن يِنِّي يقِّيمن جَارَاوم، أَتَاف ونِّي يسَّاوَاڒن ذ اَمزْوَارُو اَذ يسْتُوْك. 31لِأَنَّا ثْزمَّرم مَارَّا اَذ تسِّيوْڒم س مِين ثْعڒْمم زِي أَربِّـي ئِج-يج حمَا مَارَّا ڒْمُوْمِنِين اَذ ڒمْذن اَذ تْوَاشجّْعن. 32وَا لْقُدْرَاث رُوْحِيَاث ن لْأَنْبِيَا اَقَاثنْت خ يِيرِي نْسن س يِيخف نْسن. 33لِأَنَّا أَربِّـي وَار يدْجِي بُو ن ڒْفَاوْضَا وَلَكِن ن ڒهْنَا. ذ ثَانِيتَا ذ لْعَادَا إِي ذَايْسنْت ذِي مَارَّا ثِجُمَاع ن ڒْمُوْمِنِين.
34ثِمْغَارِين ذِي ثْجُمَاع ن ڒْمُوْمِنِين لَابُد اَذ قِّيمنْت سْتُوْكَانْت. وَار ذَاسنْت يتْوَاسْمِيح شَا اَذ سِّيوْڒنْت. لَابُد اَذ تْسذْحَانْت مَامّش ثقَّار شَّرِيعَا ن مُوْسَى. 35مڒَا رزُّوْنْت اَذ سّْننْت شَان ثْمسْڒَايْث، لَابُد اَذ سّقْسَانْت يرْيَازن نْسنْت ذِي ثدَّارْث. لِأَنَّا ثَمْغَارْث ذ ڒْعِيب اَذ تسِّيوڒ ذِي ڒْوسْط ن جْمَاعث ن ڒْمُوْمِنِين.
36أَوَاڒ ن أَربِّـي، مَا يفّغ-د زَّايْوم كنِّيو؟ مَا يُوْوض-د غَارْوم كنِّيو وَاهَا؟ 37مڒَا يجّن يحسّب يخف نّس نِيشَان ذ نَّبِي نِغ ذ يجّن ن بْنَاذم رُوْحِيَا اَتَاف أُو لَابُد اَذ يقْبڒ مِين ذَاوم د تَارِيغ ذِي ثبْرَات-أَ نتَّاث ذ ڒُوْصِيّث ن سِيذِيثْنغ. 38مڒَا وَار يقْبِيڒ شَا مَانَايَا، وَار يتْوَاقبِّيڒ شَا نتَّا. 39س مَانَايَا آي اَيثْمَا، رْزُوْث اَطَّاس حمَا اَذ تسِّيوْڒم س وَاوَاڒ يتْوَاعڒْمن زِي أَربِّـي، أُو عَاوذ وَار منَّاعْث شَا يوْذَان اَذ سِّيوْڒن س لُّغَاث رُوْحِيَاث. 40وَلَكِن يتْخصَّا-كنِّيو اَذ تݣّم كُڒْشِي مَعْقُوْل س يِجّن ن نِّيظَام نِيشَان.
Currently Selected:
1 أيث-كورينث 14: ريف
Highlight
Share
Copy
Want to have your highlights saved across all your devices? Sign up or sign in
