1 أيث-كورينث 13
13
ئِزْڒِي خ وبْرِيذ إِي يُوْعْڒَان قَاع خ مَارَّا
1مَعْلِيك سَّاوَاڒغ س يِيڒسَاون ن يثَرَّاسن س لُّغَا،
مَعْلِيك سَّاوَاڒغ س لُّغَا ن لْمَلَائِكَاث يعْنِي رُوْحِيَا،
مَاشَا ڒمْحِبّث وَار ذَايِـي تِيڒِي شَا،
إِڒِي تْسدَّاعغ اَم يِج ن دَرْبُوْݣَا،
تمْقرْقَابغ اَم ڒقْرَاقب#13.1 ڒقْرَاقب نِثْنِي ذ قْرَاپَّـاث. وَاهَا.
2نش مَعْلِيك غَارِي لْقُدْرَا اَذ سِّيوْڒغ اَم لْأَنْبِيَا،
مَعْلِيك فهْمغ مَارَّا مِين ينُوْفَّرن ذ مَارَّا ثُوْسْنَا،
مَعْلِيك سْخدَّامغ لْإِيمَان اَذ سْمُوْتِّيغ يذُوْرَار-أَ،
إِڒِي ذ وَالُو إِي دْجِيغ نش مڒَا وَار تْحِبِّيغ شَا.
3نش مَعْلِيك صدّْقغ مَارَّا مِين غَارِي ذ اَݣْڒَا،
مَعْلِيك سلّْمغ يخف ينُو اَذ سْحرْقن دَّات-أَ،
إِڒِي نش وَار ربْحغ وَالُو مڒَا وَار تْحِبِّيغ شَا.
4ڒمْحِبّث ذَايس تِّسَاع ن ڒْخَاضَر، ذَايس يج ن لْحَنَانَا.
نتَّاث وَار تفْتَخَر وَار ثْحسّذ شَا.
وَار ذَايس تَّكبُّر، 5أَقَا نتَّاث تْسذْحَا.
وَار ثْرزُّو شَا خ مِين ثنْوَا نتَّاث وَاهَا.
وَار يسْهِيڒ اَذ تْعصّب، مڒَا عْصَان-ت تتُّو ذغْيَا.
6وَار ثْفَرّح شَا زِي شَّرّْ، ثْفَرّح زِي لْحَقِيقَا.
7وَار ثْفطَّاح عمَّارْص. تَامن شْحَاڒ مَا ثكَّا.
ثْصبَّر خ مِين مَا يدْجَان. س لْأَمَال ڒبْدَا تْمنَّا.
8ڒمْحِبّث-أَ نتَّاث عمَّارْص اَذ تقْضَا،
مَاشَا اَذ نْتَاهَان وَاوَاڒن ن لْأَنْبِيَا،
ئِڒسَاون ن يثَرَّاسن وَار تْغِيمِن شَا ذ لُّغَا،
لْمَعْرِيفَا اَذ تْوَاكمّڒ يعْنِي ثُوْسْنَا.
9أَقَا مِين نسّن مَاشِي يكْمَاڒ مَانَايَا،
مِين نسَّاوَاڒ نشِّين لْأَنْبِيَا ذ اَنقْصِي إِݣ يدْجَا.
10مِين يدْجَان قَاع يكْمَاڒ اَذ د يبَان ذَانِيتَا،
سّنِّي مِين يدْجَان ذ اَنقْصِي اَذ يودَّر نتَّا.
11وَامِي نش تُوْغَايِي ذ اَسيْمِي وَاهَا،
أَمشْنَاو اَسيْمِي سِّيوْڒغ اَم نتَّا،
أَمشْنَاو اَسيْمِي تْفكَّرغ اَم وَانِيتَا،
أَمشْنَاو اَسيْمِي وَار تْميِّيزغ س لْفِكْرَا.
نش وَامِي ذوْڒغ ذ اَرْيَاز بَعْدَا،
سمْحغ ذݣ يبْرِيذن ن وسيْمِي-يَا.
12أَقَا ڒخُّو نْخزَّر ذݣ يِجّن ن ثِيسِيث وَار ثصْفِي شَا،
مَاشَا منْبَعْد أَ نمْࢲر مْلِيح قَارَا ذِي قَارَا.
ڒخُّو مِين سّْنغ ذ اَنقْصِي إِݣ يدْجَا،
منْبَعْد اَذ سّْنغ نش ثِمسْڒَايِين مَارَّا،
كِيف-كِيف مَامّش تْوَاسّْنغ نش ذَانِيتَا.
13أَقَاثن ڒخُّو قِّيمن ثْڒَاثَا-يَا:
لْإِيمَان ذ لْأَمَال ذ ڒمْحِبّث يِيْنَا.
مَاشَا زِي يِيْنَا ڒمْحِبّث ثُوْعْڒَا.
Currently Selected:
1 أيث-كورينث 13: ريف
Highlight
Share
Copy
Want to have your highlights saved across all your devices? Sign up or sign in
