1 أيث-كورينث 15
15
لْقِيَامَا ن لْمَسِيح
1فَا آي أَيثْمَا اَكنِّيو سْفكَّرغ خ لْإِنْجِيل إِي زِي كنِّيو بشَّرغ، يعْنِي نتَّا ثْقبْڒم-ث أُو مْتبْثِين خَاس. 2أَقَا ثْنجّْمم زَّايس وَامِي ذَايس تطّْفم مْلِيح ذݣ وَاوَاڒ ن تّبْشِير نِّي ونِّي إِي زِي كنِّيو بشَّرغ. مڒَا لَّا، زَعْمَا لْإِيمَان نْوم ثسْبطّْڒم-ث.
3شُوْف، سِيْوْضغ-اَوم-د مَانَاينِّي يدْجَان مُهِم تُوْغَا قبْڒغ-ث نش س يِيخف ينُو، يعْنِي لْمَسِيح يمُّوْث عْلَاحْسَاب ڒْمُعْصِيَاث نّغ مَامّش يقَّار لْكِتَاب. 4ثُمَّا يتْوَانْضڒ، ثُمَّا يتْوَاسْنكَّار-د ذݣ وَاسّ وِيس ثڒْتِيَّام مَامّش يقَّار لْكِتَاب. 5ثُمَّا يمظْهَار-اَس-د إِ بُطْرُس،#15.5 بُطْرُس يسم نّس ذِي لْكِتَاب ن لْأَصل قَّارن-اَس كيْفَاص. سّنِّي يمظْهَار-اَسن-د إِ ثنْعَاش نِّي ن اَرُّسُل. 6منْبَعْد يمظْهَار-اَسن-د إِ كْتَار زِي خمْسْمِيَّا ن وَاوْمَاثن ذِي ثْوَاڒَا ذ يشْتن. نِثْنِي عَاذ دَّرن عْڒَاين مَارَّا إِذْسن، ڒبْعَاض زَّايْسن اَقَا طّْصن يعْنِي مُّوْثن. 7ثُمَّا يمظْهَار-اَس-د إِ يَعْقُوْب، منْبَعْد إِ مَارَّا اَرُّسُل. 8غَار ونݣَّارُو قَاع يمظْهَار-اَيِي-د إِ نش، اَخْمِي نش عظْڒغ وَار د خْڒِيقغ شَا ذِي زْمَان ينُو نِيشَان. 9أَقَا نش ذ اَمزْيَان قَاع ذِي اَرُّسُل. وَار سْذِيهِيدْجغ شَا اَذَايِي ڒَاغَان اَرَّسُوْل ڒَاحقَّاش تُوْغَا نش تْعدَّابغ جْمَاعث ن ڒْمُوْمِنِين. 10وَلَكِن نش س اَرْضَا ن أَربِّـي ذوْڒغ مَامّش دْجِيغ ڒخُّو. ثُمَّا اَرْضَا نّس وَار يدْجِي بُو خَافِي س بْڒَا نّْفَع؛ لَّا، نش شَّاثغ تَمَارَا كْتَار زَّايْسن مَارَّا. مَاشِي ذ نش زَعْمَا؛ لَّا، ذ اَرْضَا ن أَربِّـي إِي كِذِي. 11فَلِهَاذَا وَاخَّا ذ نش نِغ ذ نِثْنِي، ذ وَانِيتَا ذ تّبْشِير إِي زِي نتْبشَّار سّنِّي كنِّيو ثُوْمْنم زَّايس.
لْقِيَامَا ن يمتِّينن
12فَا لْمَسِيح نتْبشَّار خَاس يتْوَاسكَّر-د زِي ڒْموْث. مَامّش قَّارن ڒبْعَاض زَّايْوم وَار ثدْجِي بُو لْقِيَامَا ن يمتِّينن؟ 13مڒَا وَالُو لْقِيَامَا ن يمتِّينن، ؤُڒَا ذ لْمَسِيح وَار د يتْوَاسكَّر شَا. 14مَعْلِيك وَار د يتْوَاسكَّر شَا لْمَسِيح، إِڒِي تّبْشِير نّغ ذ ڒْبَاطڒ وَاهَا، إِڒِي كنِّيو لْإِيمَان نْوم ؤُڒَا ذ نتَّا ذ ڒْبَاطڒ. 15مَعْلِيك اَمنِّي، إِڒِي نُوْفَا يخف نّغ نْشهّذ ࢲُّوْر خ أَربِّـي. مَايمِّي؟ ڒَاحقَّاش نشْهذ خ أَربِّـي بلِّي يسكَّر-د لْمَسِيح زِي ڒْموْث. وَلَكِن مَعْلِيك وَار تِيڒِي بُو لْقِيَامَا ن يمتِّينن، إِڒِي أَربِّـي زَعْمَا وَار د يسكَّر شَا لْمَسِيح زِي ڒْموْث. 16شُوْف، مَعْلِيك يمتِّينن وَار د تْوَاسْنكَّرن شَا، إِڒِي لْمَسِيح زَعْمَا وَار د يتْوَاسكَّر شَا ؤُڒَا ذ نتَّا. 17مَعْلِيك وَار د يتْوَاسكَّر شَا لْمَسِيح، إِڒِي كنِّيو زَعْمَا لْإِيمَان نْوم ذ ڒْبَاطڒ وَاهَا، إِڒِي عَاذ اَقَا كنِّيو ذِي ڒْمُعْصِيَاث نْوم. 18مَعْلِيك اَمنِّي، إِڒِي يِنِّي يطّْصن يعْنِي يِنِّي يمُّوْثن ذِي لْمَسِيح زَعْمَا صَافِي قَا فْنَان. 19مَعْلِيك نݣَّا لْأَمَال نّغ ذِي لْمَسِيح عْلَاحْسَاب ثُوْذَارْث-أَ ثَانِيتَا وَاهَا، إِڒِي س مَانَايَا نتْزِيدْجِيز إِ يِوْذَان زَعْمَا كْتَار زݣ يِوْذَان مَارَّا.
20فَا اَقَا ڒخُّو لْمَسِيح يتْوَاسكَّر-د زِي ڒْموْث، يعْنِي نتَّا ذ ثَفدْجَاحْث ثَمزْوَارُوْت إِي د يكَّرن زݣ يِنِّي يمُّوْثن. 21شُوْف، س يِجّن ن بْنَاذم آدَم ثُوْسَا-د زَّايس ڒْموْث. س يِجّن ن بْنَاذم عَاوذ ثُوْسَا-د زَّايس لْقِيَامَا ن يمتِّينن. 22ڒَاحقَّاش اَم مَامّش إِي غَا نمّث مَارَّا س بْنَاذم نِّي آدَم، أَمُّو عَاوذ اَغَارْنغ ثِيڒِي ثُوْذَارْث إِ مَارَّا نشِّين س لْمَسِيح. 23وَلَكِن كُڒ يجّن نُّوْبث نّس: لْمَسِيح نتَّا ذ ثَفدْجَاحْث ثَمزْوَارُوْت. خْمِي د غَا يعْقب نتَّا، أَذ د تَاس نُّوْبث ن يِنِّي يدْجَان زَّايس نتَّا.
24ثُمَّا اَذ يِيڒِي ڒفْنَا ن دُّنشْت-أَ. لْمَسِيح اَذ يقْضَا خ مَارَّا ڒحْكَام ذ ڒْمخْزن ذ جّْهذ إِݣ يدْجَان، ثُمَّا اَذ يجّ ڒحْكَام نِّي نّس إِ أَربِّـي بَابَاس. 25أَقَا يتْخصَّا اَذ يحْكم لْمَسِيح اَڒ غَا يݣّ أَربِّـي مَارَّا ڒْعَذْيَان نّس سْوَادَّاي ن سُّلْطَا ن يضَارن نّس. 26ڒَعْذُو اَنݣَّارُو إِي غَا يبطَّڒ نتَّاث ذ ڒْموْث. 27أَقَا أَربِّـي يݣَّا مَارَّا ثِمسْڒَايِين سْوَادَّاي إِ سُّلْطَا ن يضَارن ن لْمَسِيح. وَلَكِن خْمِي يقَّار قَا مَارَّا ثِمسْڒَايِين تْوَاݣّنْت سْوَادَّاي نّس، نسّن بلِّي أَربِّـي وَار يدْجِي بُو جَار ن ثْمسْڒَايِين نِّي ڒَاحقَّاش أَربِّـي س يِيخف نّس نتَّا إِݣ يݣِّين مَارَّا ثِمسْڒَايِين نِّي سْوَادَّاي ن سُّلْطَا ن لْمَسِيح. 28خْمِي غَا يڒِينْت مَارَّا ثِمسْڒَايِين-أَ سْوَادَّاي ن سُّلْطَا ن لْمَسِيح، ثُمَّا مِّيس يعْنِي لْمَسِيح س يِيخف نّس اَذ يذْوڒ ؤُڒَا ذ نتَّا سْوَادَّاي ن سُّلْطَا ن أَربِّـي إِݣ يݣِّين مَارَّا ثِمسْڒَايِين-أَ سْوَادَّاي ن سُّلْطَا ن لْمَسِيح. أَمُّو اَذ يِيڒِي أَربِّـي ذ مَارَّا ذِي مِين ذِي مَا.
29شُوْف، يِنِّي يتْوَاطهَّارن س وَامَان عْلَاحْسَاب إِ يِنِّي يمُّوْثن، مَان نّْفَع إِي رزُّوْن نِثْنِي؟ مڒَا ذ صَّح زَعْمَا بلِّي يِنِّي يمُّوْثن وَار د تْوَاسْنكَّارن شَا، مَايمِّي يوْذَان-أَ تتْوَاطهَّارن س وَامَان عْلَاحْسَاب إِ يِنِّي يمُّوْثن؟ 30ئِي نش، مَايمِّي دْجِيغ ذِي لْخَطَر كُڒ ثْسَعَّات؟ 31آي أَيثْمَا، تْوَاجَاهغ ڒْموْث كُڒ نْهَار! قَّارغ-اَوم مَانَايَا س لْإِفْتِخَار-أَ إِي غَارِي ذَايْوم عْلَاحْسَاب ثُوْذَارْث-أَ نّغ إِي غَارْنغ ذ يْشْتن اَك سِيذِيثْنغ عِيْسَى لْمَسِيح. 32نش مڒَا عْلَاحْسَاب ثِمسْڒَايِين ن دُّنشْت-أَ وَاهَا، مَايمِّي منْغغ اَك ڒُوْحُوْش ذِي ثنْدِينْت ن ؤُفَسُوْس؟ مِين غَا ربْحغ؟ ئِمتِّينن، مڒَا وَار د تْنكَّارن شَا زِي ڒْموْث، ئِي مَايمِّي؟
"يَالَّاه أَ نشّث أَ نسْوث،
قَا ثِيوشَّا أَ نمّث."
33وَار خدّْعث شَا يخف نْوم:
"ثَمْعَاشَارث ثَعفَّانْت،
تْضيَّاع تَّرْبِيَا ثَصبْحَانْت."
34أَرّم-د ڒْبَاڒ نْوم، وَار عصَّاث شَا. قَّارغ-اَوم مَانَايَا بَاش اَذ تْسذْحَام مِينْزِي ڒبْعَاض زَّايْوم ذَايْسن ڒقْفَاڒث خ أَربِّـي.
دَّات نِّي إِي غَارْنغ غَا يِيڒِين ذِي لْقِيَامَا
35وَلَكِن يجّن اَذ يِينِي: ئِمتِّينن، مَامّش غَا ݣّن اَذ د كَّرن؟ مَان صِّفث إِي زِي د غَا ذوْڒن؟ 36آ ونِّي وَار يفْهِيمن، ثَحبُّوْيْث نِّي إِي ثْزرّْعذ اَذ تمّث زَعْمَا سْوَادَّاي ن وشَاڒ، منْبَعْد اَذ تغْمِي. 37أُو ثنِّي ثْزرّْعذ شك نتَّاث وَار ثدْجِي بُو ذ صِّفث نِّي إِي د غَا يغْمِين. لَّا، ثْزرّْعذ غِير يجّن ن ثْحبُّوْيْث وَاهَا ن زَّرِّيعث ن يِرْذَان نِغ ذ شَا ن زَّرِّيعث نّغْنِي. 38ثُمَّا يتِيشّ-اَس أَربِّـي يجّن ن صِّفث إِي غَا يخْضَر نتَّا. كُڒ نُّوْع ن زَّرِّيعث يتِيشّ-اَس صِّفث نّس وَاحْذس.
39أَيْسُوْم عَاوذ وَار يدْجِي بُو مَارَّا كِيف-كِيف. يرْيَازن غَارْسن يجّن ن نُّوْع ن ويْسُوْم وَاحذْسن، لْحَيَوَانَاث وَاحذْسن، ئِجْضَاض يجّن ن نُّوْع وَاحذْسن، ئِسڒْمَان عَاوذ وَاحذْسن.
40عَاوذ ذِنِّي صِّفَاث ن ثْمسْڒَايِين إِي يدْجَان ذݣ وجنَّا. عَاوذ ذِنِّي صِّفَاث ن ثْمسْڒَايِين إِي يدْجَان ذِي ثْمُوْرْث. أَشعْشع ن مِين يدْجَان ذݣ وجنَّا نتَّا ذ يجّن ن نُّوْع. أَشعْشع ن مِين يدْجَان ذِي ثْمُوْرْث نتَّا ذ يجّن ن نُّوْع. 41ثْفُوْشْت غَارس نُّوْع ن وشعْشع نّس وَاحْذس. ثَزِيرِي غَارس نُّوْع ن وشعْشع نّس وَاحْذس. ئِثْرَان نُّوْع ن وشعْشع نْسن وَاحذْسن. كُڒ يثْرِي عَاوذ ذ اَشعْشع نّس وَاحْذس.
42أَمُّو إِي تِيڒِي لْقِيَامَا ن يمتِّينن، مِين يتْوَازرّْعن اَذ يفْنَا. مِين د يتْوَاسْنكَّرن اَذ يذُوْم. 43دَّات تْوَازرّع ذِي ڒفْضِيحث، تْوَاسْنكَّر-د ذِي شّنْعث. تْوَازرّع ذِي ضُّعف، تْوَاسْنكَّر-د ذِي جّْهذ. 44تْوَازرّع ذ يجّن ن دَّات ن بْنَاذم، تْوَاسْنكَّار-د ذ يجّن ن دَّات رُوْحِيَا. مڒَا ثدْجَا دَّات ن بْنَاذم، ثدْجَا عَاوذ دَّات رُوْحِيَا. 45أَمُّو يقَّار لْكِتَاب: "بْنَاذم اَمزْوَارُو يعْنِي آدَم يذْوڒ ذ بُوْحْبڒ يدَّرن." آدَم اَنݣَّارُو#15.45 آدَم اَنݣَّارُو يعِنِي نتَّا ذ عِيْسَى لْمَسِيح. نتَّا ذ بُوْحْبڒ يسدَّرن. 46مِين يدْجَان رُوْحِيَا وَار د يتِيس شَا ذ اَمزْوَارُو؛ لَّا، ئِتَاس-د مِين يدْجَان ن بْنَاذم. مِين يدْجَان رُوْحِيَا يتَاس-د منْبَعْد. 47بْنَاذم اَمزْوَارُو يتْوَاصنَّع زݣ وشَاڒ ن ثْمُوْرْث، بْنَاذم وِيس ثْنَاين يُوْسَا-د زݣ وجنَّا. 48مَامّش إِي يدْجَا بْنَاذم نِّي يتْوَاصنّْعن زݣ وشَاڒ، أَمنِّي عَاوذ إِي دْجَان يِوْذَان يتْوَاصنَّاعن زݣ وشَاڒ. وَا مَامّش إِي يدْجَا بْنَاذم نِّي ن وجنَّا، أَمنِّي عَاوذ إِي دْجَان يِوْذَان ن وجنَّا. 49مَامّش نتْشَابَّاه ذِي صِّفث ن ونِّي يتْوَاصنّْعن زݣ وشَاڒ، أَمنِّي عَاوذ إِي غَا نْشَابَّاه ذِي صِّفث ن ونِّي زݣ وجنَّا.
50فَا قَّارغ-اَوم آي أَيثْمَا، قَا اَيْسُوْم ذ يذَامّن وَار زمَّرن اَذ وَارْثن ذِي ڒْمُلْك وجنَّا. مِين يفنَّان وَار يوَارّث شَا مِين وَار يفنِّين. 51-52أَقَا قَّارغ-اَوم يجّن ن ثْمسْڒَايْث ڒْمَعْنَا نّس ينُوْفَّرن: قَا وَار نتْمتِّي شَا س مَارَّا إِذْنغ. خْمِي غَا يصُوْض زَّامَّار اَنݣَّارُو اَتَاف أَ نْبدّڒ مَارَّا إِذْنغ ذِي صِّفث نّغْنِي. مَانَايَا اَذ يِيڒِي ذغْيَا ذݣ يِجّن ن وَارْمَاش ن ثِيطّ.#15.51-52 أَرْمَاش قَّارن-ت إِ وغمّز. أَذ يصُوْض زَّامَّار نِّي ثُمَّا اَذ د تْوَاسْنكَّرن يمتِّينن يعْنِي اَذ دُوْمَان إِ ڒبْدَا أَ نِيڒِي نْبدّڒ ذِي صِّفث نّغْنِي.
53شُوْف، مِين يفنَّان يتْخصَّا اَذ يغْمس س مِين وَار يفنِّين، ذ مِين يتْمتَّان يتْخصَّا اَذ يغْمس س مِين وَار يتْمتِّين. 54مِين يفنَّان خْمِي غَا يغْمس س مِين وَار يفنِّين، ذ مِين يتْمتَّان خْمِي غَا يغْمس س مِين وَار يتْمتِّين، ڒخْدّنِّي اَذ د يفّغ مِين يُوْرِين ذِي لْكِتَاب: <ڒْموْث يسغْڒي-ت اَرْبَاح.>
55<هِيوَا شم آ ڒْموْث، أَرْبَاح نّمْ مَانِي يدْجَا؟
هِيوَا شم آ ڒْموْث، ثِيقّسْت نّمْ مَانِي ثدْجَا؟>
56أَقَا ڒْموْث ثِيقّسْت نّس تَاس-د زِي ڒْمُعْصِيّث. قَا ڒْمُعْصِيّث ثِزمَّار نّس تَاس-د زِي شَّرِيعَا. 57نشِّين أَ نحْمذ أَربِّـي! نتَّا يتِيشّ-اَنغ-د بَاش أَ نرْبح س سِيذِيثْنغ عِيْسَى لْمَسِيح.
58س مَانَايَا آي أَيثْمَا يمْعِيزّن ينُو، بدّث نِيشَان مَاشِي اَكنِّيو سنْهزّن. ݣّث لْمجْهُوْد نْوم ڒبْدَا ذِي ڒْخذْمث ن سِيذِيثْنغ، قَا ثسّْنم بلِّي ڒْخذْمث نْوم ذِي سِيذِيثْنغ مَاشِي ذ ڒْبَاطڒ.
Currently Selected:
1 أيث-كورينث 15: ريف
Highlight
Share
Copy
Want to have your highlights saved across all your devices? Sign up or sign in
