1 أيث-كورينث 12
12
أَرُّوْح يقدّْسن يتِيشّن لْقُدْرَاث إِ ڒْمُوْمِنِين
1فَا اَمَّا لْقُدْرَاث رُوْحِيَاث. آي اَيثْمَا، وَار خْسغ شَا اَخَاسنْت تْقفَاڒم يخف نْوم. 2قَا ثسّْنم بلِّي وَامِي تُوْغَا كنِّيو ذ لْكُفَّار تْوَاسُوْفْغم زݣ وبْرِيذ غَار لْأَصْنَام يزيْنُوْنن. 3س مَانَاينِّي خْسغ اَذ تْفهّْمم مْلِيح بلِّي وَار ذِنِّي حَدّ اَذ يِينِي س أَرُّوْح ن أَربِّـي <قَا عِيْسَى يتْوَانْعڒ>! عَاوذ وَار ذِنِّي حَدّ اَذ يِينِي <قَا عِيْسَى ذ مَوْلَانَا> إِلَّا س أَرُّوْح يقدّْسن.
4فَا ذِنِّي لْأَنْوَاع ن لْقُدْرَاث، وَلَكِن أَرُّوْح ذ يجّن. 5ذِنِّي لْأَنْوَاع ن لْمسْؤُلِيَاث، وَلَكِن سِيذِيثْنغ ذ يجّن. 6ذِنِّي لْأَنْوَاع ن ڒخْذَايم، وَلَكِن أَربِّـي ذ يجّن ذ نتَّا إِي ثنْت يسْخدَّامن مَارَّا ذِي كُڒ بْنَاذم. 7ئِمُّوْش-اَس إِ كُڒ يجّن إِي زِي غَا يسْمظْهَار ڒْخذْمث ن أَرُّوْح يقدّْسن بَاش اَذ ينْفع مَارَّا يوْذَان. 8ئِجّن يمُّوْش-اَس س وفُوْس ن أَرُّوْح يقدّْسن بَاش اَذ يسِّيوڒ س لْحِكْمَا. ئِجّن يمُّوْش-اَس اَوَاڒ ن ثُوْسْنَا#12.8 ثُوْسْنَا نتَّاث ذ لْمَعْرِيفَا. س وفُوْس ن أَرُّوْح-أَ وَانِيتَا. 9ئِجّن يمُّوْش-اَس لْإِيمَان يجْهذ س وفُوْس ن أَرُّوْح-أَ وَانِيتَا. ئِجّن مُّوْشنْت-اَس شَان لْقُدْرَاث بَاش اَذ يسْݣنْفَا س وفُوْس ن أَرُّوْح-أَ وَانِيتَا. 10ئِجّن يمُّوْش-اَس اَذ يݣّ لْمُعْجِيزَاث. ئِجّن يمُّوْش-اَس اَذ يسِّيوڒ س مِين يعْڒم زِي أَربِّـي. ئِجّن مُّوْشنْت-اَس ثِزمَّار اَذ يميّز جَار ن اَرُّوْحَاث. ئِجّن يمُّوْش-اَس اَذ يسِّيوڒ س ڒبْعَاض ن لُّغَاث رُوْحِيَاث. ئِجّن يمُّوْش-اَس اَذ يسْتَرْجم لُّغَاث نِّي. 11مَارَّا ثِمسْڒَايِين-أَ ثِيْنَا تْوَاسْخدَّامنْت س وفُوْس ن يِجّن ن أَرُّوْح وَانِيتَا. ئِفَرق-يثنْت إِ كُڒ يجّن وَاحْذس مَامّش يخس نتَّا.
مَارَّا نشِّين ذ يجّن ن دَّات ذِي لْمَسِيح
12شُوْف، دَّات نّغ نتَّاث ذ يشْتن غَارس اَطَّاس ن طْرُوْفَاث، وَاخَّا طْرُوْفَاث-أَ اَطَّاس إِي يدْجَان نِثْنِي ذ يجّن. أَمُّو يدْجَا لْمَسِيح. 13لِأَنَّا نشِّين مَارَّا نتْوَاطهَّار س وَامَان س يِجّن ن أَرُّوْح بَاش أَ نِيڒِي ذ يجّن ن جْمَاعث، يعْنِي أَيث-إِسْرَائِيل نِغ ذ ييُوْنَانِيْين، ذ يِنِّي غَار يدْجَا بَاب نْسن نِغ ذ يِنِّي غَار ثدْجَا لْحُرِّيَا نْسن. نشِّين مَارَّا إِذْنغ يُوْشَا-ٱنغ أَ نْسو يعْنِي أَ نْشَرش ذݣ يِجّن ن أَرُّوْح.
14ڒخُّو شُوْف، دَّات وَار غَارس شَا يجّن ن طَّارْف وَاهَا؛ لَّا، غَارس اَطَّاس ن طْرُوْفَاث. 15مڒَا ينَّا وضَار نّس قَا نش وَار دْجِيغ شَا ذ فُوْس نش وَار دْجِيغ شَا زِي دَّات-أَ، مَاشِي س وَاوَاڒ-أَ إِي غَا يفّغ زِي دَّات-أَ. 16مڒَا ينَّا ومجُّوْن نّس قَا نش وَار دْجِيغ شَا ذ ثِيطّ نش وَار دْجِيغ شَا زِي دَّات-أَ، مَاشِي س وَاوَاڒ-أَ إِي غَا يفّغ زِي دَّات-أَ. 17مڒَا دَّات ثكْمَاڒ نتَّاث ذ يجّن ن ثِيطّ، مَانِيس إِي غَا ثْصنّط؟ مڒَا دَّات ثكْمَاڒ نتَّاث ذ يجّن ن ومجُّوْن، مَانِيس إِي غَا ثْشُوْمّ؟ 18وَلَكِن ڒخُّو أَربِّـي يستّف طْرُوْفَاث ن دَّات يسّن كُڒ يشِتن مَامّش يخس اَت يݣّ. 19إِيوَا مَعْلِيك طْرُوْفَاث-أَ مَارَّا تُوْغَا ذ يجّن، مَانِي ثدْجَا دَّات؟ 20ڒخُّو ذِنِّي اَطَّاس ن طْرُوْفَاث وَلَكِن ذِنِّي يجّن ن دَّات وَاهَا.
21فَا ثِيطّ وَار ثْزمَّر اَذَاس ثِينِي إِ وفُوْس قَا صَافِي نش وَار ش تحْذِيجِيغ شَا. نِغ عَاوذ اَزدْجِيف اَذَاسن يِينِي إِ يضَارن قَا صَافِي نش وَار كنِّيو تحْذِيجِيغ شَا. 22لَّا، طْرُوْفَاث نِّي ن دَّات إِي ذَانغ تْغِيڒ ضعْفنْت اَتَاف نِثنْتِي تْوَاحْذَاجَانْت كْتَار. 23طْرُوْفَاث نِّي ن دَّات إِي ذَانغ تْغِيڒ وَار غَارْسنْت بُو لْقِيمَا، أَتَاف اَذَاسنْت نݣّ لْقِيمَا كْتَار. عَاوذ طْرُوْفَاث نّغ إِي وَار د تْبِيْننْت شَا، أَتَاف نتْسذْحَا زَّايْسنْت كْتَار. 24وَلَكِن طْرُوْفَاث نّغ إِي د تْبَاننْت وَار تحْذِيجِينْت شَا اَزَّايْسنْت نْسذْحَا. يعْنِي أَربِّـي يݣَّا لْعَكْس، ئِستّف طْرُوْفَاث ن دَّات بَاش اَذ يُوْش لْقِيمَا إِ طَّارْف نِّي يتحْذَاجَان لْقِيمَا. 25أَمُّو وَار يدْجِي بُو لْخِلَاف ذِي دَّات، تْهلَّانْت ذݣ وَايْوَايَا كِيف-كِيف. 26مڒَا شَان يِجّن يتْوَاعْدَّاب، أَذ تْوَاعدَّابن كُڒْشِي. مڒَا شَان يِجّن ثمُّوْش-اَس لْقِيمَا، أَكِذس فَرْحن مَارَّا.
27فَا كنِّيو ذ دَّات-أَ يعْنِي ذ جْمَاعث ن لْمَسِيح، كُڒ يجّن زَّايْوم ذ يجّن طَّارْف زَّايس. 28ذِي جْمَاعث-أَ ن ڒْمُوْمِنِين يرتّب أَربِّـي ذ اَمزْوَارُو أَرُّسُل، وِيس ثْنَاين لْأَنْبِيَا، وِيس ثْڒَاثَا يمْسڒْمَاذن، منْبَعْد يِنِّي يسْخدَّامن لْمُعْجِيزَاث ذ يِنِّي غَار دْجَانْت لْقُدْرَاث بَاش اَذ سْݣنْفَان يوْذَان، ذ يِنِّي يتْعَاوَانن، ذ يِنِّي يتْكلَّافن س ڒْخذْمث، ذ يِنِّي يسَّاوَاڒن س ڒبْعَاض ن لُّغَاث رُوْحِيَاث. 29مَا زَعْمَا مَارَّا إِذْسن ذ اَرُّسُل؟ مَا مَارَّا إِذْسن ذ لْأَنْبِيَا؟ مَا مَارَّا إِذْسن ذ يمْسڒْمَاذن؟ مَا مَارَّا إِذْسن سْخدَّامن لْمُعْجِيزَاث؟ 30مَا مَارَّا إِذْسن غَارْسن لْقُدْرَاث اَذ سْݣنْفَان؟ مَا مَارَّا إِذْسن سَّاوَاڒن س لُّغَاث رُوْحِيَاث؟ مَا مَارَّا إِذْسن سْتَرْجَامن؟
31فَا كنِّيو ثْرزُّوْم اَطَّاس خ لْقُدْرَاث يُوْعْڒَان، نش اَذَاوم شرّْحغ يجّن ن وبْرِيذ يُوْعْڒَان خ مَارَّا يبْرِيذن.
Currently Selected:
1 أيث-كورينث 12: ريف
Highlight
Share
Copy
Want to have your highlights saved across all your devices? Sign up or sign in
