ರೋಮಾಯೆರೆಗ್ 4

ನಂಬಿಕೆಡ್ದೆ ಅಬ್ರಹಾಮು ನೀತಿವಂತೆ ಆಯೆ ಪನ್ಪಿನ ವಿಚಾರ

1ಅಂಚಾಂಡ ನಮ ವಂಶದ ಅಮ್ಮೆ ಆಯಿ ಅಬ್ರಹಾಮು ಬಗೆಟ್ ನಮ ದಾನೆ ಪನ್ಕ? ಆಯನ ನಂಬಿಕೆದ ಬೊಕ್ಕ ನ್ಯಾಯಕಟ್ಟ್‌ದ ಬಗೆಟ್ ಅನುಭವ ದಾನೆ? 2ಅಬ್ರಹಾಮು ಎಡ್ಡೆ ಕ್ರಿಯೊಲೆಡ್ದಾದ್ ನೀತಿವಂತೆ ಅಂದ್‌ದ್ ತೀರ್ಪು ಆತಿನಾಂಡ ಆಯಗ್ ಪುಗರೊನಿಯೆರೆ ಅವಕಾಸ ಉಂಡು. ಆಂಡ ದೇವೆರೆ ದೃಷ್ಟಿಡ್ ಇಂಚ ಆಪುಜಿ. 3ನೆತ್ತ ಸಂಗತಿಡ್ ಶಾಸ್ತ್ರ ಪನ್ಪಿನೆನ್ ಆಲೋಚನೆ ಮಲ್ಪುಲೆ, “ಅಬ್ರಹಾಮು ದೇವೆರೆನ್ ನಂಬಿಯೆ, ಆ ನಂಬಿಕೆನೇ ಆಯನ ಲೆಖ್ಖೊಗು ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್,” ಅಂದ್‌ದ್ ಪನ್ಪುಂಡು. 4ಬೇಲೆ ಮಲ್ತಿನಾಯಗ್ ಸಂಬಳ ತಿಕ್ಕುಂಡು ಅವು ಉಡಿಗೆರೆ ಅತ್ತ್ ಆಂಡ ಸಂಪಾದನೆ ಮಲ್ತ್‌ದಿನವು ಪಂಡ್ದ್ ಆಪುಂಡು. 5ಆಂಡ ಏರೇ ಆವಡ್ ಎಡ್ಡೆ ಕ್ರಿಯೊಲೆನ್ ಮಲ್ತ್‌ದಿನಾಯೆ ಆದುಪ್ಪಂದೆ, ಪಾಪಿಲೆನ್ ನೀತಿವಂತೆ ಅಂದ್‌ದ್ ನಿರ್ಧಾರ ಮಲ್ಪುನಾಯಡ ನಂಬಿಕೆ ದೀಪೆನಾ, ಆಯನ ನಂಬಿಕೆನೇ ನೀತಿದವು ಪಂಡ್ದ್ ಲೆಖ್ಖೊಗು ಬರ್ಪುಂಡು. 6ದೇವೆರ್ ಏರೆನ್ ಎಡ್ಡೆ ಕ್ರಿಯೆದಾಂತೆ ನೀತಿವಂತೆ ಪಂಡ್ದ್ ಎನ್ನುವೆನಾ ಆಯೆ ಭಾಗ್ಯವಂತೆ ಪಂಡ್ದ್ ದಾವೀದೆಲಾ ಪನ್ಪೆ. 7ಎಂಚಂದ್ಂಡ, “ಏರೆನ ಅನ್ಯಾಯೊಲು ಬುಡುಗಡೆ ಆತ್ಂಡ, ಏರೆ ಪಾಪೊಲು ಪರಿಹಾರ ಆತ್ಂಡ ಅಕುಲೇ ಭಾಗ್ಯವಂತೆರ್. 8ಕರ್ತವೆ ಏರೆನ ಪಾಪೊಲೆನ್ ಲೆಖ್ಖೊಗು ದೆತ್ತೊನುಜೆನಾ ಆ ನರಮಾನಿಯೇ ಭಾಗ್ಯವಂತೆ.”

9ಈ ಪನ್ಪಿನವು ಸುನ್ನತಿದಾಕುಲೆಗ್ ಮಾತ್ರನಾ? ಸುನ್ನತಿದಾಂತಿನಾಕುಲೆಗ್ಲಾ ಆಪುಂಡಾ? ತೂಕ, ಅಬ್ರಹಾಮುನ ಲೆಖ್ಖೊಗು ಆಯನ ನಂಬಿಕೆನೇ ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್ ಪನ್ಪತ್ತಾ. 10ಉಂದು ಏಪ ಗೆನ್ತ್‌ದ್ಂಡ್? ಆಯಗ್ ಸುನ್ನತಿ ಆಯಿ ಬೊಕ್ಕನಾ? ಸುನ್ನತಿ ಆಪಿನೆಡ್ದ್ ದುಂಬಾ? ಸುನ್ನತಿ ಆಯಿ ಬೊಕ್ಕ ಅತ್ತ್. ಸುನ್ನತಿ ಆವೊಡ್ದುಂಬೇ ಗೆನ್ತ್‌ದ್ಂಡ್. 11ಐಡ್ದ್ ಬೊಕ್ಕ ಸುನ್ನತಿ ಪನ್ಪಿ ಸಂಸ್ಕಾರೊನು ಗುರ್ತ ಆದ್ ಪಡೆಯೆ. ಉಂದು ಸುನ್ನತಿ ಆವೊಡ್ದು ದುಂಬೇ ಆಯಗಿತ್ತಿನ ನಂಬಿಕೆದ ನೀತಿಗ್ ಗುರ್ತ ಆದಿತ್ತ್ಂಡ್. ಇಂಚಾದುಪ್ಪುನಗ ಆಯೆ ನಂಬುನಾಕುಲೆಗ್ ಮಾತೆರೆಗ್ಲಾ, ಅಕುಲು ಸುನ್ನತಿದಾಂತಿನಾಕುಲಾಂಡಲಾ, ಮೂಲಪಿತೃ ಆಯೆ, ಅಕುಲುಲಾ ನೀತಿವಂತೆರ್ ಅಂದ್‌ದ್ ಲೆಖ್ಖೊಗು ಬರುವೆರ್. 12ಉಂದತ್ತಂದೆ, ಸುನ್ನತಿದಾಕುಲೆಡ ಏರೇರ್ ಸುನ್ನತಿ ಪಡೆಯಿನಿ ಅತ್ತಂದೆ ನಮ ಪಿತೃ ಆಯಿ ಅಬ್ರಹಾಮುಗು ಸುನ್ನತಿ ಆವೊಡ್ದುಂಬು ಇತ್ತಿ ನಂಬಿಕೆದ ಹೆಜ್ಜೆಲೆನ್ ಪತ್ತೊಂದು ನಡಪುವೆರಾ ಅಕ್ಲೆಗ್ಲಾ ಮೂಲಪಿತೃಲೆ ಅಮ್ಮೆ ಆದುಲ್ಲೆ.

13ಈ ಲೋಕೊಗು ಹಕ್ಕ್‌ದಾಕುಲು ಆಪ ಪನ್ಪಿ ವಾಗ್ದಾನ ಅಬ್ರಹಾಮುಗಾವಡ್ ಆಯ ಸಂತಾನದಾಕುಲೆಗ್‌ಲಾವಡ್ ನ್ಯಾಯಕಟ್ಟ್‌ಡ್ದ್ ಆತಿನವು ಅತ್ತ್. ಆಂಡ ಆಯೆ ನಂಬಿಕೆ ದೀಯಿನೆನ್ ದೇವೆರ್ ಒಪ್ಪಿಯೊಂದು ಆಯನ್ ನೀತಿವಂತೆ ಪಂಡ್ದ್ ಮಲ್ತಿನೆಡ್ದೇ. 14ನ್ಯಾಯಕಟ್ಟ್‌ದಾಕುಲು ಹಕ್ಕ್‌ದಾರೆರಾದಿತ್ತ್‌ಂಡ, ನಂಬಿಕೆ ಪೊಕ್ಕಡೆಗಾಂಡ್. ವಾಗ್ದಾನೊಗು ವಾ ಬಿಲೆಲಾ ಇಜ್ಜಿ ಪಂಡ್ದಾಪುಂಡು. 15ದಾಯೆಗಂದ್ಂಡ ನ್ಯಾಯಕಟ್ಟ್ ಜನೊಕುಲೆನ್ ದೇವೆರೆ ಕೋಪೊಗು ಗುರಿ ಮಲ್ಪುನವು. ಆಂಡ ನ್ಯಾಯಕಟ್ಟ್ ಇಜ್ಜಾಂದಿನಲ್ಪ ಅವೆನ್ ಮೀರುನವುಲಾ ಇಜ್ಜಿ.

16ಅಂಚಾದ್ ವಾಗ್ದಾನ ನಂಬಿಕೆದ ಮಿತ್ತ್ ಆಧಾರ ಆದುಂಡು, ಆ ಹಕ್ಕ್ ದಯೊಡ್ದೇ ತಿಕ್ಕುನವು ಅಬ್ರಹಾಮುನ ಸಂತಾನದಾಕುಲೆಗ್ ಮಾತೆರೆಗ್ಲಾ ಈ ವಾಗ್ದಾನ ಸ್ಥಿರತ್ತವು ಆದುಂಡು. ನ್ಯಾಯಕಟ್ಟ್‌ನ್ ಆಧಾರ ಮಲ್ತೊಂಡಿನಾಕುಲೆಗ್ ಮಾತ್ರ ಅತ್ತಂದೆ, ಅಬ್ರಹಾಮುಡು ಇತ್ತಿನ ನಂಬಿಕೆ ಇತ್ತಿನಾಕುಲೆಗ್ಲಾ ಸ್ಥಿರೊಟ್ಟು ಉಂತುಂಡು. 17ಯಾನ್ ನಿನನ್ ದಿಂಜ ಜನಾಂಗೊಲೆಗ್ ಮೂಲಪಿತೃ ಆದ್ ನೇಮಕ ಮಲ್ತ್‌ದೆ ಪನ್ಪಿನೆನ್ ಶಾಸ್ತ್ರೊಡು ಬರೆತಿ ಪ್ರಕಾರ, ಅಬ್ರಹಾಮು ನಂಕ್ ಮಾತೆರೆಗ್ಲಾ ದೇವೆರೆ ದೃಷ್ಟಿಡ್ ಮೂಲಪಿತೃ ಆದುಲ್ಲೆ. ದೇವೆರ್ ಸೈತಿನಾಕುಲೆನ್ ಜೀವ ಮಲ್ಪುನಾಯೆ ಆದ್‌ಲಾ ಇಜ್ಜಾಂದಿನೆನ್ ಉಪ್ಪುಲೆಕ್ಕ ಲೆಪ್ಪುನಾಯೆ ಆದ್‌ಲಾ ಉಲ್ಲೆ ಅಂದ್‌ದ್ ಅಬ್ರಹಾಮು ನಂಬಿಯೆ. 18ನಿರೀಕ್ಷೆಗ್ ವಾ ಆಧಾರ ಇಜ್ಜಾಂಡಲಾ, ಅಬ್ರಹಾಮು ನಂಬುದು ನಿರೀಕ್ಷೆಡ್ ಕಾತೊಂದಿತ್ತೆ. ಅಂಚಾದ್ ಪಾಕ ಜನಾಂಗೊಲೆಗ್ ಅಮ್ಮೆ ಆಯೆ. ಶಾಸ್ತ್ರೊಡು ಪನ್ತ್ಂಡ್, “ನಿನ ಸಂತಾನ ಬಾನ ಬೊಳ್ಳಿದಾತ್ ಹೆಚ್ಚಾಪೆರ್.” 19ಆಯೆ ಹೆಚ್ಚಿಕಡಿಮೆ ನೂದು ವರ್ಸದಾಯೆ ಆದಿತ್ತ್‌ಂಡಲಾ, ತನ ಶರೀರ ಕುಂದುದಿತ್ತ್‌ಂಡಲಾ ಸಾರನ ಗರ್ಭ ಸೈತ್‌ದಿತ್ತ್‌ಂಡಲಾ ಆಯನ ನಂಬಿಕೆ ಕಡಿಮೆ ಆಯಿಜಿ. 20ಆಯನ ನಂಬಿಕೆ ಆಯನ್ ಬುಡ್ತುಜಿ. ಆಯೆ ದೇವೆರೆ ವಾಗ್ದಾನೊನು ಸಂಶಯ ಮಲ್ತ್‌ಜೆ. ಆಯನ ನಂಬಿಕೆ ಆಯಗ್ ಬಲ ಕೊರ್‌ಂಡ್; ಆಯೆ ದೇವೆರೆಗ್ ಮೈಮೆ ಕೊರಿಯೆ. 21ದೇವೆರ್ ತನ ವಾಗ್ದಾನೊಲೆನ್ ನಡಪಾವೆರೆಗ್ ಸಮರ್ಥೆ ಪಂಡ್ದ್ ಪೂರ್ತಿ ದೃಢ ನಂಬಿಕೆ ಇತ್ತಿನಾಯೆ ಆಯೆ 22ಅಂಚಾಯಿನೆಡ್ದ್ ಆ ನಂಬಿಕೆನೇ, “ಆಯನ ಲೆಖ್ಖೊಗು ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್.” 23ಆಂಡ ಅವು, “ಆಯನ ಲೆಖ್ಖೊಗು ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್,” ಪಂಡ್ದ್ ಪನ್ಪಿನೆನ್ ಆಯಗಾದ್ ಮಾತ್ರ ಅತ್ತಂದೆ ನಂಕಾದ್‌ಲಾ ಬರೆತ್ಂಡ್. 24ನಮ ಕರ್ತವೆ ಆದುಪ್ಪು ಯೇಸುನು ಜೀವೊಡು ಲಕ್ಕಾಯಿನ ದೇವೆರೆನ್ ನಂಬುನ ನಂಕ್‌ಲಾ ಆ ನಂಬಿಕೆ ನೀತಿದವು ಪಂಡ್ದ್ ಗೆನ್ಪುಂಡು. 25ದೇವೆರ್ ಆಯನ್ ನಮ ಅಪರಾಧೊಲೆಗಾದ್ ಮರಣೊಗು ಒಚ್ಚಿದ್ ಕೊರ್ದು ನಂಕ್ ನೀತಿವಂತೆರ್ ಇನ್ಪಿ ನಿರ್ಧಾರ ಉಂಡಾಪಿನೆಕ್ಕ್ ಜೀವೊಡು ಲಕ್ಕಾಯೆ.

Currently Selected:

ರೋಮಾಯೆರೆಗ್ 4: ತುಳು

Highlight

Copy