ರೋಮಾಯೆರೆಗ್ 3

1ಅಪಗ ಏರಾಂಡಲಾ ಇಂಚ ಕೇಂಡ: ಯೆಹೂದ್ಯೆರ್ ಆದುಪ್ಪುನಾಕುಲೆಗ್ ಎಂಚಿನ ಪ್ರಯೋಜನ ಉಂಡು? ಅಂಚೆನೇ, ಸುನ್ನತಿ ಆದುಪ್ಪುನಾಕುಲೆಗ್ಲಾ ಎಂಚಿನ ಲಾಭ ಉಂಡು? 2ಕಂಡಿತಾದ್‌ಲಾ ಮಸ್ತ್ ತರೊಟು ಉಂಡು. ದುಂಬತ್ತ ದೇವೆರ್ ತನ ಪಾತೆರೊಲೆನ್ ಯೆಹೂದ್ಯೆರೆ ವಶೊಕ್ಕು ಕೊರ್ತೆ. 3ಅಕ್ಲೆಡ ಕೆಲೆವೆರ್ ದೇವೆರ್ ಪಂಡಿನೆನ್ ನಂಬಿಜಾಂಡ ದಾನೆ ಆಂಡ್? ದೇವೆರ್ ನಂಬಿಗಸ್ತೆ ಆದುಪ್ಪುಜೆ ಪಂಡ್ದ್ ನೆತ್ತ ಅರ್ಥನಾ? ಕಂಡಿತಾ ಅತ್ತ್. 4ಮಾತ ನರಮಾನಿಲು ಸುಳ್ಳುಗಾರೆರಾಂಡಲಾ ದೇವೆರ್ ಸತ್ಯವಂತೆನೇ ಸರಿ,

“ನಿನ ಮಾತ ಪಾತೆರೊಡುಲಾ ಈ ನೀತಿವಂತಲೆಕ್ಕ ತೋಜಿದ್ ಬರೊಡು;

ನಿನ ಮಿತ್ತ್ ವ್ಯಾಜ್ಯ ನಡಪುನಗ ಈ ಗೆಂದೊಡು,” ಪಂಡ್ದ್ ಬರೆತ್ಂಡ್.

5ನಮ ನೀತಿ ತತ್ತ್‌ದ್ ನಡಪುಡುನೆಡ್ದಾದ್; ದೇವೆರೆಡುಪ್ಪು ನೀತಿ ತೋಜಿದ್ ಬರ್ಪಿನಾಂಡ ನಮ ದಾನೆ ಪನ್ಕ? ದೇವೆರ್ ನಮನ್ ಶಿಕ್ಷೆ ಕೊರ್ನಗ ಆಯೆ ಅನ್ಯಾಯ ಮಲ್ಪುವೆ ಪಂಡ್ದ್ ನಮ ಪನೊಲಿಯಾ (ಉಂದು ಸ್ವಾಭಾವಿಕ ಆದ್ ಬರ್ಪಿನ ಪ್ರಶ್ನೆನೇ) 6ಕಂಡಿತಾ ಅತ್ತ್. ದೇವೆರ್ ನ್ಯಾಯವಂತೆ ಅತ್ತ್‌ಡ, ಆಯೆ ಲೋಕೊಗು ನ್ಯಾಯತೀರ್ಪುನು ಎಂಚ?

7ಎನ ಸುಳ್ಳುಡ್ದ್ ದೇವೆರೆ ಸತ್ಯ ತೋಜಿದ್ ಬತ್ತ್‌ದ್ ಆಯನ ಮೈಮೆ ಹೆಚ್ಚಾಂಡ ಎಂಕ್ ನನಲಾ ಪಾಪಿ ಪಂಡ್ದ್ ದಾಯೆಗ್ ತೀರ್ಪು ಆವೊಡು? 8ಇಜ್ಜಿಡ, “ಎಡ್ಡೆಂತಿನವು ಆಪಿನೆಕ್ಕಾದ್ರ ಪಡಿಕೆಂತಿನೆನ್ ಮಲ್ಪುಗ,” ಪಂಡ್ದ್ ದಾಯೆ ಪನಿಯೆರೆ ಬಲ್ಲಿ? ಕೆಲೆವೆರ್ ಎಂಕ್ಲೆನ ವಿಷಯೊಡು ಮೊಕುಲು ಇಂಚ ಬೋಧನೆ ಮಲ್ಪುನಾಕುಲು ಪಂಡ್ದ್ ದೂರುವೆರತ್ತಾ, ಅಂಚಿತ್ತಿನಾಕುಲೆಗ್ ಶಿಕ್ಷೆದ ತೀರ್ಪು ಆಪಿನವು ನ್ಯಾಯ.

ನರಮಾನಿಲು ಮಾತೆರ್ಲಾ ಪಾಪಿಲೇ ಪನ್ಪಿನ ದೇವೆರೆ ಪಾತೆರ

9ಅಪಗಾಂಡ ದಾನೆ ಪನೊಡು? ನಮ ಪಿದಯಿದ ಜನೊಕುಲೆಡ್ದ್ ಎಡ್ಡೆ ಸ್ಥಾನೊಡು ಉಲ್ಲನಾ? ಏತ್ ಮಾತ್ರೊಗ್ಲಾ ಇಜ್ಜಿ. ಯೆಹೂದ್ಯೆರೇ ಆವಡ್, ಗ್ರೀಕೆರೇ ಆವಡ್ ಮಾತೆರ್ಲಾ ಪಾಪೊಗು ಸೇರ್ದುಲ್ಲೆರ್ ಅಂದ್‌ದ್ ಸುರುಟ್ಟೇ ತೋಜಾದ್ ಕೊರ್ತತ್ತಾ.

10ಉಂದು ಶಾಸ್ತ್ರೊಡು ಬರೆತಿ ಪಾತೆರೊಲೆಗ್ ಸರಿಯಾದುಂಡು, ಅವು ದಾನೆಂದ್ಂಡ

“ನೀತಿವಂತೆ ಇಜ್ಜೆ ಒರಿಲಾ ಇಜ್ಜೆ

11ತೆರಿದಿನಾಯೆಲಾ ಇಜ್ಜೆ. ದೇವೆರೆನ್ ನಾಡುನಾಯೆಲಾ ಇಜ್ಜೆ.

12ಮಾತೆರ್ಲಾ ಸಾದಿ ತತ್ತ್‌ದ್ ನಡಪುವೆರ್. ಮಾತೆರ್ಲಾ ಕೆಲಸೊಗು ಬರಂದಿನಾಕುಲಾದುಲ್ಲೆರ್.

ಎಡ್ಡೆಂತಿನೆನ್ ಮಲ್ಪುನಾಯೆ ಒರಿಲಾ ಇಜ್ಜೆ.

13ಅಕ್ಲೆನ ದೊಂಡೆ ಜತ್ತ್‌ದಿ ಸಮಾಧಿ ಆತ್ಂಡ್. ಅಕುಲು ನಾಲಯಿಡ್ದ್ ವಂಚನೆದ ಪಾತೆರೊಲೆನ್ ಪಾತೆರ್‌ವೆರ್. ಅಕ್ಲೆನ ಬಿಂಬದ ಪಿರವುಡು ಸರ್ಪದ ವಿಷ ಉಂಡು.

14ಅಕ್ಲೆನ ಬಾಯಿ ಶಾಪೊಡ್ದುಲಾ ಕೋಪದ ಪಾತೆರೊಡ್ದುಲಾ ದಿಂಜಿದುಂಡು.

15ಅಕ್ಲೆನ ಕಾರ್ ನೆತ್ತೆರ್ ಗುಪ್ಪೆರೆ ಅಮಸರ ಮಲ್ಪುಂಡು.

16ಅಕುಲು ಪೋಯಿ ಸಾದಿಲೆಡ್ ನಾಶನಲಾ ಸಂಕಟಲಾ ಉಂಡಾಪುಂಡು.

17ಸಮಾಧಾನದ ಸಾದಿ ಅಕ್ಲೆಗ್ ತೆರಿಯಂದ್.

18ಅಕ್ಲೆನ ಕಣ್ಣೆದುರುಡು ದೇವೆರೆ ಪೋಡಿಗೆನೇ ಇಜ್ಜಿ ಇನ್ಪಿನವೇ.”

19ನ್ಯಾಯಕಟ್ಟ್‌ದ ಮಾತ ಪಾತೆರೊಲುಲಾ ಆ ಶಾಸ್ತ್ರೊಗು ಒಳಗಾಯಿನಾಕುಲೆಗೇ ಪನ್ತ್ಂಡ್ ಪಂಡ್ದ್ ತೆರಿದತ್ತಾ, ಇಂಚ ಮಾತೆರೆ ಬಾಯಿ ಕಟ್ಟ್‌ದ್ ಪೋಪುಂಡು. ಲೋಕ ಇಡೀ ದೇವೆರೆ ಎದುರುಡು ಅಪರಾಧಿ ಆದ್ ಉಂತುಂಡು. 20ದಾಯೆಗಂದ್ಂಡ ವಾ ನರಮಾನಿಲಾ ನ್ಯಾಯಕಟ್ಟ್‌ದ ಪ್ರಕಾರ ನಡಪುನೆಡ್ದ್ ದೇವೆರೆ ಸನ್ನಿಧಾನೊಡು ನೀತಿವಂತೆ ಅಂದ್‌ದ್ ತೀರ್ಪು ಆಪುಜಿ. ನ್ಯಾಯಕಟ್ಟ್‌ಡ್ದ್ ಪಾಪದ ತಿಳುವಳಿಕೆ ಗೊತ್ತಾಪುಂಡು.

ನಂಬಿಕೆಡ್ದ್ ನೀತಿವಂತೆರಾಪಿನವು

21ಇತ್ತೆ ಆಂಡಲಾ ದೇವೆರೆಡ್ದ್ ತಿಕ್ಕುನ ನೀತಿ ನ್ಯಾಯಕಟ್ಟ್‌ದ ನಿಯಮೊಲುದಾಂತೆ ಬೊಲ್ಪುಗು ಬೈದ್‌ಂಡ್. ಅವು ನ್ಯಾಯಕಟ್ಟ್‌ಡ್ದ್‌ಲಾ ಪ್ರವಾದಿಲೆ ಪಾತೆರೊಡ್ದುಲಾ ಸಾಕ್ಷಿನ್ ಪಡೆದುಂಡು. 22ದೇವೆರೆಡ್ದ್ ಆಪಿ ಆ ನೀತಿ ಒವ್ವು ಅಂದ್ಂಡ ಯೇಸು ಕ್ರಿಸ್ತನ್ ನಂಬುನೆಡ್ದೇ, ನಂಬುನಾಕುಲೆಗ್ ಮಾತೆರೆಗ್ಲಾ ವ್ಯತ್ಯಾಸದಾಂತೆ ತಿಕ್ಕುನವು ಆದುಂಡು. 23ದಾಯೆಗಂದ್ಂಡ ಮಾತೆರ್ಲಾ ಪಾಪ ಮಲ್ತ್‌ದ್ ದೇವೆರೆ ಮೈಮೆಡ್ದ್ ದೂರ ಪೋತೆರ್. 24ಆಂಡ ದೇವೆರೆ ಧರ್ಮಾರ್ಥ ದಯೊಡ್ದಾದ್, ಯೇಸು ಕ್ರಿಸ್ತಡ್ದ್ ನೀತಿವಂತೆರ್ ಅಂದ್‌ದ್ ತೀರ್ಪು ಆಪುಂಡು, ಕ್ರಿಸ್ತೆ ಅಕ್ಲೆನ್ ಬುಡುಗಡೆ ಮಲ್ಪುವೆ. 25-26ಉಂಬೆ ತನ ನೆತ್ತೆರ್‌ನ್ ಗುತ್ತುದು ನಂಬಿಕೆ ಇತ್ತಿನಾಕುಲೆಗಾದ್ ಪಾಪ ಮಾಪು ಆವೊಡು ಅಂದ್‌ದ್ ದೇವೆರ್ ಉಂಬ್ಯನ್ ಎದುರು ದೀಯೆರ್. ದೇವೆರ್ ಪಿರಾಕ್‌ದ ಪಾಪೊಲೆಗ್ ಶಿಕ್ಷೆ ಕೊರಂದೆ, ಸಹಿಸೊಂದಿನೆಡ್ದ್ ತನ ನೀತಿನ್ ಇತ್ತೆದ ಕಾಲೊಡು ಇಂಚ ತೋಜಾದ್ ತಾನ್ ನೀತಿಸ್ವರೂಪಿ ಆದ್‌ಲಾ ಯೇಸುಡ ನಂಬಿಕೆ ದೀಪಿನಾಕುಲೆನ್ ನೀತಿವಂತೆರ್ ಅಂದ್‌ದ್ ನಿರ್ಧಾರ ಮಲ್ಪುನಾಯೆ ಆದ್‌ಲಾ ತೋಜಾವೊಂಡೆ.

27ಅಂಚಾಂಡ ಪುಗರೊನಿಯೆರೆ ಇಡೆ ಓಲು? ಅವು ಇಜ್ಜಾಂದೆ ಪೋಂಡು. ವಾ ನ್ಯಾಯಕಟ್ಟ್‌ಡ್ದ್? ಕ್ರಿಯೊಲೆನ್ ಕೈಕೊನುನೆಡ್ದಾ? ಅತ್ತ್, ನಂಬಿಕೆದ ಮಾರ್ಗೊನು ಕೈಕೊನುನೆಡ್ದೇ. 28ನರಮಾನಿಲು ನ್ಯಾಯಕಟ್ಟ್‌ದ ಕ್ರಿಯೊಲುದಾಂತೆ ನಂಬಿಕೆಡ್ದೇ ನೀತಿವಂತೆರಂದ್‌ದ್ ನಿರ್ಧಾರ ಮಲ್ಪುನಾಯೆ ಆದ್ ತೋಜಾವೊಂಡೆ. 29ದೇವೆರ್ ಯೆಹೂದ್ಯೆರೆಗ್ ಮಾತ್ರ ದೇವೆರಾದುಲ್ಲೆನಾ? ಪಿದಯಿದ ಜನೊಕುಲೆಗ್ಲಾ ದೇವೆರ್ ಅತ್ತಾ? 30ಅಂದ್, ದೇವೆರ್ ಒರಿಯೇ ಆದಿತ್ತ್‌ದ್ ಆಯೆ ಪಿದಯಿದ ಜನೊಕುಲೆಗ್ಲಾ ದೇವೆರಾದುಲ್ಲೆ. ಆಯೆ ಸುನ್ನತಿದಾಕುಲೆನ್ ನೀತಿವಂತೆರ್ ಪಂಡ್ದ್ ನಿರ್ಧಾರ ಮಲ್ಪೆರೆ ಅಕ್ಲೆನ ನಂಬಿಕೆನೇ ಆಧಾರ. ಸುನ್ನತಿದಾಂತಿನಾಕುಲೆನ್ಲಾ ನಿರ್ಧಾರ ಮಲ್ಪೆರೆ ನಂಬಿಕೆನೇ ಕಾರಣ. 31ಅಂಚಾಂಡ ನಂಬಿಕೆಡ್ದ್ ನ್ಯಾಯಕಟ್ಟ್‌ನ್ ಅರ್ಥದಾಂತಿನವು ಮಲ್ಪುವನಾ? ಏಪೊಗ್ಲಾ ಇಜ್ಜಿ. ನ್ಯಾಯಕಟ್ಟ್‌ನ್ ದೃಢವಾದ್ ಪತ್ತುವ.

Currently Selected:

ರೋಮಾಯೆರೆಗ್ 3: ತುಳು

Highlight

Copy