ರೋಮಾಯೆರೆಗ್ 5

ನಂಬುನಾಕುಲೆಗ್ ರಕ್ಷಣೆ ತಪ್ಪಂದ್

1ಅಂಚಾಂಡ ನಂಬಿಕೆಡ್ದ್ ನೀತಿವಂತೆರ್ ಅಂದ್‌ದ್ ತೀರ್ಪು ಆಯಿ ನಂಕ್, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ದೇವೆರೆಡೊಪ್ಪ ಸಮಾಧಾನ ಉಂಡು. 2ಎಂಕ್ಲೆನ ನಂಬಿಕೆಡ್ದ್ ಈ ಪೊಸ ಜೀವನದ ಅನುಭವೊನು ಆಯನ ದಯೊಡ್ದು ಆಯಡ್ದ್ ಪಡೆಯೊಂಡ. ಅವೆನ್ ಎಂಕುಲು ಪುಗರ್‌ನಗ ಎಂಕ್ಲೆಗ್ ದೇವೆರೆ ಮೈಮೆಡ್ ಪಾಲ್‌ದಾರೆರಾಪಿನ ನಿರೀಕ್ಷೆ ಉಂಡಾಪುಂಡು 3ಉಂದು ಮಾತ್ರ ಅತ್ತಂದೆ ನಂಕ್ ಉಂಡಾಪಿ ಉಪದ್ರೊಲೆಡ್ಲಾ ಸಂತೋಷೊಡು ಉಲ್ಲ. 4ದಾಯೆ ಪಂಡ ಉಪದ್ರೊಡ್ದು ತಾಳ್ಮೆ ಪುಟ್ಟುಂಡು. ತಾಳ್ಮೆಡ್ದ್ ಜಯತ ಅನುಭವ ಪುಟ್ಟುಂಡು. ಅನುಭವೊಡ್ದು ನಿರೀಕ್ಷೆ ಪುಟ್ಟುಂಡು ಅಂದ್‌ದ್ ನಮ ತೆರಿದ. 5ಈ ನಿರೀಕ್ಷೆ ನಮಡ್ ನಿರಾಶೆ ಉಂಡು ಮಲ್ಪುಜಿ. ದಾಯೆಗಂದ್ಂಡ ನಂಕ್ ಕೊರ್ತಿನ ಪರಿಶುದ್ಧಾತ್ಮೊಡ್ದು ದೇವೆರ್ ತನ ಪ್ರೀತಿನ್ ನಮ ಉಡಲ್‌ಡ್ ಮೈತ್‌ದ್ ಕೊರ್ತೆ.

6ನಮ ಬಲದಾಂತಿನಾಕುಲು ಆದುಪ್ಪುನಗನೇ ನೇಮಕ ಆತಿ ಕಾಲೊಡು ಭಕ್ತಿದಾಂತಿನಾಕುಲೆಗಾದ್ ಯೇಸು ಕ್ರಿಸ್ತೆ ತನ ಪ್ರಾಣೊನೇ ಕೊರಿಯೆ. 7ನೀತಿವಂತೆರೆಗಾದ್ ಏರಾಂಡಲಾ ಪ್ರಾಣ ಕೊರ್ಪಿನವು ಅಪರೂಪ. ಉಪಕಾರ ಮಲ್ಪುನಾಯಗಾದ್ ಪ್ರಾಣ ಕೊರಿಯೆರೆ ಏರಾಂಡಲಾ ಧೈರ್ಯ ಮಲ್ತೆಡಲಾ ಮಲ್ಪೆ. 8ಆಂಡ ನಮ ಪಾಪಿಲಾದುಪ್ಪುನಗಲಾ ಕ್ರಿಸ್ತೆ ನಂಕಾದ್ ಪ್ರಾಣ ಕೊರಿನೆಟ್ಟ್ ದೇವೆರ್ ನಮ ಮಿತ್ತ್ ತನ್ಕ್ ಉಪ್ಪು ಪ್ರೀತಿನ್ ತೋಜಾದ್ ಕೊರ್ತೆ. 9ಇತ್ತೆ ನಮ ಆಯನ ನೆತ್ತೆರೆಡ್ದಾದ್ ನೀತಿವಂತೆರ್ ಅಂದ್‌ದ್ ತೀರ್ಪು ಆಯಿನೆಡ್ದ್ ದೇವೆರೆಡ್ದ್ ಬರ್ಪಿ ಕೋಪೊಡ್ದು ನಮನ್ ತಪ್ಪಾವೆ ಪನ್ಪಿನವು ಏತೋ ಸತ್ಯ ಆದುಂಡು. 10ನಮ ನಂಬುನೆಡ್ದ್ ದುಂಬು ದೇವೆರೆ ವೈರಿಲಾದಿತ್ತ. ಆಯನ ಮಗನ ಮರಣೊನು ನಂಬಿನೆಡ್ದ್ ನಮನ್ ಆಯಡೊಪ್ಪ ಸಂದಾನ ಮಲ್ತ್‌ದ್ ಸ್ನೇಹಿತೆರಾದ್‌ ಮಲ್ತೆ. ಇತ್ತೆ ದೇವೆರೆ ಸ್ನೇಹಿತೆರಾದುಪ್ಪುನ ಕ್ರಿಸ್ತನ ಜೀವನೊಡ್ದು ರಕ್ಷಣೆ ಪಡೆಯುನವು ಏತೋ ಸತ್ಯ ಆದುಂಡು. 11ಈತ್ ಮಾತ್ರ ಅತ್ತ್; ಯೇಸು ಕ್ರಿಸ್ತಡ್ದ್ ಸಂದಾನ ಪಡೆದ್ ಮಾತ ಸಂಗತಿಲೆಡ್ ನಮ ದೇವೆರೆ ಸ್ನೇಹಿತೆರಾಯಿನೆಡ್ದ್ ಸಂತೋಷ ಮಲ್ಪುವ.

ಆದಾಮುಡ್ದ್ ಮರಣ ಕ್ರಿಸ್ತಡ್ದ್ ರಕ್ಷಣೆ

12ಈ ಸಂಗತಿ ದಾನೆಂದ್ಂಡ, ಒಂಜಿ ನರಮಾನಿಡ್ಡೇ ಪಾಪಲಾ ಪಾಪೊಡ್ದು ಮರಣಲಾ ಲೋಕದುಲಯಿ ಸೇರ್ದ್ಂಡ್. ಆದಾಮುಡ್ದಾದ್ ಪಾಪ ಈ ಲೋಕೊಗು ಸೇರ್‌ಂಡ್. ಮಾತೆರ್ ಪಾಪ ಮಲ್ತಿನೆಡ್ದ್ ಮರಣ ಮಾತೆರೆ ಉಲಯಿ ಬತ್ತ್ಂಡ್. 13ನ್ಯಾಯಕಟ್ಟ್ ಉಂಡಾಯಿನೆಡ್ದ್ ದುಂಬೇ ಪಾಪ ಲೋಕೊಡಿತ್ತ್‌ಂಡ್. ಆಂಡ ನ್ಯಾಯಕಟ್ಟ್ ಇಜ್ಜಾಂದೆ ಉಪ್ಪುನಗ ಪಾಪ ಲೆಖ್ಖೊಗು ಬರ್ಪುಜಿ. 14ಆಂಡಲಾ ಆದಾಮುನ ಕಾಲೊಡ್ದು ಮೋಶೆನ ಕಾಲ ಮುಟ್ಟಲಾ ಮರಣ ಆಳೊಂದಿತ್ತ್‌ಂಡ್. ಆದಾಮು ದೇವೆರೆ ಅಪ್ಪಣೆನ್ ಮೀರ್‌ದ್ ಮಲ್ತಿ ಪಾಪೊಗು ಸಮಾನ ಆದುಪ್ಪು ಪಾಪೊನು ಮಲ್ಪಂದೆ ಇತ್ತಿನಾಕುಲೆನ ಮಿತ್ತ್‌ಲಾ ಅವು ನಡತೊಂದಿತ್ತ್‌ಂಡ್. ಆ ಆದಾಮೆ ಬರೊಡಾಯಿ ಒರಿಯಗ್ ತೋಜಿದ್ ಬರ್ಪಿ ನರಮಾನಿ ಆದುಲ್ಲೆ. 15ಆಂಡ ಆ ಅಪರಾಧದ ಸಂಗತಿಗ್ಲಾ ದೇವೆರೆ ದಯತ ದಾನದ ಸಂಗತಿಗ್ಲಾ ಬಾರೀ ಹೆಚ್ಚಿಕಡಿಮೆ ಉಂಡು. ಎಂಚಂದ್ಂಡ ಆ ಒರಿಯನ ಅಪರಾಧೊಡ್ದು ಮಾತ ನರಮಾನಿಲು ಸೈತಿನವು ನಿಜ ಅಂದ್‌ದ್ ಆಂಡ, ದೇವೆರೆ ದಯೆಲಾ ಯೇಸು ಕ್ರಿಸ್ತೆ ಪನ್ಪಿ ಈ ಒರಿ ನರಮಾನಿನ ದಯೊಡ್ದು ತಿಕ್ಕುನ ವರಲಾ ಮಾತ ನರಮಾನಿಲೆಗ್ ಧಾರಾಳವಾದ್ ತಯಾರ್ ಉಂಡು ಪನ್ಪಿನವು ನಿಜ ಅತ್ತಾ? 16ಉಂದತ್ತಂದೆ ಪಾಪ ಮಲ್ತಿನ ಒರಿಯಡ್ದೇ ಬೊಡ್ಚಾಂದಿನ ಫಲ ಬತ್ತಿಲೆಕ್ಕ ಈ ವರ ಬೈದಿಜಿ. ಎಂಚಂದ್ಂಡ ಒರಿಯೇ ನರಮಾನಿನ ಪಾಪದ ದಿಸೆಡ್ದ್ ಸೈಯೊಡು ಪನ್ಪಿ ನಿರ್ಧಾರ ಉಂಡಾಂಡ್. ಆಂಡ ದೇವೆರೆ ದಯತ ದಾನಲಾ ಮಸ್ತ್ ಜನೊಕುಲೆ ಅಪರಾಧದ ಕಾರಣೊಡ್ದು ಉಂಡಾದ್ ಅಕ್ಲೆನ್ ನೀತಿವಂತೆರ್ ಅಂದ್‌ದ್ ನಿರ್ಧಾರ ಮಲ್ಪುನವು ಆದುಂಡು. 17ಒರಿ ನರಮಾನಿನ ಪಾಪೊಡ್ದಾದ್ ಮರಣೊಗು ಅಧಿಕಾರ ಬತ್ತ್ಂಡ್ ಪನ್ಪಿನವು ಸತ್ಯನೇ. ದೇವೆರ್ ಧಾರಾಳವಾದ್ ಅನುಗ್ರಹ ಮಲ್ಪುನ ದಯೆ ದಾನೊಲೆನ್ಲಾ ನೀತಿದವು ಪನ್ಪಿ ವರೊನ್ಲಾ ಪಡೆಯಿನಾಕುಲು ಯೇಸು ಕ್ರಿಸ್ತೆ ಪನ್ಪಿ ಒರಿ ನರಮಾನಿಡ್ದ್ ಜೀವೊಡಿತ್ತ್‌ದ್ ಆಳುನವು ಬೊಕ್ಕಲಾ ನಿಜ ಅತ್ತಾ?

18ಇಂಚ ಉಪ್ಪುನಗ ಒಂಜೇ ಅಪರಾಧೊಡ್ದು ಮಾತ ನರಮಾನಿಲೆಗ್ ಸೈಯೊಡು ಪನ್ಪಿ ನಿರ್ಧಾರ ಎಂಚ ಉಂಡಾಂಡ ಅಂಚೆನೇ ಒಂಜೇ ಎಡ್ಡೆ ಕಾರ್ಯೊಡ್ದು ಮಾತ ನರಮಾನಿಲೆಗ್ ನೀತಿವಂತೆರ್ ಪನ್ಪಿ ನಿರ್ಧಾರ ಉಂಡಾದ್ ಜೀವೊನು ಉಂಡು ಮಲ್ಪುಂಡು. 19ಒರಿಯನ ತಿರಸ್ಕಾರೊಡ್ದು ಮಾತೆರ್ಲಾ ಪಾಪಿಲು ಆಯೆರಾ ಅಂಚೆನೇ ಒರಿಯನ ಎಡ್ಡೆ ಮನಸ್‌ಡ್ದ್ ಮಾತೆರ್ಲಾ ನೀತಿವಂತೆರಾಪೆರ್.

20ಅಪರಾಧೊಲು ಹೆಚ್ಚಾದ್ ತೋಜಿದ್ ಬರ್ಪಿಲೆಕ್ಕ ನ್ಯಾಯಕಟ್ಟ್ ನಡುಟು ಬತ್ತ್ಂಡ್. ಆಂಡ ಪಾಪ ಹೆಚ್ಚಿನಂಚೆನೇ ದೇವೆರೆ ದಯೆಲಾ ಹೆಚ್ಚಾದ್ ಬಲ ಆಂಡ್. 21ಅಂಚಾಂಡ ಪಾಪೊಡ್ದು ಮರಣ ಆಳುನಾಂಡ ದೇವೆರೆ ದಯೊಡ್ದು ನೀತಿ ಆಳುಂಡು, ನಮನ್ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ನಿತ್ಯಜೀವೊಗು ನಡಪುಡುಂಡು.

Currently Selected:

ರೋಮಾಯೆರೆಗ್ 5: ತುಳು

Highlight

Copy