ರೋಮಾಯೆರೆಗ್ 15
15
1ನಂಬಿಕೆಡ್ ಬಲ ಇತ್ತಿನಾಕುಲು ನಮ, ಬಲದಾಂತಿನಾಕುಲೆ ದುನ್ನೊನು ತುಂಬೊನಿಯೆರೆಗ್ ಕೈ ಕೊರೊಡು. ನಮನೇ ನಮನ್ ಮೆಚ್ಚಾವೊನಿಯೆರೆ ಬಲ್ಲಿ. 2ಐತ ಪಗತೆಗ್ ನಮಡ್ ಪ್ರತಿ ಒರಿ ತನ ನಿರೆತಾಯನ್ ಎಡ್ಡೆಗಾದ್‌ಲಾ ನಂಬಿಕೆಡ್ ಬಲಪಡೆಪಾವುನೆಕ್ಕಾದ್‌ಲಾ ಮೆಚ್ಚಾವಡ್. 3ದಾಯೆಗಂದ್ಂಡ, ಕ್ರಿಸ್ತೆಲಾ ತನನ್ ತಾನೇ ಮೆಚ್ಚಾವೊನುಜೆ. ಬದಲ್‌ಗ್ ಶಾಸ್ತ್ರೊಡು ಬರೆತಿಲೆಕ್ಕ “ನಿನನ್ ದೂಷಿಯುನಾಕುಲೆನ ದೂಷಣೆಲು ಮಾತ ಎನ ಮಿತ್ತ್ ಬೂರ್‌ಂಡ್.” 4ದುಂಬು ಶಾಸ್ತ್ರೊಡು ಬರೆತಿನವು ಪ್ರತಿಯೊಂಜಿ ನಮ ಬೋಧನೆಗಾದ್ ಬರೆತ್ಂಡ್. ನಮ ಓದುದು ಅವ್ವೆಡ್ದ್ ನಂಕ್ ಸ್ಥಿರ ಮನಸ್‌ಲಾ, ತಾಳ್ಮೆಲಾ ಉಮೇದ್‌ಲಾ ಪಡೆದ್ ನಿರೀಕ್ಷೆದಾಕುಲು ಆದುಪ್ಪುಲೆಕ್ಕ ಆ ಗ್ರಂಥೊನು ಬರೆತ್ಂಡ್. 5ಕ್ರಿಸ್ತ ಯೇಸುನ ಮಾದ್ರಿನ್ ಅನುಕರಣೆ ಮಲ್ಪುನೆಡ್ದ್ ನಿಕ್ಲೆಗ್ಲಾ ಸಮ್ಮಂಧೊಡು ಉಪ್ಪೆರೆ ದೇವೆರ್ ಅವ್ವೇ ರೀತಿದ ತಾಳ್ಮೆನ್ಲಾ ಉಮೇದ್‌ನ್ಲಾ ಕೊರಡ್. 6ಅಪಗ ನಿಕುಲು ಮಾತೆರ್ಲಾ ಒಟ್ಟಾದ್ ಒಂಜೇ ಸ್ವರೊಟ್ಟು ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಅಮ್ಮೆಲಾ ದೇವೆರ್‌ಲಾ ಆದುಪ್ಪುನಾಯನ್ ಪುಗರುವರ್.
7ಅಂಚಾಂಡ ಕ್ರಿಸ್ತೆ ನಿಕ್ಲೆನ್ ಸೇರಾವೊಂಡಿಲೆಕ್ಕನೇ ದೇವೆರೆ ಮೈಮೆಗಾದ್ ಒರಿಯನ್ ಒರಿ ಸೇರಾವೊನ್ಲೆ. 8ಯಾನ್ ಪನ್ಪಿನಿ ದಾನೆಂದ್ಂಡ, ಕ್ರಿಸ್ತೆ ಯೆಹೂದ್ಯೆರೆಗ್ ಸೇವಕೆ ಆದ್ ಅಕ್ಲೆ ಮೂಲ ಪಿತೃಲೆಗ್ ಮಲ್ತ್‌ದಿನ ವಾಗ್ದಾನೊಲೆನ್ ದೃಢ ಮಲ್ತ್‌ದ್ ದೇವೆರೆ ಸತ್ಯೊನು ತೋಜಾವೆರೆಗಾದ್ ಸುನ್ನತಿ ಇನ್ಪಿ ಸಂಸ್ಕಾರೊಗು ಒಳಗಾಯೆ. 9ದೇವೆರೆ ದಯೊಡ್ದು ಪಿದಯಿದ ಜನೊಕುಲೆ ನಡುಟು ದೇವೆರೆನ್ ಪುಗರಿಯೆರೆ ಅವಕಾಸ ಆಂಡ್. ಶಾಸ್ತ್ರೊಡು ಬರೆತಿನಿ ದಾನೆ ಪಂಡ್ಂಡ,
“ಉಂದೆಡ್ದಾದ್ ಪಿದಯಿದ ಜನೊಕುಲೆ ನಡುಟು ಯಾನ್ ನಿನನ್ ಪುಗರುವೆ;
ನಿನ ಪುದರ್‌ಗ್ ರಾಗ ಮಲ್ಪುವೆ!”
10ಕುಡ ಇಂಚ ಬರೆತ್ಂಡ್
“ಮಾತ ಪಿದಯಿದ ಜನೊಕುಲೇ, ದೇವಜನೊಕುಲೆ ಒಟ್ಟುಗು ಉಲ್ಲಾಸ ಮಲ್ಪುಲೆ.”
11ಬೊಕ್ಕೊಂಜಿ ಜಾಗ್‌ಡ್
“ಜನಾಂಗದ ಮಾತ ಜನೊಕುಲೇ ಕರ್ತವನ್ ಕೀರ್ತಿಪುಲೆ;
ಮಾತ ಪ್ರಜೆಕುಲುಲಾ ಆಯನ್ ಪುಗರಡ್!”
ಪಂಡ್ದ್‌ಲಾ ಬರೆತ್ಂಡ್.
12ಬೊಕ್ಕ ಯೆಶಾಯೆ ಬರೆತೆ,
“ಇಸ್ಸಾಯನ ಮೂಲದಾಯೆ ಒರಿ ತೋಜಿದ್ ಬರ್ಪೆ.
ಆಯೆ ಪಿದಯಿದ ಜನೊಕುಲೆನ್ ಆಳೆರೆಗಾದ್ ಬರ್ಪೆ.
ಅಕುಲು ಆಯ ಮಿತ್ತ್ ತನ್ಕುಲೆ ನಿರೀಕ್ಷೆನ್ ದೀಪೆರ್.”
13ನಿರೀಕ್ಷೆಗ್ ಮೂಲ ಆದುಪ್ಪು ದೇವೆರ್, ನಿಕುಲು ಆಯ ಮಿತ್ತ್ ದೀತಿನ ನಂಬಿಕೆಡ್ದ್ ಮಾತೆರೆನ್ಲಾ ಸಂತೋಷ, ಸಮಾಧಾನೊಲೆಡ್ ದಿಂಜಾದ್ ನಿಕ್ಲೆ ನಿರೀಕ್ಷೆ ಪರಿಶುದ್ಧಾತ್ಮನ ಬಲೊಡ್ದು ಬುಲೆವೊಂದು ಉಪ್ಪುಲೆಕ್ಕ ಸಹಾಯ ಮಲ್ಪಡ್.
ಪೌಲು ಧೈರ್ಯೊಡು ಕಾಕಜಿ ಬರೆಪಿನ ಕಾರಣೊಲು.
14ಎನ ಸಹೋದ್ರೆರೇ, ನಿಕುಲು ಎಡ್ಡೆತನೊಡ್ದು ದಿಂಜಿದಿನಾಕುಲಾದ್ ಮಾತ ಗೇನೊನು ಪಡೆವೊಂದಿನಾಕುಲಾದ್ ಒರಿ ಒರಿಯಗ್ ಕಲ್ಪಾವೆರೆಗ್ ತಕ್ಕದಾಕುಲಾದುಲ್ಲರ್ ಅಂದ್‌ದ್ ಎಂಕ್ ಭರವಸ ಉಂಡು. 15ದೇವೆರ್ ಎಂಕ್ ಕೊರ್ತಿ ದಯೊಕಾದ್ ಒಂತೆದೆಟ್ ನೆನೆಪು ಪುಟ್ಟಾದ್ ಯಾನ್ ನಿಕ್ಲೆಗ್ ಮಸ್ತ್ ಸಂಗತಿಲೆನ್ ಧೈರ್ಯಾದ್ ಬರೆತೆ. 16ಪಿದಯಿದ ಜನೊಕುಲೆಗಾದ್ ಬೇಲೆ ಮಲ್ಪೆರೆ, ದೇವೆರ್ ಯೇಸು ಕ್ರಿಸ್ತನ ಸೇವಕೆ ಆದುಪ್ಪೆರೆ ಎಂಕ್ ಕೊರಿನ ಎಡ್ಡೆ ಸಂದರ್ಭೊಡ್ದಾದ್ ಎಂಕ್ ಈ ಧೈರ್ಯ ಉಂಡಾಂಡ್. ದೇವೆರೆಡ್ದ್ ಬತ್ತಿನ ಈ ಸುವಾರ್ತೆ ಸಾರಿಯುನೆಟ್ಟ್ ಯಾನ್ ಒರಿ ಯಾಜಕಲೆಕ್ಕ ಸೇವೆ ಮಲ್ಪುವೆ. ಉಂದೆಡ್ದ್ ಪಿದಯಿದ ಜನೊಕುಲುಲಾ ಪರಿಶುದ್ಧಾತ್ಮೊಡ್ದು ಯೋಗ್ಯದಾಕುಲಾಯಿ ಅರ್ಪಣೆ ಆವಡ್ ಅಂದ್‌ದ್ ಎನ ಆಸೆ. 17ಕ್ರಿಸ್ತಡೊಪ್ಪ ಒಂಜಾದ್ ಯಾನ್ ದೇವೆರೆಗ್ ಮಲ್ಪುನ ಈ ಸೇವೆದ ಕಾರಣೊಡ್ದು ಎಂಕ್ ಹೆಮ್ಮೆ ಉಂಡು. 18-19ಕ್ರಿಸ್ತೆ ಪಿದಯಿದ ಜನೊಕುಲೆನ್ ಅಧೀನ ಮಲ್ಪುನೆಕ್ಕಾದ್ ಎನ ಪಾತೆರೊಡ್ದುಲಾ ಕ್ರಿಯೊಲೆಡ್ದ್‌ಲಾ ಗುರ್ತೊಲೆಡ್ದ್‌ಲಾ ಕಾರ್ನಿಕೊಲೆ ಬಲೊಡ್ದುಲಾ ದೇವೆರೆ ಪರಿಶುದ್ಧಾತ್ಮೊಡ್ದುಲಾ ಮಲ್ತ್‌ದಿನ ಕಾರ್ಯೊಲತ್ತಂದೆ ಬೇತೆ ವಾ ಕಾರ್ಯೊಲೆಡ್ದ್‌ಲಾ ಪನಿಯೆರೆ ಎಂಕ್ ಧೈರ್ಯ ಯಾವಂದ್. ಯಾನ್ ಯೆರೂಸಲೇಮುಡ್ದು ಇಲ್ಲೂರಿಕ ಸೀಮೆದ ಸುತ್ತಮುತ್ತ ಪ್ರಯಾಣ ಮಲ್ತ್‌ದ್ ಕ್ರಿಸ್ತನ ಸುವಾರ್ತೆನ್ ಸಾರಿಯುನೆನ್ ಮುಗಿತ್‌ದೆ. 20ಬೊಕ್ಕೊರಿ ಪಾಡ್ದಿನ ಅಡಿಪಾಯದ ಮಿತ್ತ್ ಕಟ್ಟುಜಿ ಪಂಡ್ದ್ ಎನ್ನ್‌ದ್, ಕ್ರಿಸ್ತನ ಪುದರ್‌ನ್ ತೆರಿಪಾಯಿನಲ್ಪ ಸುವಾರ್ತೆನ್ ಸಾರಿಯುನೇ ಇಜ್ಜಿ ಪಂಡ್ದ್ ನಿರ್ಧಾರ ಮಲ್ತೊಂಡೆ.
21ಶಾಸ್ತ್ರೊಡು ಬರೆತಿಲೆಕ್ಕ
“ಆಯನ ವಿಚಾರೊಡು ತೆರಿಯಂದಿನಾಕುಲೇ ಆಯನ್ ತೂವೆರ್;
ಕೇನಂದಿನಾಕುಲೇ ಆಯನ್ ತೆರಿಯೊನ್ವೆರ್.”
22ಈ ಕಾರಣೊಡ್ದು ನಿಕ್ಲೆನಡೆ ಬರಿಯೆರೆಗ್ ಎಂಕ್ ಸುಮಾರ್ ಸರ್ತಿ ಅಡ್ಡಿ ಆಂಡ್. 23-24ಆಂಡ ಇತ್ತೆ ಮುಲ್ತ ಬೇಲೆ ಮುಗಿನೆಡ್ದ್ ಬೊಕ್ಕ ಯಾನ್ ಪಾಕ ವರ್ಸೊಡ್ದಿಂಚಿ ನಿಕ್ಲೆನ್ ತೂವೊಡು ಅಂದ್‌ದ್ ಇತ್ತಿನೆಡ್ದ್ ಸ್ಪೇನ್‌ಗ್ ಪೋಪಿನ ಸಾದಿಡ್ ನಿಕ್ಲೆನ್ ತೂವೊಡಂದುಲ್ಲೆ. ನಿಕ್ಲೆಡೊಪ್ಪ ಒಂತೆ ಸಮಯ ಇತ್ತಿ ಬೊಕ್ಕ ನಿಕುಲು ಆ ದೇಶೊಗು ಎನನ್ ಪೊರ್ಲುಡು ಸಾಗಾವರ್ ಪಂಡ್ದ್ ನಂಬುದೆ. 25ಆಂಡ ಸದ್ಯೊಗು ಯಾನ್ ಯೆರೂಸಲೇಮುದ ದೇವಜನೊಕುಲೆನ ಸೇವೆಗಾದ್ ಅಡೆಗ್ ಪೋವೊಂದುಲ್ಲೆ. 26ದಾಯೆಗಂದ್ಂಡ ಯೆರೂಸಲೇಮುಡುಪ್ಪು ದೇವಜನೊಕುಲೆ ಉಲಯಿ ಬಡವೆರೆಗಾದ್ ಒಂತೆ ಕಾಸ್‌ದ ಸಹಾಯ ಮಲ್ಪೊಡು ಅಂದ್‌ದ್ ಮಕೆದೋನ್ಯ ಅಖಾಯ ಸಭೆತಾಕುಲು ತೀರ್ಮಾನ ಮಲ್ತ್‌ದೆರ್. 27ಉಂದೆನ್ ಮಲ್ಪೆರೆ ಮೊಕುಲು ಇಷ್ಟ ಪಡೆಯಿನಿ ಅತ್ತಂದೆ ಅಕ್ಲೆನ ಹಂಗ್‌ಡುಲ್ಲೆರ್, ಎಂಚಂದ್ಂಡ ಪಿದಯಿದ ಜನೊಕುಲು ಅಕ್ಲೆನ ಆತ್ಮ ಸಮ್ಮಂಧವಾಯಿ ಸಂಪೊತ್ತೊಗು ಪಾಲ್‌ದಾರೆರಾಯಿ ಬೊಕ್ಕ ಲೋಕದ ಕಾರ್ಯೊಲೆಡ್ ಅಕ್ಲೆಗ್ ಸೇವೆ ಮಲ್ಪುನ ಹಂಗ್‌ಡುಲ್ಲೆರತ್ತಾ. 28ಯಾನ್ ಈ ಬೇಲೆನ್ ಮುಗಿತ್‌ದ್ ಈ ಪ್ರೀತಿದ ಫಲೊನು ಅಲ್ತಕುಲೆನ ವಶೊಕ್ಕು ಕೊರಿ ಬೊಕ್ಕ ಅಲ್ತ್‌ಡ್ದ್ ಸ್ಪೇನ್ ದೇಶೊಗು ಪೋಪೆ. 29ಉಂದತ್ತಂದೆ ಯಾನ್ ನಿಕ್ಲೆ ಕೈತಲ್‌ ಬನ್ನಗ ಕ್ರಿಸ್ತಡ್ದ್ ಉಂಡಾಪಿ ವರೊಕ್ಲೆನ್ ಕನಪೆ ಪಂಡ್ದ್ ತೆರಿದೆ.
30ಸಹೋದ್ರೆರೇ, ನಿಕುಲು ದೇವೆರೆಡ ಎಂಕಾದ್ ಮಲ್ಪು ಪ್ರಾರ್ಥನೆಲೆಡ್ ಎನಡೊಪ್ಪ ನಟ್ಟೊನೊಡು ಪಂಡ್ದ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ಪರಿಶುದ್ಧಾತ್ಮಡ್ದ್ ಉಂಡಾಪಿ ಪ್ರೀತಿಡ್ದ್‌ಲಾ ನಿಕ್ಲೆಡ ಕೇನೊಂದುಲ್ಲೆ. 31ದೇವೆರ್ ಎನನ್ ಯೂದಾಯದ ನಂಬಿಕೆದಾಂತಿನಾಕುಲೆ ಕೈಡ್ದ್ ತಪ್ಪಾವೊಡು ಪಂಡ್ದ್‌ಲಾ ಯೆರೂಸಲೇಮುಗಾದ್ ಎನ ಸೇವೆ ಅಲ್ತ ದೇವಜನೊಕುಲೆಗ್ ಮೆಚ್ಚಿಗೆ ಆಪಿಲೆಕ್ಕ ನಟ್ಟೊನ್ಲೆ. 32ಅಂಚಾಂಡ, ದೇವೆರೆ ಚಿತ್ತ ಇತ್ತ್ಂಡ ಯಾನ್ ನಿಕ್ಲೆನಡೆಗ್ ಪೂರ್ತಿ ಸಂತೋಷೊಡು ಬರ್ಪೆ; ನಿಕ್ಲೆಡೊಪ್ಪ ಸಂತೋಷ ಮಲ್ತ್‌ದ್ ಪೊಸ ಬಲ ಪಡೆಯೊನ್ವೆ. 33ನಮ ಸಮಾಧಾನದ ಮೂಲ ಆದುಪ್ಪು ದೇವೆರ್ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್, ಆಮೆನ್.
Currently Selected:
ರೋಮಾಯೆರೆಗ್ 15: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
