ರೋಮಾಯೆರೆಗ್ 16
16
ಮೆಚ್ಚಿಗೆಲಾ ವಂದನೆಲಾ ಎಚ್ಚರಿಕೆಲಾ
1ಯಾನ್ ಕೆಂಕ್ರೇಯ ಸಭೆತ ಸೇವಕಿ ಆದುಪ್ಪು ಸಹೋದ್ರಿ ಫೊಯಿಬೆನ್ ನಿಕ್ಲೆನ ಕೈತಲ್‌ಗ್ ಕಡಪುಡ್ವೆ. 2ದೇವಜನೊಕುಲೆಗ್ ತಕ್ಕ ಇತ್ತಿಲೆಕ್ಕನೆ ಆಲೆನ್ ಕರ್ತವಡ್ ಸೇರಾಲೆ. ಆಲೆಗ್ ದಾಲಾಂಡಲಾ ನಿಕ್ಲೆಡ್ದ್ ಸಹಾಯ ಬೋಡಾಂಡ ಮಲ್ಪುಲೆ. ಆಲ್ ಎಂಕ್‌ಲಾ ಮಸ್ತ್ ಜನೊಕುಲೆಗ್ಲಾ ಸಹಾಯ ಮಲ್ತ್‌ದಲ್.
3ಕ್ರಿಸ್ತ ಯೇಸುನ ಸೇವೆಡ್ ಎನ ಜತೆಸೇವಕೆರಾದಿತ್ತಿನ ಅಕ್ವಿಲಗ್ಲಾ ಪ್ರಿಸ್ಕಿಲಗ್ಲಾ ಎನ ವಂದನೆಲು. 4ಅಕುಲು ಎನ ಜೀವೊಗಾದ್ ಅಪಾಯೊನು ಎದುರಿಸಾಯೆರ್. ಯಾನ್ ಅಕ್ಲೆಗ್ ಋಣಿ ಆದುಲ್ಲೆ. ಯಾನ್ ಮಾತ್ರತ್ತಂದೆ, ಮಾತ ಪಿದಯಿದ ಜನೊಕುಲೆ ಸಭೆತಾಕುಲುಲಾ ಪುಗರುವೆರ್. ಅಪೊಸ್ತಲೆರೆಡ್ ಅಕ್ಲೆನ್ ಮಾತೆರ್ಲಾ ತೆರಿದೆರ್ ಬೊಕ್ಕ ಅಕುಲು ಎನಡ್ದ್ ದುಂಬು ಕ್ರೈಸ್ತೆರಾತೆರ್. 5ಅಕ್ಲೆ ಇಲ್ಲಡ್ ಕೂಡ್ದು ಬರ್ಪಿನ ಸಭೆತಾಕುಲೆಗ್ಲಾ ವಂದನೆಲು. ಆಸ್ಯ ಸೀಮೆಡ್ ಕ್ರಿಸ್ತನ್ ನಂಬಿನ ಎನ ಸುರುತ್ತ ಪ್ರೀತಿದ ಸ್ನೇಹಿತೆ ಎಪೈನೇತಗ್ಲಾ ವಂದನೆ 6ನಿಕ್ಲೆಗಾದ್ ಮಸ್ತ್ ಪ್ರಯಾಸ ಬುಡಿನ ಮರಿಯಗ್ ವಂದನೆ
7ಎನಡೊಪ್ಪ ಸೆರೆಮನೆಟ್ ಇತ್ತಿನ ಅಂದ್ರೋನಿಕಗ್ಲಾ ಯೂನ್ಯಗ್ಲಾ ವಂದನೆಲು. ಅಪೊಸ್ತಲೆರೆಡ್ ಅಕ್ಲೆನ್ ಮಾತೆರ್ಲಾ ತೆರಿದರ್ ಬೊಕ್ಕ ಅಕುಲು ಎನಡ್ದ್ ದುಂಬು ಕ್ರೈಸ್ತೆರಾತೆರ್.
8ಕರ್ತವಡ್ ಎನ ಪ್ರೀತಿದ ಅಂಪ್ಲೀಯಗ್ಲಾ ವಂದನೆ
9ಕ್ರಿಸ್ತ ಸೇವೆಡ್ ಎಂಕುಲೆ ಜತೆಸೇವಕೆ ಉರ್ಬಾನಗ್ಲಾ ಎನ ಪ್ರೀತಿದ ಸ್ತಾಖುಗ್ಲಾ ವಂದನೆಲು. 10ಕ್ರಿಸ್ತನ ಸೇವೆಡ್ ಯೋಗ್ಯದಾಯೆ ಆದುಪ್ಪು ಅಪೆಲ್ಲಗ್ ವಂದನೆ ಅರಿಸ್ತೊಬೂಲುನ ಇಲ್ಲದಾಕುಲೆಗ್ ವಂದನೆಲು. 11ಎನ ಸಂಬಂಧಿಕೆ ಆದುಪ್ಪು ಹೆರೋದಿಯಗ್ಲಾ ನಾರ್ಕಿಸ್ಸ್‌ನ ಇಲ್ಲಡ್ ಕರ್ತವಡ್ ಉಪ್ಪುನಾಕುಲೆಗ್ಲಾ ವಂದನೆಲು.
12ಕರ್ತವ ಸೇವೆಡುಪ್ಪುನ ತ್ರುಫೈನಗ್ಲಾ ತ್ರುಫೋಸಗ್ಲಾ ವಂದನೆಲು. ಕರ್ತವಗಾದ್ ಮಸ್ತ್ ಪ್ರಯಾಸ ಬುಡ್ತಿನ ಪ್ರೀತಿದ ಪೆರ್ಸೀಸಗ್ಲಾ ವಂದನೆ 13ಕರ್ತವ ಭಕ್ತೆರೆಡ್ ಅಜತ್‌ದಿನಾಯೆ ಆದುಪ್ಪು ರೂಫಗ್ಲಾ ಎಂಕ್ ಅಪ್ಪೆಲೆಕ್ಕ ಇತ್ತಿ ಆಯ ಅಪ್ಪೆಗ್ಲಾ ವಂದನೆಲು. 14ಅಸುಂಕ್ರೀತಗ್ಲಾ ಫ್ಲೆಗೋನುಗ್ಲಾ ಹೆರ್ಮಾನುಗ್ಲಾ ಪತ್ರೋಬುಗ್ಲಾ ಹೆರ್ಮೇಯೆಗ್ಲಾ ಅಕ್ಲೆಡೊಪ್ಪ ಉಪ್ಪುನ ಮಾತ ಸಹೋದರೆರೆಗ್ಲಾ ವಂದನೆಲು. 15ಫಿಲೊಲೋಗುಗ್ಲಾ ಯೂಲ್ಯಗ್ಲಾ ನೇರ್ಯಗ್ಲಾ ಆಯನ ಮೆಗ್ದಿಗ್ಲಾ ಒಲುಂಪಸ್‌ಗ್ಲಾ ಅಕ್ಲೆಡೊಪ್ಪ ಉಪ್ಪುನ ಮಾತ ದೇವಜನೊಕುಲೆಗ್ಲಾ ವಂದನೆಲು.
16ಒರಿಯಗ್ ಒರಿ ಪರಿಶುದ್ಧದ ಮುದ್ದು ಕೊರ್ದು ವಂದಿತೊನ್ಲೆ. ಮುಲ್ತ ಕ್ರಿಸ್ತನ ಸಭೆತಾಕುಲು ಅಕ್ಲೆನ ವಂದನೆಲೆನ್ ತೆರಿಪಾದೆರ್.
17ಎನ ಸಹೋದ್ರೆರೇ, ನಿಕುಲು ಕಲ್ತೊಂಡಿ ಬೋಧನೆಗ್ ವಿರೋಧಾದ್ ಭೇದ ಆತಂಕ ಮಲ್ಪುನಾಕುಲೆ ಮಿತ್ತ್ ಕಣ್ಣ್ ದೀದ್ ಅಕ್ಲೆಡ್ದ್ ದೂರ ಉಪ್ಪುಲೆ ಪಂಡ್ದ್ ನಿಕ್ಲೆಡ ನಟ್ಟೊನ್ವೆ. 18ಇಂಚ ಮಲ್ಪುನಾಕುಲು ನಮ ಕರ್ತವೆ ಆದುಪ್ಪು ಕ್ರಿಸ್ತನ ಸೇವೆನ್ ಮಲ್ಪಂದೆ ತನ್ಕುಲೆ ಬಂಜಿದ ಸೇವೆನೇ ಮಲ್ಪುನಾಕುಲು. ಅಕುಲು ಪೊರ್ಲುದ ಪುಗರಿಕೆದ ಪಾತೆರೊಲೆಡ್ದ್ ತೆರಿಯಂದಿ ಜನೊಕುಲೆನ ಉಡಲ್‌ನ್ ಮೋಸೊಗು ಪಾಡ್ವೆರ್ 19ನಿಕ್ಲೆನ ತಗ್ಗ್‌ತನ ಮಾತೆರೆಗ್ ಗೊತ್ತಿತ್ತ್‌ನೆಡ್ದ್ ಉಂದೆನ್ ಬರೆತೆ. ನಿಕ್ಲೆನ ಸಂಗತಿಡ್ ಸಂತೋಷ ಪಡೆಪೆ. ನಿಕುಲು ಎಡ್ಡೆಂತಿನೆಟ್ಟ್ ಬಿರ್ಸೆರ್ ಹಾಳ್‌ದೆಟ್ಟ್ ಕಪಟದಾಂತಿನಾಕುಲು ಆದುಪ್ಪೊಡು ಅಂದ್‌ದ್ ಬಯಕುವೆ. 20ಸಮಾಧಾನದ ದೇವೆರ್ ಬೇಗೊಡು ಸೈತಾನನ್ ನಿಕ್ಲೆ ಕಾರಡಿಕ್ ಪಾಡ್ದ್ ದೊಂಕಾವೆ. ನಮ ಕರ್ತವೆ ಆದುಪ್ಪು ಯೇಸುನ ದಯ ನಿಕ್ಲೆಡೊಪ್ಪ ಉಪ್ಪಡ್.
21ಎನ ಜತೆಸೇವಕೆ ತಿಮೋಥಿ, ನಿಕ್ಲೆಗ್ ವಂದನೆಲೆನ್ ತೆರಿಪಾದೆ. ಅಂಚೆನೇ ಸಂಬಂಧಿಕೆರಾಯಿನ ಲೂಕ್ಯೆಲಾ ಯಾಸೋನುಲಾ ಸೋಸಿಪತ್ರೆಲಾ ವಂದನೆಲೆನ್ ಪನ್ಪೆರ್.
22ಈ ಪತ್ರಿಕೆನ್ ಬರೆತಿ ತೆರ್ತಿಯೆ ಇನ್ಪಿ ಯಾನ್ ನಿಕ್ಲೆಗ್ ಕರ್ತವಡ್ ವಂದನೆಲೆನ್ ತೆರಿಪಾವೆ.
23-24ಸಭೆ ಒಟ್ಟಾದ್ ಸೇರ್ದ್ ಬರ್ಪಿ ಇಲ್ಲದ ಗಾಯೆಲಾ ನಿಕ್ಲೆಗ್ ವಂದನೆ ಪನ್ಪೆ. ಈ ಊರುದ ಖಜಾನೆದ ಮುಖ್ಯಸ್ಥೆ ಆದುಪ್ಪು ಎರಸ್ತೆಲಾ ನಮ ಸಹೋದರೆ ಕ್ವರ್ತೆಲಾ ವಂದನೆ ಪನ್ಪೆರ್. ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತ ದಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್. ಆಮೆನ್.
ಆಶೀರ್ವಾದದ ಪಾತೆರೊಲು
25-26ದೇವೆರೆಗ್ ಮೈಮೆ ಆವಡ್. ಪಿರಾಕ್‌ದ ಕಾಲೊಲೆಡ್ ವರ್ಸಾನುಗಟ್ಟಲೆ ಮದೆ ಆದಿತ್ತಿನ ಮರ್ಮೊಲು ಇತ್ತೆ ತೋಜಿದ್ ಬತ್ತಿಲೆಕ್ಕ, ಯಾನ್ ನಿಕ್ಲೆಗ್ ಸಾರಿನ ಯೇಸು ಕ್ರಿಸ್ತನ ಸುವಾರ್ತೆಗ್ ತಕ್ಕ ನಿಕ್ಲೆಡ್ ಉಂಡಾಯಿನ ನಂಬಿಕೆಡ್ ಸ್ಥಿರಾದ್ ಉಂತುಲೆ. ಇತ್ತೆ ಆ ಮರ್ಮ ಪ್ರವಾದಿಲೆ ಬರವುಡ್ದ್ ತೆರಿದ್ ಬತ್ತ್ಂಡ್. ಬೊಕ್ಕ ಮಾತ ಜನಾಂಗೊಲುಲಾ ಅವೆನ್ ಕೇನುಲೆಕ್ಕಲಾ ಐಕ್ ತಗ್ಗ್‌ದಿನಾಕುಲಾದ್ ಉಪ್ಪುಲೆಕ್ಕಲಾ ನಿತ್ಯ ದೇವೆರೆ ಅಪ್ಪಣೆಡ್ದ್‌ಲಾ ಅವು ಮಾತೆರೆಗ್ ತೋಜಿದ್ ಬತ್ತ್ಂಡ್.
27ಒರಿಯೇ ಸರ್ವಜ್ಞಾನಿ ಆದುಪ್ಪು ನಿತ್ಯ ದೇವೆರೆಗ್ ಯೇಸು ಕ್ರಿಸ್ತಡ್ದ್ ಏನಿತ್ಯೇನಿಗ್ಲಾ ಮಾನ ಮೈಮೆ ಉಂಡಾವಡ್, ಆಮೆನ್.
Currently Selected:
ರೋಮಾಯೆರೆಗ್ 16: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
