Cepanyah 3
3
Rutiq Yerusalem ma Priyux Lnglungan
1Sntali su bale! Alang mptraqil seediq nii!
Tbrinah ma msburo,
2ini qbahang kari pnosa,
ini angal pndakar,
ini stama Utux Tmninun,
ini smdaling Utux Baro na.
3So rkelic rudu mngaangal mdiras ka qbsuran mdudul daha,
so muure ba huling bbuyu keeman ka dmpsgao,
ini bale rangi betaq mgrebu.
4Dseediq mberiq tmraki ka dmpgeela kari na,
smrutiq sapah thmkuwan ka dmsapuh ma, mmhemuc rmengo gaya.
5Moda msderux noda ckceka daha ka Utux Tmninun,
uxe moda ini ksderux noda ka heya,
mooda ptuura knsderux noda na mgrebu klaali uxe mpsange.
Wano ba seediq ini ksderux noda ka ini qsiqa.
6Wada mu qhdeun pkuuka ka dqlhangan,
wada lixan ka paga alang daha,
so nlaxan ka elu alang daha,
uka seediq mkkesa hiya.
Wada sgliqan ka lualang daha,
uka seediq ma, uka meeniq hiya.
7Rmengo ku: Wano isu ka miicu kenan,
mangal pndakar mu.
Nniqan su we, uxe mu pyugun tgplaale moda smeeliq.
Kiya de, tena wada smeeliq dheya nanak klegan noda daha mntutuy peeyah mgrebu.
8Tara kenan ka yamu,
betaq pstutuy ku ali moda gmeluk.
Ado moda ku psseli klegan seediq ma, psseli dqlhangan,
saun mu hmeruy heyi daha ka seang mu ma paru seang mu.
Puniq snhuran mu ka moda psqama kana bobo dxeral.
Rnengo Utux Tmninun ka nii.
9Ciida, kmpryuxun mu kana ka seediq,
so bgurah ka quwaq daha,
kiya ka mplawa ngayan Utux Tmninun,
mpdungus lhebun mu meepah kenan.
10Duma dmnurun kenan,
kiya ka dseediq wada pnkrhepan,
ida mpeeyah sipo yayung Kusu hiya,
mbege snapuh kenan.
11Ali ciida, uxe su mpqsiqa kana ndaan su qnquwan noda kenan,
ado moda ku pkuuka dseediq tqqaras psparu ckceka su ka yaku,
uxe su mnpusal psparu meeniq dgiyaq mrtaso mu uri.
12Rngiun mu ckceka namu ka dseediq mqraqil,
mpstama ngayan Utux Tmninun ka dheya.
13Uxe moda qmeepah naqah ka dseediq mtngari Israel,
uxe mberiq rmengo ma, hema quwaq daha we uka pkraki.
Miimah ma mpsange ka dheya,
uka seediq ka meeyah smicu dheya.
Uyas Mqaras
14Sion! Tqqaras muyas!
Seediq Israel! Tqqaras mlawa!
Yerusalem! Qqrasi ka lhebun namu!
15Utux Tmninun we wada malix psgao sunan ka heya,
wada lmiwaq pais su ka heya.
Qbsuran paru Israel, Utux Tmninun we gaga ckceka namu.
Uxe su mnpusal miicu mqraqil.
16Ali ciida, niqan ka kari mprengo Yerusalem:
Iya kiicu!
Sion! Iya kuuwic ka baga su!
17Utux Tmninun, Utux Baro su we gaga ckceka su,
niqan paru beyax na ma, moda dmoi baga.
Ririh isu mpqaras ka heya,
mplmelux ckceka gnaalu ka heya,
ririh isu mpskuxul mqaras ka heya.
18Moda ku psseli dseediq naqah kuxul gaga uka smseman,
mnlatac sunan ka dheya,
mchedil panun ma qnsiqa su ka dheya.
19Ciida, qtai! Pkdira ku dseediq tnraqil sunan,
mpdoi ku baga dseediq mriqic ma, mpsseli ku lnwaqan.
Ndaan pqsiqa kana bobo dxeral we,
mosa mangal tndahu mu dheya ma, mangal malu ngayan.
20Ciida, mpbrinah ku dmudul yamu ma mpsseli ku yamu.
Pbrnahun mu ka dseediq qnerac ciida,
biqun maku malu ngayan ma mangal tndhuwan ckceka klegan seediq bobo dxeral ka yamu.
Rnengo Utux Tmninun ka nii.
Currently Selected:
Cepanyah 3: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
