Jekaryah 9
9
Psgao Qlhangan Ssiyo
1Kari pnugkela Utux Tmninun,
kari na we dehuk dxeral Xadrak ma Darmeseq.
Ado mquri Utux Tmninun kana ka doriq seediq bobo dxeral ma kana pnswayan rudan Israel ma,
2Xamat gaga ssiyo,
Cor ma Cidon.
Ado niqan ba knkela ka heya.
3Cor we smmalu qbrangan mkkere daha nanak,
gmutu ging mntena bengux dxeral,
king we mntena so dxeral gaga ceka elu.
4Qtai! Mpliwaq heya ka Bukung,
qdanun na ka beyax bobo rcilung,
rqenun phuqil puniq ka heya.
5Mpkiicu qmita ka Asqelon,
mpqraqil qmita ka Ajah,
ririh wada uka sntangan na mpqsiqa ka Eqron.
Uxe mpniqan qbsuran paru ka Ajah,
uka seediq meeniq ka Asqelon uri.
6Dseediq mmgimax ka meeniq Asdod.
Mpkuuka ku pnsparu seediq Peliset.
7Ngalun mu ka heyi gaga niqan dara quwaq na ma,
uqun trqilun mu gaga ckceka rupun na.
Ma seediq mnkngari mpquri Utux Baro ta ka heya.
Pntena so pnswayan pusu rudan Yehudah.
Seediq Eqron we mptena so seediq Yebus.
8Mpkobu ku sapah mu nanak,
uxe mpkmhemuc meeyah ka pais mu,
uxe moda hiya ka seediq smmeliq,
ado mpqlahang ka doriq mu.
Qbsuran Paru Mmeyah
9Seediq Sion! Qqaras ba paru.
Yerusalem! Pmbaro mlawa.
Tai! Meeyah isu hini ka qbsuran paru su da!
Msderux noda ka heya ma, qmeepah mdoi baga ka heya,
psbiciq ba paapa dapa roba,
paapa wawa dapa roba, wawa ba roba.
10Pkngalun mu ka rulu mccebu Eprayim ma,
dapa dmay mccebu Yerusalem.
Sgliqun mu ka budi mccebu.
Mprengo mtbale qqlhangan ka heya.
Beyax qnlhangan na we mpeeyah rcilung hini betaq rcilung hiya,
mpeeyah yayung Paru betaq muxi dxeral.
Pstutuy Seediq NuUtux Baro
11Sion! Ririh dara ndaan mu smdehu isu,
mpeeyah ku ckceka beling uka qsiya rmaguh seediq hnetur.
12Seediq hnetur niqan sntangan! Osa mbrinah qbrangan.
Mprengo ku saya, mprana ku mege yamu.
13Ririh yaku pskere ku Yehudah,
mntena ku nii dmoi budi ka Eprayim.
Sion! Mplawa ku lqlaqi su,
Hellenis! Mpccebu ku lqlaqi su,
pntena so hlmadac supi mnpahung.
14Mptuura heyi daha ka Utux Tmninun,
pntena so wilaq mosa ka budi na.
Utux Tmninun Bukung we mpiiyuk urung,
mpaapa bgihur mspgeriq tgtruma mosa ka heya.
15Mpqlahang dheya ka Utux Tmninun Mdoi Kana Supi.
Moda rmequn ma qmleqah btunux halung ka dheya.
Mpplawa ma mtbeyax miimah qsiya mntena so nii miimah sino,
pntena so pngerah stenge,
pntena so 4 muxi papa spuhan uri.
16Ali ciida, Utux Tmninun, Utux Baro daha,
mpqita seediq na mntena so rahul miric mpdoi baga dheya.
Ado dheya we mntena so btunux mkere brigun gaga bunuh qbsuran paru,
mntena pheyu pnslawa meeniq bobo dxeral na.
17Teyal knmalu ka heya!
Teyal knseediq ka heya!
Pkbeyax riso ka uqun,
pqnseediq weewa ka sino bgurah.
Currently Selected:
Jekaryah 9: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
