Jekaryah 10
10
Sntangan Mdoi Baga Utux Tmninun
1Smwaso quyux ciida, mpdurun namu mesa quyux Utux Tmninun.
Mpeeyah tqwilaq ka Utux Tmninun,
ririh kana seediq mpeeyah quyux paru ka heya,
sbege na seediq ka sama gaga qnpahan.
2Ado skrbhuwan ka rnengo tikung sapah,
mberiq ka qnita mpspunul,
rmengo sepi mberiq ka dheya,
uka ririh daha moda smbeyax seediq.
Kiya de mntena miric tnooda mlatac ka seediq,
ririh uka mtabu gisu trqilun ka seediq.
3Mpquri mtabu ka seang mu,
mpkdira ku mndudul plaale na.
Utux Tmninun Mdoi Kana Supi we mpqlahang miric na,
kiya ka sapah Yehudah,
maha mntena dapa mkkere meeniq mccebu ka dheya.
4Mpeyah heya ka btunux pusu sapah,
mpeeyah heya ka tuting,
budi mccebu we ida mpeeyah heya uri,
ida mpeeyah heya ka txtaxa niqan beyax mpqlahang.
5Mptena so mnpahung ba supi meeniq mccebu hiya ka dheya,
moda qmleqah supi mntena qmleqah dxeral luelu.
Moda mccebu ka dheya, ado mptheyaq dheya ka Utux Tmninun,
mpqsiqa gaga paapa dapa dmay ka dheya.
6Mplekoh ku sapah Yehudah,
mpdoi ku baga sapah Yosehu,
brnahun mu dmudul ka dheya, ado gmaalu ku dheya,
pntena so uxe mu nlaxan ka dheya.
Ado yaku ka Utux Tmninun, Utux Baro daha,
mpsruwa ku dheya.
7Mpntena supi mnpahung ka seediq Eprayim,
pntena so nii mimah sino mpqaras ka lhebun daha,
qmita ka lqlaqi daha de mpqaras,
ririh Utux Tmninun mpqaras ka lhebun daha.
8Mplawa ku ma mpsseli ku dheya,
ado wada ku dmoi baga daha.
Mpkrana ka seediq daha,
pntena so knrana daha cbeyo.
9Pkrhepun mu ckceka dqlhangan ka dheya,
mosa lmngelung kenan meeniq theya ka dheya.
Mpkuudus ka lqlaqi daha,
mpbrinah ka dheya.
10Pbrnahun mu peeyah dxeral Micrayim,
pssliun mu peeyah Asur ka dheya,
ddulun mu betaq Gilad ma Lebanon.
Uxe mptuku nniqun daha ka nii na.
11Mmoda rcilung pqrqilan ka Utux Tmninun, moda smebuc bula rcilung.
Mpkdengu ka toma ba yayung Yeor,
mpgsesu ka pnparu ba Asur,
pkngalun ka beyax mpqlahang Micrayim.
12Pstmaun mu Utux Tmninun ka dheya,
kiya ka mpskere,
moda ngayan na mkkesa ka dheya.
Rnengo Utux Tmninun ka nii.
Currently Selected:
Jekaryah 10: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
