Jekaryah 8
8
Sntangan Ppheyu Yerusalem ka Utux Tmninun
1Dehuk kenan ka kari Utux Tmninun Mdoi Kana Supi, rmengo: 2“Rmengo so nii ka Utux Tmninun Mdoi Kana Supi: Ririh Sion snhuur ku ma, paru ba snhuran mu. Ririh heya betaq ku snhuur ma paru seang mu. 3Rmengo so nii ka Utux Tmninun: Pmbrinah ku mosa Sion, Meeniq ku ckceka Yerusalem. Alang kesun mosa niqan stmaan ka Yerusalem, kesun dgiyaq mrtaso ka dgiyaq Utux Tmninun Mdoi Kana Supi. 4Rmengo so nii ka Utux Tmninun Mdoi Kana Supi: Nexal we mpniqan ka rdrudan rseno ma mqedil mptleung pssliyan Yerusalem hiya. Txtaxa daha we, knrudan daha mpdoi hukuc kana. 5Maha stngayan dlqlaqi gaga mpulah ka pssliyan alang hiya. 6Rmengo so nii ka Utux Tmninun Mdoi Kana Supi: Meeniq ali ciida, ani kesun sklwiun ba ka noda meeniq ckceka doriq dseediq mtngari nii we, uxe mu kesun sklwiun oda meeniq doriq mu ka nii uri peni? Rnengo Utux Tmninun Mdoi Kana Supi ka nii. 7Rmengo so nii ka Utux Tmninun Mdoi Kana Supi: Qtai! Mpeeyah ku dxeral nklaan hido betaq dxeral pryaxan hido moda ku dmoi baga dseediq mu. 8Mpdudul ku mlatac dheya, pniqun mu ckceka Yerusalem hiya. Ma seediq mu ka dheya, ma Utux daha ka yaku. Nii we pnoda bale ba ma msderux noda ka nii.
9Rmengo so nii ka Utux Tmninun Mdoi Kana Supi: Kbeyax ba ka baga namu. Ali nii ciida, wada namu mbahang quwaq dmpgeela kari, kiya ka kari moda pheyu pusu sapah thmkuwan Utux Tmninun ma, ali ddaun smmalu sapah thmkuwan nii. 10Berah ali kiya we, uxe mangal sntkean daha ka seediq, kiya we uxe meyah mlawa tnbugan smtuku uri. Dungal we ririh pais, uxe mpbleyaq mkkesa ka seediq, ado yaku ka pkpais seediq. 11Kiya de saya de, ini mu ptnaani cuuxal ka seediq mnkngari nii da. Rnengo Utux Tmninun Mdoi Kana Supi ka nii. 12Ado mpbleyaq tmukuy ka dheya, mpgheyi ka lipas, mpniqan ka pnhgalang ma, mpquyux quyux ka karac uri. Mosa mangal kana malu nii ka seediq mnkngari nii. 13Sapah Yehudah ma Israel! Cuuxal we wada namu huwa kesun ma syusan meeniq ckceka dqlhangan. Maha so kiya, mpdoi ku baga namu ma, mpbleyaq ku yamu. Iya kiicu, knbeyax ka baga namu.
14Rmengo so nii ka Utux Tmninun Mdoi Kana Supi: Pnstutuy seang mu ka rdrudan namu cuuxal we, wada ku hmuwa mesa mege pnqraqil we, uxe mu pryuxun. Rmengo so nii ka Utux Tmninun Mdoi Kana Supi: 15Ali nii we, niqan lnglungan mu mbege ku huwe sapah Yerusalem ma Yehudah. Kiya de iya ba kiicu ka yamu. 16So nii ka asi namu ka daun: Txtaxa namu we asi namu ka rmengo bale ba ssiyo namu. Meeniq namu rhengun alang we, asi namu ka spooda ini psaanak psgao ma, pbbleyaq dseediq. 17Iya bale peeniq lhebun namu ka pphuqil ssiyo namu, iya bale skuxul mberiq smdehu. Ado qnqihun mu bale ka oda so nii. Rnengo Utux Tmninun Mdoi Kana Supi ka nii.”
18Dehuk yaku ka kari Utux Tmninun Mdoi Kana Supi, rmengo: 19“Rmengo so nii ka Utux Tmninun Mdoi Kana Supi: Tg4, 5, 7, 10 idas mooda ptgaya ini ekan we, kiya ka ngali smseman qrasun ba ma malu ba sapah Yehudah kiya. Kiya de yamu we qrasi ba ka bale ba ma mtgbale.”
20Rmengo so nii ka Utux Tmninun Mdoi Kana Supi: “Nexal we meeyah dungal ka hbaro ba seediq ma dseediq lualang. 21Dseediq tnualang hini we mosa alang hiya, mprengo: Osa ta nhari migin dmurun huwe Utux Tmninun, migin Utux Tmninun Mdoi Kana Supi. Mosa ku ka yaku uri. 22Maha egu ba klegan seediq ma dqlhangan mbbeyax meeyah Yerusalem migin Utux Tmninun Mdoi Kana Supi ma, mesa dmurun huwe Utux Tmninun. 23Rmengo so nii ka Utux Tmninun Mdoi Kana Supi: Meeniq ali ciida, maha niqan ka 10 heyi mplebil lukus seediq Yehudah ma rmengo: Mpsuupu miyan yamu mosa, ado mnbahang miyan gaga mtheyaq yamu ka Utux Baro da.”
Currently Selected:
Jekaryah 8: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
