Jekaryah 7
7
Mseang Nnnangi Mooda Ptgaya Ini Ekan
19 idas tg4 knkawas qbsranun paru Daryawes, kiya de 4 ali idas kesun Ksriyu ciida, meeyah Jekaryah ka kari Utux Tmninun. 2Ciida, tena snkagul Sarecer ma Regem Meleq ka seediq Beytel ma, seediq daha mosa dmurun mesa huwe Utux Tmninun. 3Mosa smiling dmsapuh gaga ckceka sapah thmkuwan Utux Tmninun hiya ma, smiling dmpgeela kari: “Mpgtena ku so ndaan mu egu ba knkawas, asi ku ka moda lmingis ptgaya ini ekan tg5 idas ho?” 4Dehuk kenan ka kari Utux Tmninun Mdoi Kana Supi, rmengo: 5“Sai rmengo ka kana seediq tndxeral nii ma dmsapuh: 70 knkawas nii we, mnoda namu ptgaya ini ekan tg5 idas ma tg7 idas we, yaa namu bale ba mquri kenan mnoda ptgaya ini ekan nii ho? 6Mekan ma mimah namu we, uxe yamu ka seekan namu ma, uxe yamu ka siimah namu ho? 7Gaga niqan seediq meeniq ma mtbleyaq ka Yerusalem ma lualang ssiyo hiya han we, niqan seediq gaga meeniq ka Negeb ma Sipira han we, uxe namu bhangun ka Utux Tmninun pnooda na dmpgeela kari cuuxal ho?”
Tnbrnahan Dqrapun
8Meeyah Jekaryah ka kari Utux Tmninun, rmengo: 9“Rmengo so nii ka Utux Tmninun Mdoi Kana Supi: Asi namu ka spooda bale ba ini psaanak moda psgao, dungal we pggaalu ba mssuupu. 10Iya kraki mqedil mqrinuc, laqi qrinuc, dseediq tnooda ma, dseediq mqraqil. Ani ima we iya bale lngelung moda smeeliq mtswai. 11Kiya de ini qlahang ka dheya. Ida pheyu ahing, muuwic ka birac ma ini ba qbahang. 12Mkere mntena btunux qrari ka lhebun daha, ini qbahang gaya ma kari Utux Tmninun Mdoi Kana Supi pnooda na Bgihur na smkagul dmpgeela kari cuuxal. Kiya de, mseang paru ka Utux Tmninun Mdoi Kana Supi. 13Lmnawa ku dheya ka yaku, kiya we ini qbahang ka dheya. Nexal de, mlawa kenan ka dheya we, uxe mu bhangun uri! 14Mdoi ku bgihur tgnuwin prhepun mu maadis dqlhangan uxe nklaan ka dheya. Wada mlatac ka dheya de, maha laxun ka dxeral, uka seediq ka mooda hiya. Wada daha laxun ka dxeral malu ba da.”
Currently Selected:
Jekaryah 7: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
