Jekaryah 6
6
Rulu Dapa Dumay so Utux
1Qmita ku baro dungal, qtai! Niqan 4 rulu dapa dmay, mlatac peeyah cenga 2 dgiyaq. 2 dgiyaq nii we dgiyaq limuk. 2Tgkingal rulu dapa dmay we tlusun mtanah dapa dmay, tg2 we tlusun mqalux dapa dmay, 3tg3 we tlusun bhege dapa dmay ma, tg4 we tlusun trbangan dapa dmay. Ida mkkere ba kana. 4Kiya de smiling ku snkgulan rmnengo kenan: “Bukung! Maanu ka tnugesa na nii ho?” 5Rngagan ku na: “Nii we 4 bgihur karac baro, pneeyah berah Bukung kana dxeral ka nii.” 6Cnulus mqalux dapa dmay ka rulu we wada mquri dxeral daya, smnegul bukuy ka dapa dmay bhege. Dapa dmay trbangan we mquri dxeral tgtruma kiya. 7Meyah ka mkkere ba dapa ma gisu mtbbeyax rmigo qmita bobo dxeral. Rmengo ka snkgulan Utux Baro: “Osa rmigo qmita bobo dxeral ka yamu.” Kiya de mosa rmigo qmita bobo dxeral ka dheya. 8Kiya de mlawa kenan ma, rmengo kenan ka heya: “Qtai! Wada mquri dxeral tgdaya ka mqquri tgdaya na, uxe mu lnglungun ka nii da.”
Pkbnuhan Bunuh Qbsuran Paru ka Yehosua
9Dehuk kenan ka kari Utux Tmninun, rmengo: 10“Isu ge, ngali hiya ka snapuh Xelday, Tobiyah, Yedayah dseediq qnerac bnrinah pneeyah Babirun. Ali ciida, asi su ka mremux sapah Yosiyahu laqi Cepanyah. 11Aangal ka king ma ging nii ma, smlei bunuh qbsuran paru, psai tunux Yehosua laqi Yehocadaq. 12Rngagi ka heya, rmengo so nii ka Utux Tmninun Mdoi Kana Supi: Qtai! Sida kesun Dawid we, mpdakil pnyahan na ma, mpsalu sapah thmkuwan Utux Tmninun hiya. 13Kiya ka heya mpheyu sapah thmkuwan Utux Tmninun, heya ka mplutuc mangal knledax nii ma, mptleung tlungan qbsuran paru ka heya. Dungal we mpniqan 1 ka msapuh mptleung tlungan na nanak, ddaha nii we moda mpprengo ddaun daha tbbale. 14Bbege quri Xelem, Tobiyah, Yedayah ma Xen laqi Cepanyah ka bunuh nii, psaun daha sapah thmkuwan Utux Tmninun ngngalun daha lnglungun.”
15Seediq gaga meeniq theya we meeyah dmayo smmalu sapah thmkuwan Utux Tmninun, kiya ka mpkela namu, Utux Tmninun Mdoi Kana Supi ka smnkagul kenan meeyah yamu hini. Nasi namu qmlahang mbahang Utux Tmninun, Utux Baro namu de, mpbale ka oda nii.
Currently Selected:
Jekaryah 6: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
