Jekaryah 14
14
Yerusalem ma Qqlhangan
1Qtai! Smdaling ka ali Utux Tmninun. Glekun ka dnoi namu ma, pssugun daha berah namu. 2Mplawa ku qqlhangan mosa mccebu Yerusalem. Ngalun ka alang, glekun maangal ka sapah, khmetun msuupu ka mqedil, qrapun ka dmeka kneegu seediq alang. Kiya de we mnsngari na we uxe phqilun kiya. 3Ciida, mosa mccebu qqlhangan kiya ka Utux Tmninun, mntena so mccebu cuuxal. 4Ali ciida, mpheyu dgiyaq Curung ka papak na, dgiyaq nii we mpquri nklaan hido Yerusalem ka kiya. Mpcilaq peeyah ckceka ka dgiyaq Curung, peeyah nklaan hido betaq pryaxan hido tgdahaun mmaha paru ayu dgiyaq. Icil dgiyaq we theruy quri tgdaya ma, icil dgiyaq we theruy quri tgtruma. 5Mpqduriq namu peeyah ayu mu, ado ayu nii we betaq Acal. Asi namu ka qduriq, mntena Ujiyah qbsuran paru Yehudah ciida qnduriq paru ba runu. Utux Tmninun, Utux Baro mu we meeyah, mpsuupu isu meeyah ka kana mrtaso.
6Meeniq ali ciida, mpkuuka ka ledax, mpkuuka ka hido, wano ba plabu. 7Ali nklaan Utux Tmninun we, uka diyan, uka keeman, betaq keeman de ida niqan ledax.
8Meeniq ali ciida, mpniqan ka qsiya muudus qluli peeyah Yerusalem, dmeka we qluli mquri rcilung nklaan hido, dmeka we qluli mquri pryaxan hido. Ida so nii ka rbagan ma misan.
9Mpqbsuran paru kana bobo dxeral ka Utux Tmninun. Ali ciida, Utux Tmninun we mpwano 1 heya ma uka ka tg2, ngayan na we mpwano 1 heya ma uka ka tg2. 10Peeyah Geba betaq Rimon tgtruma Yerusalem ma kana dxeral we mptadus brenux. Yerusalem we mpheyu nniqan na, peeyah rhengun Binyamin betaq rhengun Cmucac, dungal we betaq rhengun Urung, dungal we peeyah paga Xananel betaq psnagan sino sapah qbsuran paru. 11Meeniq hiya ka seediq ma, mpkuuka ka snyusan. Mptbleyaq mheyu hiya ka Yerusalem.
12Pnqraqil pneeyah Utux Tmninun ka nii, ccebu na dheya ma dseediq cnebu Yerusalem. Mheyu papak daha ciida de, mpsburo ka heyi daha, mpsburo ckceka ka doriq, mpsburo ckceka quwaq ka hema daha. 13Ali ciida, mpkrudu dheya ka Utux Tmninun. Mqqerac ka baga daha, mdoi baga daha mccebu. 14Yehudah we mpccebu Yerusalem uri. Ciida, kana qyqeya dnoi qqlhangan, kiya ka egu ba pnsseli daha king, ging ma lukus we psliun kana. 15Pnqraqil dapa dmay, dapa roba, dapa bukung, dapa sbirac ma kana klegan tnbugan ckceka kobu we mntena so pnqraqil kiya kana.
16Dseediq mntngari mneeyah mccebu Yerusalem ka qqlhangan we, knkingal knkawas meyah thmuku Qbsuran Bukung Paru, Utux Tmninun Mdoi Kana Supi, dungal we mooda smseman pkobu. 17Kana klegan seediq dxeral we, kana ini osa Yerusalem, ini osa thmuku Qbsuran Bukung Paru, Utux Tmninun Mdoi Kana Supi we, uxe qyexun ka dxeral daha. 18Nasi ini eyah baro ka dseediq Micrayim de, uxe qyexun ka dxeral daha. Kana qqlhangan ini eyah smseman pkobu we, Utux Tmninun we mpdoi pqraqil nii mcebu dheya. 19Kiya ka pnkdira mu Micrayim ma dqqlhangan ini eyah baro smseman pkobu.
20Meeniq ali ciida, hmuril pnsiru dapa dmay we “Pkrtaso Quri Utux Tmninun”. Ribo ckceka sapah thmkuwan we mntena so pngerah ga berah spuhan. 21Kana ribo gaga Yerusalem ma Yehudah we pkrtsagun dmoi thmuku Utux Tmninun Mdoi Kana Supi. Kana bnege snapuh we ida mdoi ribo nii ma phrayun daha ckceka hiya. Ali ciida, sapah thmkuwan Utux Tmninun Mdoi Kana Supi we uka ka dseediq Kenaan gmbbaruy.
Currently Selected:
Jekaryah 14: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
