Jekaryah 12
12
Pkdusun ka Yerusalem
1Tnugesa Utux Tmninun, kari na quri Israel.
Rmengo ka kmnugah karac, smmalu pusu dxeral ma, mege bgihur ckceka heyi seediq ka Utux Tmninun: 2“Qtai! Ngalun mu pngerah mahan bbsukan dseediq dqlhangan ssiyo ka Yerusalem. Yahun kmremux ka Yerusalem, mntena krmuxun ka Yehudah uri. 3Meeniq ali ciida, ma btunux knchedil kana seediq ka Yerusalem, kana pnheyu heya we maha mangal luqah kana. Mpsseli meeyah mccebu heya ka kana dqlhangan bobo dxeral. 4Betaq ali ciida, mpsklwiun mu ka kana dapa dmay ma, mpkuni ka paapa dapa dmay uri. Mpraguh ku doriq mpqlahang ku sapah Yehudah. Kiya we mpkbudu kana ka dapa dmay dqnlhangan. Rnengo Utux Tmninun ka nii. 5Pnswayan pusu rudan Yehudah we rmengo lhebun daha nanak: Dseediq Yerusalem we, ado smtama Utux Tmninun Mdoi Kana Supi, Utux Baro mu, kiya ka beyax mu ka dheya.
6Ali ciida, pnswayan pusu rudan Yehudah we, ngalun mu so rana ckceka puniq, mntena so rana puniq gaga ckceka sudu mugi. Mpeeyah ssiyo meeyah pkuuka dseediq dqlhangan ssiyo ka dheya. Kiya we mpskere mheyu hini ka Yerusalem, ida meeniq Yerusalem!
7Mprading dmoi baga kobu Yehudah ka Utux Tmninun, so uxe mpgkala Yehudah ka knledax sapah Dawid ma dseediq Yerusalem. 8Ali ciida, Utux Tmninun we mpqlahang seediq Yerusalem. Ali ciida we mnuuwic ckceka daha we mptena so Dawid. Mptena so Utux Baro ka sapah Dawid, mptena so snkgulan Utux Tmninun gaga mkkesa berah daha. 9Ali ciida, niqan ka lnglungan mu mphuqil dqlhangan mneeyah mccebu Yerusalem.
Luqah Pnbetaq
10Bgihur huwe ma ddurun mu we, sheruy mu sapah Dawid ma dseediq Yerusalem. Mpstama kenan ka dheya, kiya ka cnuqi daha kiya. Mpqnaqah kuxul heya, mntena wada mgeedang laqi murux ba ma, mbasi lmingis mntena wada mgeedang ka tgqbsuran laqi rseno ka dheya. 11Ali ciida, mptndengus mdiras paru ka Yerusalem, mpntena lingis meeniq Hadad Rimon breenux Megido hiya. 12Mplingis ka dxeral nii: Knkingal sapah mplingis, mpsseli kingal nniqan ka sapah Dawid. Mpsseli kingal nniqan ka sapah Natan, mqedil daha we mpsseli kingal nniqan uri. 13Mpsseli kingal nniqan ka sapah Lewiy, mqedil daha we mpsseli kingal nniqan. Mpsseli kingal nniqan ka sapah Simiy, mqedil daha we mpsseli kingal nniqan uri. 14Duma txtaxa sapah we, mpsseli kingal nniqan daha, dmqedil we mpsseli kingal nniqan daha uri.”
Currently Selected:
Jekaryah 12: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
