Jekaryah 11
11
Mptakur ka Naqah Qbsuran Paru
1Lebanon! Rwahi rhengun su,
tai so mptbau psqama qulic su.
2Tnedux lmingis! Qhuni tqilung!
Ado wada mtakur ka qulic bale da ma, wada mnaqah ka qhuni paru ba.
Tnedux lmingis! Qhuni raus Basan!
Ado wada beexun ka mknedux ba nrao da.
3Qbhangi! Gisu lmingis ka mtabu,
ado wada mtakur ka knledax na.
Qbahang! Gaga mdiras ka mbeyax rkelic rudu,
Ado wada lixun ka nrao ssiyo yayung Yarden da.
Daha Mtabu
4Rmengo so nii ka Utux Tmninun, Utux Baro mu: “Sai tmabu isu ka miric pphqilun nii. 5Mphuqil dheya ka bnaruy miric. Mprengo ka bnaruy na uri: Tndhuun ka Utux Tmninun, ado mttuku ku bale da. Uxe mpgaalu dheya ka tnabu dheya. 6Uxe ku mpgaalu dseediq dxeral nii. Qtai! Bbege mu ssiyo txtaxa namu ma baga dqbsuran paru ka seediq nii. Moda smeeliq dxeral nii ka dheya ma, uxe ku mdoi baga txtaxa daha. Rnengo Utux Tmninun ka nii.”
7Kiya de, mptabu ku dmiric pphqilun nii, kiya ka mqraqil ba ckceka rahul miric. Mdoi ku 2 hukuc, 1 we huwe kesun mu tmngayan, 1 we mpgaluk kesun mu tmngayan. So kiya de, tduwa mu tbugun ka rahul miric nii da. 8Cenga 1 idas, laxun mu ka 3 mtabu nii, ado tmraqil dheya ka lhebun mu, lhebun daha we tmraqil kenan uri. 9Kiya de rmengo ku: “Uxe ku mpnpusal ma mtabu yamu. Mphuqil we asi huqil, mpkuuka we kuuka, mnsngari na we uqu pphuqil nanak.” 10Mangal ku hukuc kesun mu huwe ma, gremun mu ma, ptuura ku wada mu laxun ka sndhegan mu kana seediq. 11Ali sndhegan ciida we wada laxun da. Ado mqraqil ba ckceka rahul miric we, qmita kenan de mpkeela kari Utux Tmninun ka nii. 12Mprengo ku dheya: “Nasi namu malu mesa ka qntaan namu de, biqi ku snadu. Ini namu sruwa de, asi laxi da!” Kiya de smeung mege 30 kretan pila ka snadu daha kenan ka dheya. 13Rmengo kenan ka Utux Tmninun: “Sai qmada skuwan sapah thmkuwan ka kiya. Pila dngusun daha mege kenan ka kiya!” Kiya de mangal ku 30 ging, sbege mu skuwan sapah thmkuwan. 14Dungal we gmerung ku tg2 hukuc kesun mu mpgaluk, ptuura ku wada mu laxun ka Yehudah ma gnaalu dmtswai Israel.
15Rmengo kenan ka Utux Tmninun: “Sai mangal ka qyqeya wada pkngeraq dmtabu. 16Ado, qtai! Mpheyu ku 1 mtabu dxeral hini. Uxe mqita mpphuqil, uxe migin wada mnugedang, uxe mpkmalu niqan luqah ma, uxe mptabu gaga mbeyax. Mosa rmequn mekan heyi miric mtbeno ma, mpsgaliq papak tnbugan ka heya.
17Smtali namu bale! Qmada rahul miric ka uka dungus mtabu,
meeyah hiqur baga ma doriq narac su ka hlmadac.
Hiqur baga na we mpkdengu,
mpkbudu ka doriq narac na.”
Currently Selected:
Jekaryah 11: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
