Jekaryah 1
1
Utux Baro we Mlawa Seediq Na Mpquri Heya
18 idas tg2 knkawas qbsranun paru Paras ka Daryawes, kari Utux Tmninun we dehuk Jekaryah mpgeela kari laqi Berekyah lqlaqi laqi Ido, rmengo: 2“Mnseang bale quri rdrudan namu ka Utux Tmninun. 3Rngage isu ka seediq Israel: Rmnengo so nii ka Utux Tmninun Mdoi Kana Supi: Asi namu ka mquri kenan ka yamu. Rnengo Utux Tmninun Mdoi Kana Supi ka nii. Kiya ka mpquri ku yamu ka yaku. Rnengo nii ka Utux Tmninun Mdoi Kana Supi. 4Iya puyu rdrudan namu. Mnlawa dheya ka dmpgeela kari: Rmnengo so nii ka Utux Tmninun Mdoi Kana Supi, asi namu ka brinah mlatac elu qnnaqah ma oda qnnaqah namu. Kiya we ida namu ini qbahang ma, ini namu puyu heya uri. Rnengo Utux Tmninun ka nii. 5Gaga inu ka rdrudan namu ho? Tduwa muudus ani knuwan ka dmpgeela kari ho? 6Kiya de kari mu ma gaya pndakar mu, kiya ka kari pnosa mu tnqliyan mu dmpgeela kari we, uxe wada betaq rdrudan namu da peni? Kiya de mbrinah ka dheya de, rmengo: Utux Tmninun Mdoi Kana Supi we, mpooda ndaan miyan mqita yami ka heya, kiya we wada so nii ka noda na heya.”
So Teutux Dapa Dumay
7Pkelu 11 idas tg2 knkawas Daryawes, kiya ka 24 ali idas Spiti ciida, kari Utux Tmninun we dehuk Jekaryah mpgeela kari laqi Berekyahu lqlaqi laqi Ido, rmengo: 8“Keeman, qmita ku, qtai! Niqan 1 seediq gisu paapa dapa dmay mtanah, gisu mheyu cenga ayu qqhuni qutirodux hiya. Gaga bukuy na ka dapa dmay mtanah, trbangan ma, bhege.” 9Slingan mu: “Bukung! Manu ka so nii ho?” Rmengo kenan ka skgulan baro rmnengo kenan: “Maanu ka gaga we rngage su mu.” 10Dseediq gaga mheyu cenga ayu qqhuni qutirodux hiya we rmengo: “Snkgulan Utux Tmninun, mooda qmita kana ddxeral ka nii.” 11Kiya de rmengo snkgulan Utux Tmninun gaga mheyu cenga ayu qqhuni qutirodux ka dheya: “Gisu miyan mkkesa qmita kana ddxeral, qtai! Gisu mtbale msange ka kana bobo dxeral.”
12Kiya de rmengo ka snkgulan Utux Tmninun: “Utux Tmninun Mdoi Kana Supi! Wada betaq 70 knkawas qnqihun su ka lualang Yerusalem ma Yehudah da, mpbetaq su knuwan uxe su mpgaalu ho?” 13Utux Tmninun we dmoi kari malu ma, kari smbeyax rmengo snkgulan rmengo heya. 14Kiya de rmengo kenan ka snkgulan Utux Baro rmnengo kenan: “Sai gmarang, rmnengo so nii ka Utux Tmninun Mdoi Kana Supi: Ririh Yerusalem betaq ku snhuur, ririh Sion betaq ku snhuur paru. 15Mseang ku bale ka dqlhangan gaga tbleyaq, ado mseang ku ani biciq de, krinah pqraqil smeeliq ka dheya. 16Kiya de rmengo so nii ka Utux Tmninun: Saya, mpbrinah ku mosa Yerusalem, ida ku mpgaalu ma, pbrnahun mu smmalu ckceka daha ka sapah thmkuwan mu ma, mosa bobo Yerusalem ka negul snuyuk bnlebil mu. Rnengo Utux Tmninun Mdoi Kana Supi ka nii. 17Kiya we mosa su gmarang dungal rmnengo kari so nii ka Utux Tmninun Mdoi Kana Supi: Mpkrana mtutuy dungal ka alang mu. Utux Tmninun we txalun na gmaalu dungal ka Sion, geegun na ka Yerusalem.”
Teutux so Urung
18Mquri ku baro qmita, qtai! Niqan 4 urung. 19Smiling ku snkgulan baro rmnengo kenan: “Maanu ka nii ho?” Cmiyuk ka heya: “Urung moda cmebu Yehudah, Israel ma, Yerusalem ka nii.” 20Utux Tmninun we spqita na kenan ka 4 mpqeepah. 21Slingan mu: “Meeyah hmuwa ka dseediq nii ho?” Cyukan ku na: “Urung moda cmebu Yehudah kiya, kiya ka uxe mptutuy ka tunux seediq. Kiya we meeyah smicu dqlhangan ka dmqeepah nii ma, moda smeeliq urung dqlhangan ka heya. Ado pnheyu urung mnoda smeeliq dxeral Yehudah ka dheya.”
Currently Selected:
Jekaryah 1: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
