Rute 4
4
Psterung Rute ka Boaj
1Mosa rhengun alang ka Boaj ma tleung hiya. Qtai! Tnlutuc ba kiya ka dehuk pririh mangal pusu dnoi na we mnoda hiya. Rmengo ka Boaj: “Lutuc mu, pquri hini ma, tleung hini.” Kiya de mquri hiya tleung ka heya. 2Boaj we mnlawa 10 rdrudan alang hiya ma rmengo dheya: “Braho namu eyah tleung hini.” Kiya de tleung kana ka dheya. 3Rmengo tnlutuc na ka Boaj: “Naomiy mnbrinah peeyah dxeral Moab we, bbrigun na ka dxeral Elimelek mtswai ta kiya. 4Lmngelung ku, asi ku ka ptuura rmengo isu: Smruwa su maruy dxeral kiya. Eniq berah dseediq gisu tleung ma rdrudan seediq mu nii, nasi su spririh maruy we asi prihi maruy! Nasi su ini sruwa pririh maruy de, rngagi ku hiya ma pklai ku. Ado wano bale isu, uka ka mplaale pririh maruy. Bukuy na de kiya ka yaku da.” Rmengo ka seediq kiya: “Yaku ka mpririh maruy.” 5Rmengo ka Boaj: “Maruy su dxeral nii peeyah baga Naomiy ma Rute mqedil Moab ciida, asi su ka brigun uri ka mqedil seediq wada mhuqil. Kiya ka maha niqan ngayan na lmutuc ka seediq mnhuqil.” 6Rmengo ka tnlutuc na kiya: “Nasi so kiya de uxe ku mpririh maruy da. So uxe mpseelaq pusu dnoi mu ka nii. Sai pririh maruy isu ka kiya di. Uxe ku mpririh maruy dhenu!”
7Cbeyo, asi ka moda psdehu maruy ani maanu ka seediq Israel, ani moda pririh maruy ma mbbaruy we, asi ka lmhelah ramil na pqita seediq bnaruy. So nii ka ooda daha pskraya psdehu. 8Rmengo Boaj ka tnlutuc ba: “Baruy isu nanak da!” Kiya de lmhelah ramil na ka Boaj. 9Kiya de rmengo rdrudan ma kana dseediq mneniq hiya ka Boaj: “Ali saya, yamu we seediq namu mpgkela kana. Kana nuElimelek, uxe uri we Kilyon ma Maxlon we, wada mu brigun peeyah baga Naomiy kana da. 10Ngalun mu mqedil mu ka Rute weewa Maxlon seediq Moab uri. Tai so maha niqan ngayan mtngari ka seediq mnhuqil. Ngayan na uri we, so uxe mpkuuka meniq ckceka pnswayan rudan ma lualang na ka ngayan na. Ali saya, yamu we seediq namu mpgkela kana.” 11Rmengo ka dseediq ma rdrudan tnleung rhengun hiya: “Seediq miyan mpgkela ka yami. Utux Tmninun we, tai so mntena Rajie ma Leah pnheyu sapah Israel ka mqedil mpremux sapah su uri. Dungal we nniqan su Eprat we maha msleelu bale ka noda su. Maha niqan malu ngayan su meniq Betlexem. 12Tai so Utux Tmninun we spooda na weewa nii mege lqlaqi mslutuc su. Tnsapah su we maha mntena Tamar mntuting Perec peeyah Yehudah.”
Knxalan Dlutuc Dawid
13So kiya de, ngalun mqedil Boaj ka Rute ma msuupu mtaqi heya. Kiya de Utux Tmninun we, spchedil na 1 laqi rseno ka heya. 14Rmengo Naomiy ka kana dmqedil: “Utux Tmninun we bale ba tndhuun! Ado saya we, ini na psteqi ka pusu lutuc su mpririh maruy pusu dnoi. Tai so maha mangal malu ngayan ckceka Israel ka laqi nii. 15Maha ptutuy kndesan su ka heya ma mpdanga rudan su ciida. Ado tnlaqi na ina sgaalu su riyung ka heya. Niqan su so nii ina we, mgkala niqan su 7 laqi rseno!” 16Ngalun Naomiy ka laqi, mexun na ma tqliun na. 17Dmqedil ssiyo tmngayan ngayan laqi nii ma rmengo: “Dmoi 1 laqi ka Naomiy da!” Kiya de Obed kesun daha tmngayan ka heya. Obed we kiya ka tama Yisay. Kiya ka baki rudan na Dawid.
18So nii ka ngayan dlutuc peeyah Perec. Perec we tnlaqi Iskariot Xecron. 19Iskariot Xecron we tnlaqi Ram. Ram we tnlaqi Aminadab. 20Aminadab we tnlaqi Naxson. Naxson we tnlaqi Salmon. 21Salmon we tnlaqi Boaj. Boaj we tnlaqi Obed. 22Obed we tnlaqi Yisay. Yisay we tnlaqi Dawid.
Currently Selected:
Rute 4: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020