Rute 3
3
Migin Stmaun Rute ka Naomiy
1Naomiy, pai Rute we, rmengo heya: “Laqi mqedil mu! Uxe ku mpiigin stmaun su ma sbleqan su ka yaku ho? 2Mtheyaq su riyung mqedil tnqliyan Boaj ka isu. Saya, uxe tnlutuc ta ka Boaj peni? Qtai! Gbiyan kiya de maha smebuc mugi phdagan hiya ka Boaj. 3Osa trima ma ricuh skenux heyi su ma, plkusi tgmalu lukus su. Betaq mhedu mekan ma mimah ka seediq kiya we, iya pgklai heya ka isu. 4Tqeraq ka heya ciida de, kuuruy ba qmita ka tqiyan na. Kiya de osa rmaguh pala gaga suubung papak na ma, taqi hiya ka isu. So mgmaanu ka ddaun su we rngagun su na hiya.” 5Rmengo ka Rute: “Kana tnugesa su kenan we, daun mu kana.”
6Kiya de Rute we mosa phdagan mugi hiya ka heya ma, muyu moda so kana tnugesa pai na. 7Mhedu mekan ma mimah ka Boaj, tqqaras riyung de, mosa mtaqi ssiyo gaga na gtuwan mugi hiya. Rute we kmngeele mosa ma rwahan na ka papak na ma, mtaqi hiya. 8Betaq ceka rabi de, mklui ka seediq kiya ma mspgeriq ka heyi na. Qtai! Niqan 1 weewa gisu mtaqi siyo papak na hiya. 9Rmengo ka heya: “Ima su ho?” Cmiyuk ka Rute: “Yaku we Rute tnqliyan su. Braho su bungi palic lukus su ka tnqliyan su. Ado isu we lutuc misu bale ma dehuk rmirih pusu dnoi miyan.” 10Rmengo ka Boaj: “Laqi mqedil! Tai so mangal su smbleqan Utux Tmninun ka isu. Maha mgkala knmalu tgberah ka kndwaun su bukuy. Ado rseno ani mbleyaq ma qrinuc we, ini su snegul ka isu. 11Laqi mqedil! Saya, iya kiicu. Kana rnengo su we, daun mu kana. Ado dseediq alang hini we, mkela mqedil su tgleus ka isu. 12Saya, yaku we bale ba lutuc su dehuk rmirih pusu dnoi su ka yaku. Kiya de we, niqan 1 nana ka smdaling ba tnlutuc sunan. 13Eniq hini ka keeman saya han. Mgrebu kusun, nasi ini sruwa moda ddaun tnlutuc ka heya de, maha malu ba, asi pdai lnglungan na kiya! Nasi ini sruwa ka heya. Mpsdehu ku Utux Tmninun muudus ani knuwan, mooda ku ddaun mu so tnlutuc ka yaku. Kiya de asi taqi hini betaq mgrebu.”
14Kiya de mtaqi siyo papak na betaq mgrebu ka Rute. Tai so uka seediq mkela heya ciida de mtutuy ka heya. Rmengo ka Boaj: “Iya pklai seediq mneyah phdagan hini ka mqedil.” 15Rmengo Rute dungal ka heya: “Adis hini ka lukus su mgbaro ma tkere dmoi.” Kiya de tkere dmoi lukus na tgbaro ka heya. Kiya de smeung 6 tbesan mugi paru ka Boaj ma, dmayo posa ahing Rute. Kiya de mosa mremux alang ka heya di. 16Mbrinah pai na hiya ka Rute de, rmengo heya ka pai na: “Laqi mqedil mu! Hmuwa di ho?” Rute we srengo na pai na kana ka noda seediq kiya. 17Dungal we rmengo: “Seediq kiya we, bnege 6 tbesan mugi paru ma, rmengo kenan: ‘Iya ba ksselo mbrinah pai su hiya.’” 18Rmengo ka pai na: “Laqi mqedil mu! Tara han! Qtai maha hmuwa mesa ka noda nii. Ado seediq kiya we, ini na qhdei moda ka noda nii we, uxe mpsange ka heya.”
Currently Selected:
Rute 3: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020