Roma 16

Kmdamac Dheya ka Poro

1Pgkela mu yamu ka Poibe mtswai ta mqedil. Heya we mpqeepah pssliyan ga Kegrei. 2Braho maku pooda pglengu mrtaso tnugsaan meeniq ckceka Bukung psteme heya. Kiya de nasi niqan dyagun ka heya we dyagi yamu. Ado wada dmayo ba hbaro seediq ka heya ma yaku ka dnyagan na uri.

3Yaa su mbeyax kesi ka Priska ma Akulas. Dheya we msuupu yaku qmeepah ckceka Kiristo Yesu. 4Dheya we ini daha krwahi ka knuudus daha. Mqaras ku bale dheya ma ani kana pssliyan icil qlhangan we ida mqaras dheya uri. 5Yaa su mbeyax kesi ka pssliyan ga sapah daha. Yaa su mbeyax kesi ka Epainetos sgaalu mu. Plaale ba snhii Kiristo meeniq Asia ka heya. 6Yaa su mbeyax kesi ka Maria. Mbqerus bale qmeepah ckceka namu ka heya. 7Yaa su mbeyax kesi ka dadal mu Andronikos ma Yonias dheya we tnheyaq nami meeniq sapah kuung. Niqan bale ngayan daha meeniq ckceka mrtaso tnugsaan. Dheya we pnlale yaku meeniq ckceka Kiristo. 8Yaa su mbeyax kesi ka Ampliatos dadal sgaalu mu meeniq ckceka Bukung. 9Yaa su mbeyax kesi ka tnheyaq kenan meepah ka Orbanos ma Staxus sgaalu mu bale. 10Yaa su mbeyax kesi ka Apelles heya we mnoda egu pnsengan ckceka Kiristo. Yaa su mbeyax kesi ka tnsapah Aristobul. 11Yaa su mbeyax kesi ka dadal mu Hrodion. Yaa su mbeyax kesi ka tnsapah Narkissos ga snhii Bukung. 12Yaa su mbeyax kesi ka Trupaina ma Trupusa, dheya we mdrumuc ba meepah Bukung. Yaa su mbeyax kesi ka Persis sgaalu mu, heya we mdrumuc meepah quri Bukung. 13Yaa su mbeyax kesi ka Rupos ma bubu na. Heya we gneegan ckceka Bukung ma bubu mu ka bubu na uri. 14Yaa su mbeyax kesi ka Asugkritos, Huylegon, Hermes, Patrobas, Xermas, ma mtswai ga theyaq dheya. 15Yaa su mbeyax kesi ka Pilologos, Yolia, Nereus ma mtswai na mqedil ma Olumpas ma kana mrtaso tnugsaan ga theyaq dheya. 16Daani mrtaso ba pnttnguhan ma ppkbeyax. Yaa namu mbeyax mesa ka kana Pssliyan Kiristo!

17Mtswai, ppswaye yamu, pskripuc yamu ma ptbrinah kari snlhayan namu ka seediq we, mdudul ku yamu, qlhangi ma iya theyaq dheya. 18Ado dseediq nii we ini qeepah Bukung ta Kiristo ka dheya. Wano nbuyas daha nanak ka pqpahan daha. Mooda beyuq walu kari ma knmalu kari psridil lhebun seediq ini kela qbriqun. 19Wada mkgarang betaq kana seediq ka thei namu. Maanu so kiya de mqaras ku yamu. Tai namu so mkela ba lmngelung ka quri malu, mngataq ka naqah noda. 20Kiya de mbege msbale lhebun ka Utux Baro we uxe beyo pqtmaqun na papak namu ka Satang. Tai so mpsuupu meeniq yamu ka huwe Yesu Kiristo Bukung ta!

21Yaa namu ga mbeyax mesa ka mtswai thean mu meepah Timoteos ma Rukios, Yasun, ma Sositatros. 22Yaa namu mbeyax meniq ckceka Bukung mesa ka Tertios mpririh kenan matis patis. 23Yaa namu ga mbeyax mesa ka Gaios, heya we psteme yaku ma psteme kana seediq pssliyan. Yaa namu mbeyax mesa ka Erastos mpqlahang pila ma Kuartos mtswai. 24Tai so mege huwe knkingal namu ka Yesu Kuartos Bukung ta. Ameng!

Tmdahu

25Wano Utux Baro ka mtduwa muyu malu kari gnarang mu ma Yesu Kiristo rnengo mu. Muyu ptuura lneing ini tgsaani peeyah cbeyo psdehu yamu. 26Ini tgsaani nii we nii na ptraun saya. Kiya de mnoda pnosa kari Utux Baro uka psteqan knuudus ma Patis Mrtaso mpgeela kari spgkeela hbaro seediq. So maha snhii ma thei ka dheya. 27Tai so knledax mnoda Yesu Kiristo psquri 1 ba Utux Baro niqan kana knkela betaq ani knuwan. Ameng!

Currently Selected:

Roma 16: Stgdaya

Highlight

Copy