Pntuura 5
5
Patis Pnatis ma Miric
1Taan mu ga dmoi patis pnatis narac baga na ka ga tleung tluungan. Ga spatis kana ka berah ma bukuy, ga qriun pskrean 7 ngayan pnskraya. 2Taan mu ka 1 snkgulan baro paru beyax ma hrenang na rmengo: “Ima ka mndungus rmaguh patis pnatis nii, rmaguh 7 ngayan pnskraya nii ho?” 3Ga meniq karac baro, dxeral ma, toma dxeral we, uka ka mtduwa rmaguh, uka ka mtduwa mita pnatis nii. 4Ado uka seediq ka mndungus rmaguh ma smepu pnatis kiya de, paru lingis mu da. 5Rmengo kenan ka 1 rudan mpqlahang: “Iya lingis, Tai, wada mbeyax ka rkelic rudu pneeyah 1 klegan Yehudah pnswayan rudan. Heya we gamil Dawid, mtduwa rmaguh pnatis ma, rmaguh 7 ngayan pnskraya.”
6Taan mu dungal ka tluungan ma 4 muudus. Kiya uri we ckceka drudan mpqlahang we ga mheyu hiya ka wawa miric. Mntena so pnhuqil. Niqan ka 7 urung ma 7 doriq. Kiya ka 7 Bgihur Utux Baro snkgulan na maha kana bobo dxeral. 7Meyah ka wawa miric nii, mangal pnatis peeyah narac baga ga tleung tluungan hiya. 8Mangal pnatis ka heya de, asi tgtemaq berah wawa miric ka 4 muudus ma 24 drudan mpqlahang. Dheya we dmoi tbugan, psaan snmalu king ga stenge malu sknexan. Malu skenux nii we, kiya ka dnurun kana mrtaso dsnheyi. 9Muuyas bgurah uyas ka dheya. Muuyas:
“Wano isu ka mndungus mangal pnatis,
mndungus rmaguh 7 ngayan pnskraya.
Ado wada phqilun ka isu, dmoi su dara su nanak,
maruy su seediq pneeyah knkingal klegan pnswayan rudan, knkingal klegan kari, knkingal klegan seediq ma, knkingal qlhangan. Kiya de bege su Utux Baro ka dheya.
10Dheya we wada su ngalan seediq ma mpsapuh nuUtux Baro ta.
Mpdoi beyax qbsuran paru bobo dxeral ka dheya.”
11Dungal we qtaan mu, mbahang ku hrenang snkgulan baro ga meniq ssiyo tluungan, muudus ma, drudan mpqlahang. Ini snqlingi smepu kmhbragan daha. 12Paru quwaq daha muuyas:
“Wawa miric wada phqilun we, mndungus mangal
pusu beyax, qnbleyaq, knkela, beyax,
paru spruun, knledax ma, tndhuun.”
13Ga mu bhangun uri ka kana ga meniq karac baro, dxeral, toma dxeral, ckceka rcilung ma, ckceka karac ma dxeral we, ga rmengo kana:
“Tai so tndhuun, paru spruun, knledax ma, pusu beyax,
maha bege ga tleung tluungan ma wawa miric,
betaq ani knuwan!”
14Rmengo ka 4 muudus: “Ameng!” Kiya de tgtemaq thmuku ka rudan mpqlahang.
Currently Selected:
Pntuura 5: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
