Pntuura 6
6
Rmaguh Ngayan Pnskraya
1Qmnita ku ga rmaguh tgkingal ngayan pnskraya ka wawa miric ciida de, mnbahang hrenang mntena bruwa ka 1 muudus ckceka 4 muudus. Rmengo kenan: “Aguh!” 2Qmita ku ciida, taan mu ka 1 dmay bhege. Ga paapa baro hiya we ga dmoi bheniq, niqan ka bunuh lmedax ga sbege heya. Meyah mccebu ka heya we, mbeyax ma ida mbeyax.
3Rmaguh tg2 ngayan pnskraya ciida ka wawa miric de, bhangan mu tg2 muudus ga rmengo: “Aguh!” 4Kiya de meyah dungal ka 1 dmay mtanah. Niqan ka pusu beyax ga sbege paapa dmay. Heya we maha gmeeluk msbale pneeyah bobo dxeral, seediq we mpsipaq mpphuqil. Dungal we mangal 1 paru ba hlmadac ka heya.
5Rmaguh tg3 ngayan pnskraya ka wawa miric de, bhangan mu ka tg3 muudus ga rmengo: “Aguh!” Kiya de mita ku. Taan mu ka 1 dmay mqalux. Ga paapa baro dmay we, ga dmoi seengan ka baga na. 6Qbhangan mu so hari niqan hrenang peeyah ckceka 4 muudus hiya, ga rmengo: “1 pila ging we maruy 1 kbegax mugi. 1 pila ging we maruy 3 kbegax mugi. Iya sliqi ka abura ma sino.”
7Rmaguh tg4 ngayan pnskraya ka wawa miric de, bhangan mu ga rmengo ka tg4 muudus: “Aguh!” 8Kiya de mita ku, taan mu ka 1 dmay mgqbulic. Ngayan na ka ga paapa bobo dmay nii we “Mhuqil!” Smnegul heya ka tuxan mnkuung. Niqan ka pusu beyax ga sbege dheya, kiya de tduwa dmoi hlmadac, krayan dxeral, mnarux qnhuqil ma, camac phuqil daha 1 tnugspatan bobo dxeral.
9Rmaguh tg5 ngayan pnskraya ciida ka wawa miric de, taan mu ga toma spuhan hiya ka utux bgihur dseediq pnhuqil ririh kari Utux Baro ma pnugkela. 10Paru hrenang na rmengo: “Mrtaso Bale ba Pusu Bukung, isu we ini su psggao seediq ga bobo dxeral. Dmayo su rmengo dara wada miyan psdara mpdehuk knuwan ka isu ho?” 11Kiya de txtaxa daha we wada biqan lukus bhege. Niqan ka pndakar na asi ka msange tikuh ka dheya, betaq tnqliyan mntena dheya, mtswai daha, mttuku ka seediq wada paqun mntena yamu ciida.
12Rmaguh tg6 ngayan pnskraya ciida ka wawa miric de, taan mu gisu lmgelu paru riyung ka dxeral. Wada mqalux ka hido mntena so nuqah ini snagi. Kana idas uri we wada mtanah mntena dara. 13Mtuting bobo dxeral ka pngerah baro, mntena qhuni nunuh ga slgelu paru bgihur, betaq mtuting ka gnheyi na ini khada. 14Mcilaq ka karac baro, mntena so pnatis gisu qriun. Dgiyaq ma dxeral biciq ckceka rcilung we wada hrigun pneeyah nniqan na. 15Dqbsuran paru bobo dxeral, dmpqlahang, dprparu mdudul, mbleyaq seediq, seediq mbeyax ma, kana ga ngalan tnqliyan, kana seediq mtraguh we, ga tgleing beling ma cngcenga tasil dgiyaq. 16Psquri dgiyaq ma tasil rmengo: “Takur psquri heyi nami! Leing miyan, pqduriq dqeras tleung tluungan ma seang wawa miric. 17Ado dehuk ka paru ali kseengan dhiya, ima ka mpdehuk mheyu ho?”
Currently Selected:
Pntuura 6: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
