Pntuura 3
3
Patis Pndesun Na Pssliyan Sardeis
1“Pdsani Patis ka snkgulan baro ga sapah thmkuwan Sardeis, rngagi: ‘Niqan 7 Bgihur Utux Baro ma 7 pngerah we, so nii ka kari na: Klaun mu noda namu, kiya ka ani ga muudus ka kesun ngayan su, bale ba we ga su mhuqil. 2Kiiyo ka isu, pgdehu ka mnsngari na, uxe beyo mphuqil. Ado mita ku qneepah su we, uka ani 1 ka mttuku na meniq berah Utux Baro. 3Maanu so kiya, lnglungi bale ka nangal namu ma bnhangan namu. Pyugi ma kmpryuxi lnglungan. Nasi su ini kiiyo, maha ku so mpgeeguy meyah. So knuwan ka eyah mu we, uxe su ba klaun. 4Ani so kiya we, niqan duma ka ini srutiq lukus daha ga Sardeis hiya. Mplukus lukus bhege msuupu yaku mosa. Ado mndungus mlukus ka dheya. 5So ka wada mbeyax we maha so nii plkusun bhege lukus, uxe mu sresun peeyah patis knuudus ka ngayan na. Yaku we meniq ku berah Tama, berah snkgulan baro ntama mu we, mpgkela ku ngayan daha. 6Kana niqan birac na we asi ka mbahang kari rnengo Bgihur Utux quri kana pssliyan.’”
Pnatis Na Pssliyan Piladelpeia
7“Ptsani patis ka snkgulan baro nsapah thmkuwan ga Piladelpeia, rngagi:
‘Kiya ka Mrtaso ma bale ba we,
ga dmoi rraguh Dawid.
Rwahan na de uka seediq ka tduwa meluk,
meluk de uka seediq ka tduwa rmaguh we, so nii ka kari na:
8Klaun mu ka qneepah su. Tai, wada mu psaun berah su ka rhengun ga mtraguh. Kiya ka uka seediq mtduwa meluk. Klaun mu niqan su biciq beyax, muyu su kari mu uri. Ini su dqwani ka ngayan mu. 9Pneeyah pnssliyan nSatang, Yudaya nami mesa duma na we, bale ba uxe seediq Yudaya ka dheya, gisu mberiq. Pyahun mu pthmuku berah papak su ka dheya. So daha maha klaun gmaalu ku isu ka yaku. 10Ado wada su ndwaun muyu ka kari quri ndaan mu knremun. Qnlhangan su mu ali psengan mmeyah kana bobo dxeral ppseung na kana seediq. 11Asi ku eyah. Ndwai dmoi ka ga su dooyun. So uxe yahun gmeeluk seediq ka bunuh su lmedax. 12So ka wada mbeyax ka seediq we, ngalun mu eruc ckceka Sapah Mrtaso Thmkuwan nuUtux Baro mu. Heya we ida uxe mplatac pneeyah hiya da. Patis mu bobo heya ka ngayan Utux Baro mu, ngayan alang Utux Baro mu ma, bgurah Yerusalem ma bgurah ngayan mu pneeyah baro ga niqan Utux Baro mu. 13Kana niqan birac na we asi ka mbahang kari rnengo Bgihur Utux quri kana pssliyan.’”
Pnatis Na Pssliyan Raodikeia
14“Ptsani ka snkgulan baro nsapah thmkuwan ga Raodikeia, rngagi: ‘Kiya ka Ameng, pgkela mtduwa stmaan ma bale ba, pusu kana pnyahan smnalu Utux Baro we, so nii ka kari na: 15Klaun mu ka ndaan su. Ini su ktleetu ma ini su ktilux uri. Nasi su ba mtleetu uxe uri we nasi su mtilux. 16Nasi mntena su so qsiya muuxul, ini ktletu ma ini ktilux. Kiya de pberih su mu peeyah quwaq mu. 17Rmengo su ka isu: Yaku we mbleyaq ku, wada egu qnbleyaq su da ma, uka ka ini knttuku. Kiya we ini su klai ka mqraqil su, so sgaalu, qrinuc, mbudu ma, mbberas. 18Mpdudul ku sunan, brigi king pseengan puniq pneeyah kenan qqbleyaq su. Kiya uri we brigi lukus bhege ma plkusi, so uxe pptuura ka qqsiqa knbberas su. Kiya uri de brigi iyu doriq pneeyah kenan rricuh su doriq, so su maha mita. 19Kana sgaalu mu we, ida mu psruun tmgesa. So kiya de, kdrumuc ka isu ma pryuxi lnglungan su uri. 20Tai, mheyu ku rhengun ma tmatuk ku. Nasi mbahang hrenang mu ma rmaguh rhengun we, mpteme ku hiya. Yaku ma heya, heya ma yaku mpsuupu nami mekan ido. 21Wada mbeyax we, bege mu heya ka mptheyaq tleung tluungan mu. Mntena so Yaku we wada ku mbeyax, mtheyaq ku tleung tluungan Tama mu. 22Kana niqan birac na we asi ka mbahang kari rnengo Bgihur Utux quri kana pssliyan.’”
Currently Selected:
Pntuura 3: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
