Pntuura 2
2
Patis Pdesun Na Pssliyan Epesos
1“Pdsani patis ka snkgulan baro ga sapah thmkuwan Epesos, rngagi: ‘Ga dmoi 7 pngerah narac baga na, ga mkkesa ckceka 7 pcmagan king we, so nii ka kari na: 2Klaun mu ka qneepah su, bnqerus ma, knrmenan su. Klaun mu duri ka ini su srwai ka seediq naqah. Pnsseengan su ka kesun snkgulan we uxe bale ba snkgulan. Klaun su dheya we uxe bale ba. 3Dehuk su knremun, ririh ngayan mu mnbqerus namu ma ini namu kuuwic. 4Kiya de, niqan ka pseru mu sunan, kiya ka wada su sqada ka gnaalu su mnugaya di. 5Maanu kiya ka, psbrnahi lmngelung ka pnyahan su mtuting. Kiya uri we pryuxi lnglungan su ma, qpahi ka qnpahan su mnugaya. Netun su ini priyux lnglungan de meeyah ku sunan hiya, hrigun mu peeyah nniqan na ka pcmagan su. 6Ani so kiya we, niqan 1 malu qneepah su. Kiya ka tmraqil su qneepah Nikolaites. Pqnqihun mu ka ndaan nii uri. 7Kana niqan birac na we asi ka mbahang kari rnengo Bgihur Utux quri kana pssliyan. Mbeyax na we, bbege mu pqdalun mu heya ka heyi qhuni knuudus ga dxeral qbleqan nuUtux Baro.’”
Patis Pdesun Na Pssliyan Smurna
8“Pdsani patis ka snkgulan baro ga sapah thmkuwan Smurna, rngagi: ‘Kiya ka tnugeela ma tnhiti, mnhuqil ma wada muudus dungal we, so nii kari na: 9Klaun mu ka qnraqil su ma qnqrinuc su. Bale ba we mbleyaq su. Klaun mu duri ka kari snngayan na seediq ku Yudaya ka yaku mnesa kiya. Bale ba we uxe seediq Yudaya ka dheya. Seediq mpqlahang pssliyan nSatang ka dheya. 10Iya kcugi ka ddaun su mqraqil. Tai! Qbsuran Bgihur Naqah we psaun na sapah kuung ka duma namu, pdaun namu na psseung. Yamu we maha namu mk10 ali moda mqraqil. Isu we asi su ka thei ani betaq mhuqil, so kiya de bege misu bunuh knuudus. 11Kana niqan birac na we, asi ka mbahang kari rnengo Bgihur Utux quri kana pssliyan. So ka wada mbeyax we uxe pnpusal mhuqil.’”
Patis Pdesun Na Pssliyan Pergamos
12“Pdsani Patis ka snkgulan baro ga sapah thmkuwan Pergamos, rngagi: ‘Ga dmoi hlmadac mcciyuk mhungul ngayus we, so nii kari na: 13Klaun mu ka nniqan su. Kiya ka ga niqan tlungun Satang. Ga meniq ckceka namu ka Antipas mpkela kari stmaan, ga phqilun niqan Satang hiya ciida we, mbeyax su tgdehu ngayan mu. Ini su lixi ka snhiyan su kenan. 14Kiya de, niqan tikuh ka pseru mu kari sunan. Kiya ka ga muyu tnugesa Bilam ka duma namu hiya. Bilam nii we kiya ka dmnudul Balaq posa btunux pkktakur berah seediq Israel, kiya ka eekan daha snapuh tikung ma mkmhemuc moda mnbesu truma. 15Mntena so nii uri, so kiya yamu hiya duri, ga namu muyu tnugesa Nikolaites ka duma namu. 16Maanu so kiya, pryuxi ka lnglungan su. Nasi su ini kmpriyux lnglungan de, maha ku asi eyah sunan, mdoi ku hlmadac ga quwaq mu meyah cmebu dheya. 17Kana niqan birac na we, asi ka mbahang kari rnengo Bgihur Utux quri kana pssliyan. So ka wada mbeyax we bege mu heya ka mana lneing mu. Biqun mu heya 1 btunux bhege, bobo btunux hiya we ga btasan ngayan bgurah. Wano seediq mnangal snhiyan we, uka seediq mpkela.’”
Patis Pdesun Na Pssliyan Tuateira
18“Ptsani patis ka snkgulan baro ga sapah thmkuwan Tuateira, rngagi: ‘Laqi Utux Baro, kiya ka mntena puniq ka doriq na, papak na we mntena xiluy limuk kiya we, so nii kari na: 19Klaun mu ka ndaan su: Gnaalu, snhiyan, kndrumuc ma knrmenan su. Klaun mu uri, qnpahan su thiti we mgkala qnpahan su mnugaya. 20Kiya de, niqan 1 ka pseru mu sunan. Kiya ka Ijebel mqedil mpgeela ku kari mesa we, srwaun su meyah dmudul dtnqliyan mu ma, tmraki dheya moda mkmhemuc mbesu truma ma, mekan uqun snpuhan tikung. 21Wada mu biqun hiya ka ali ppriyux na lnglungan. Ani ini na kmpryuxi ka ndaan na mkmhemuc msuupu. 22Tay! Pkrnexun mu mnarux bobo qlapo ka heya. Netun ini kmpriyux lnglungan noda daha ka dseediq mnsuupu heya moda mkmhemuc mbesu we, pntnaun mu hiya maangal paru mqraqil. 23Phqilun mu ka lqlaqi na uri. So kiya de maha mkela ka kana pssliyan, mita ku lhebun seediq ka yaku. Mciyuk ku noda txtaxa namu. 24Quri so duma seediq Tuateira we, kiya ka kana ini thei kari nii, ini kela kari lneing daha Satang we, rngage maku, uxe ku mbege knchedil napa yamu dungal. 25Wano kgdehu dmoi ka ga namu dooyun betaq ku meyah. 26So ka wada mbeyax ma muyu kari pnosa mu betaq qnhdean we,
bege mu heya ka beyax mpqlahang kana qnlhangan.
27Heya ge, mdoi hukuc xiluy mpqlahang dheya,
mntena so ptnemu ppsaan snmalu dxeral.
28Mntena so pusu beyax nangal mu peeyah Tama. Bege mu heya ka pngerah pscaman uri. 29Kana niqan birac na we, asi ka mbahang kari rnengo Bgihur Utux quri kana pssliyan.’”
Currently Selected:
Pntuura 2: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
