Pntuura 1
1
Kari Pnlaale Ma Smbeyax
1Pntuura Yesu Kiristo, kiya ka bnege Utux Baro we ppqita na dtnqliyan na ka ooda mmeeyah nhari. Heya we smnkagul snkgulan pgkela tnqliyan na Yohane. 2Yohane we spkela na ka kari Utux Baro ma pnkela Yesu Kiristo. Kana qnita na we spkela na kana. 3Smepu kari pnugeela patis nii, mbahang ma muyu pnatis meepah na we mbleyaq kana. Ado daling ka ali da.
4-5Yohane we mpitu sapah pssliyan ga Asia ka spatis na patis. Tai so meniq saya, cbeyo ma, nexal betaq ani knuwan ka Utux Baro, mtheyaq 7 Bgihur berah tluungan knledax na, pgkela malu stmaan ma, tgberah ba muudus peeyah hnqilan, pusu qbsuran paru kana qbsuran bobo dxeral Yesu Kiristo we, mege huwe ma mptbale lhebun yamu.
Gmaalu ita ka heya, dmoi dara na rmaguh ita peeyah qnquwan noda ta. 6Wada ta na ngalan seediq qnlhangan na ma, maha msapuh nuUtux Baro Tama na. Tai so meniq Yesu Kiristo ka knledax ma beyax qnlahang ani betaq knuwan. Ameng!
7Tai, mpsuupu plabu meyah ka heya.
Mqita heya ka kana seediq.
Ani bnetaq heya we mqita heya uri.
Ririh heya mptngedux lmingis kana ka klegan seediq bobo dxeral.
Bale ba ka nii. Ameng!
8Rmengo ka Utux Baro Bukung: “Yaku ka Arhwa, Yaku ka Umiga. Kiya ka pusu beyax meniq saya, cbeyo ma, nexal betaq ani knuwan.”
Mtqita Yohane ka Kiristo
9Yaku we Yohane mtswai namu, meniq ku ckceka Yesu msuupu yamu niqan pnugluban, mqraqil, qnlhangan ma, knrmenan. Ririh kari Utux Baro ma meyah ta pgkela Yesu, mneniq ku Patmos kesun dxeral biciq ckceka rcilung. 10Niqan 1 ali Bukung, spooda ku na Bgihur Utux, mbahang ku hrenang paru so iyuk urung ga peeyah bukuy mu. 11Rmengo: “Ptsani patis ka nii su qtaan, pdsani mpitu sapah pssliyan, Kiya de Epesos, Smurna, Pergamos, Tuateira, Sardeis, Piladelpeia hiya ma Raodikeia.”
12Kiya de mspgeriq ku heyi mqmita ku hrenang nima ka ga rmengo yaku. Mnspgeriq ku de, taan mu ka 7 pcmagan king. 13Ckceka pcmagan kiya we niqan 1 mntena Laqi seediq, mlukus lukus rila betaq papak, hbikan habik king ka hwinuk na. 14Tunux ma snuunux na we bhege, mntena ubal miric, mntena huda. Doriq na we mntena rana puniq. 15Papak na we mntena xiluy limuk tqwilaq ga slmeun hhngedan xiluy. Hrenang na we so hrenang knrahul qsiya. 16Narac baga na we ga dmoi 7 pngerah. Cmriyu peeyah quwaq na ka hlmadac mhungul riyung mtdaha msciyuk ngayus. Dqeras na we mntena qerung hido lmedax.
17Mita ku heya de, asi ku tgtemaq berah papak na so ku ba seediq mhuqil. Sdoi na heyi mu ka baga na narac rmengo: “Iya kiicu. Yaku we tnugeela ma tnhiti, 18muudus ku ani betaq knuwan duri. Mnhuqil ku, tai, nii ku muudus ma, muudus ku ani betaq knuwan. Kiya uri we gisu ku dmoi rhruhu hhuqil ma tuxan mnkuung. 19Maanu kiya de, ptsani kana ka ntaan su, noda saya ma ddaun mmeeyah thiti. 20Quri so ntaan su lneing kari 7 pngerah ma 7 pcmangan king ga narac baga mu we, so nii: 7 pngerah we kiya ka 7 pssliyan, 7 pcmangan we kiya ka 7 sapah pssliyan.”
Currently Selected:
Pntuura 1: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
