Pntuura 19
19
1Bobo na de, mbahang ku so hari mntena hbaro seediq paru ba hrenang daha ga baro:
“Hareruya!
Huwe mdoi baga, knledax ma, pusu beyax nuUtux Baro ta kana.
2Psgeegan na we bale ba ma msderux noda.
Ado heya we pkdraun na ka paru mqedil kkbrexun,
wada na sdoi knbesu noda na smeeliq bobo dxeral.
Dmayo rmengo tnqliyan na ka Utux Baro,
cmiyuk mqedil kkbrexun mnoda psdara tnqliyan na.”
3Rmengo dungal ka dheya:
“Hareruya!
Tqrengul mpsqama mqedil kkbrexun nii we mquri baro, betaq ani knuwan.”
4Kiya de 24 rudan mpqlahang ma 4 muudus de tgtemaq thmuku Utux Baro ga tleung tluungan. Rmengo:
“Ameng. Hareruya!”
Uqan Rayi Wawa Miric
5Kiya de, niqan hrenang pneeyah tluungan, rmengo:
“Kana dtnqliyan Utux Baro!
Kana miicu heya we,
ani prparu ma bcbiciq we
asi ka tndahu Utux Baro ta kana!”
6Mbahang ku mntena hrenang hbaro seediq, mntena so hrenang qsiya, mntena so hrenang paru bruwa, ga rmengo:
“Hareruya!
Ado Bukung, Utux Baro ta,
Bukung Mdoi Kana Beyax, gisu mqbsuran paru da!
7Tqqaras ta mqaras ka ita,
sbege ta hiya ka knledax.
Ado dehuk ka pstrengun wawa miric da,
mnhedu psramal ka mqedil na da.
8Mqedil na we mnangal huwe mtduwa mlukus lukus tnunan malu ware keguy bhege riyung:
Lukus malu ware keguy nii we kiya ka mnsderux noda dseediq mrtaso.”
9Rmengo kenan ka snkgulan baro: “Ptsani isu ka nii, kana ga splawa meyah ray wawa miric we mbleyaq bale!” Rmengo yaku dungal: “Kana nii we kiya ka bale ba kari Utux Baro.” 10Kiya de tgtemaq ku berah papak na kmpthmuku ku heya. Rmengo kenan ka heya: “Iya bale kchaya! Yaku ma isu, mtswai pgkela Yesu we ida to tnqliyan kana. Thmuku Utux Baro ka isu.” Ado dseediq pgkela Yesu we niqan bgihur kari mpgeela daha.
Seediq Paapa Dumay Bhege
11Bobo na de, taan mu nii traguh ka karac baro da. Niqan 1 dmay bhege, ngayan paapa bobo dmay hiya we: “Mtduwa stmaan” ma “Bale”. Heya we dmoi msderux noda psgeegan ma mccebu. 12Mntena puniq ka doriq na, ga kbunuh egu bunuh knledax ka tunux na. Heyi na we ga spatis 1 ngayan. Wano hiya nanak ka mkela, uka ani ima ka mkela. 13Mlukus lukus rnbegan dara. Ngayan na we kesun “Kari Utux Baro”. 14Paapa dmay bhege ka dsupi baro, mlukus lukus bhege ma uka qnrutiq snmalu malu ware keguy ka dheya smnegul heya. 15Niqan hlmadac mhungul riyung mcriyu pneeyah quwaq na, sdoi na ssebuc kana qnlhangan. Heya we mpdoi hukuc xiluy mpqlahang dheya. Kiya uri we maha qmleqah qpean lipas ga stngayan seang Utux Baro. 16Lukus na ma bteriq na we ga spatis ngayan “Qbsuran paru kana qbsuran paru, bukung kana bukung”.
17Taan mu dungal ga mheyu ckceka hido ka 1 snkgulan baro. Paru diras na mquri qbheni ga skiya karac baro, rmengo: “Aguh msseli ray paru nuUtux Baro. 18So namu maha mekan heyi qbsuran paru, heyi mdudul, heyi mbeyax, heyi dmay ma tnaapa dmay mmaha na, heyi kana seediq mtrraguh, heyi tnqliyan ma, heyi pspruwan ma tgbiciq.”
19Taan mu dungal ga msseli ka camac kiya ma dqbsuran paru bobo dxeral ma, supi daha. Mptgdiyal ga paapa dmay bhege ma dsupi na. 20Wada daha qrapun ka camac kiya di. Wada thiqan camac qmeraq ka mnnangi mpgeela kari, kiya ka qmneepah sklwiun noda, mnoda psridil seediq mangal ngayan pnskraya ma thmuku tikung camac. Ddaha daha we wada muudus bale sqada ckceka rcilung puniq ga sqama hiya. 21Msngari na de wada phqilun hlmadac pneeyah quwaq ga paapa dmay bhege. Wada mtengi riyung mekan heyi daha ka kana qbheni ga skiya.
Currently Selected:
Pntuura 19: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
