Pntuura 14
14
Uyas 14 Mang 40'00 Seediq
1Qmita ku dungal we, taan mu ga mheyu dgiyaq Sion ka wawa miric, msuupu heya we niqan 14 mang 40'00 seediq. Dheya we niqan ngayan na ma ngayan tama na ga spatis kduruk daha. 2Mbahang ku hrenang pneeyah karac baro, mntena so hrenang qsiya ma hrenang bruwa paru. Bnhangan mu hrenang we mntena so tubu ga tbugan mptubu. 3Dheya we ga muuyas bgurah uyas meniq berah tluungan, ga msuupu 4 muudus ma rudan mpqlahang. Wano 14 mang 40'00 seediq bnaruy pneeyah bobo dxeral nii, uka seediq mkela muyas uyas nii. 4Dheya we ini bale telung mqedil, mntena so laqi ka heyi daha. Mosa inu ka wawa miric de mosa inu smnegul ka dheya uri. Dheya we bnaruy pneyah bobo dxeral. Mntena so gnhiyan plaale ga sbege Utux Baro ma wawa miric. 5Quwaq daha we uka gimun kari mberiq. Dheya we uka bale ka qnnaqah daha.
Kari 3 Snkgulan Baro
6Qtaan mu dungal ka 1 snkgulan baro ga skiya karac baro. Niqan malu kari ani betaq knuwan, saun na gmarang seediq ga meeniq bobo dxeral, kiya ka knkingal qnlhangan, knkingal klegan rudan, knkingal klegan kari ma, knkingal klegan seediq. 7Paru hrenang na rmengo: “Kiicu Utux Baro, bqani heya ka knledax. Ado dehuk ka ali psgeegan Utux Baro da. Thmkui ka Bukung snmalu karac, dxeral, rcilung ma, hrean qsiya.”
8Dungal we tg2 snkgulan baro lmutuc rmengo: “Mtakur da! Kiya ka pnimah sino mnhemuc mbesu toma ma paru seang ka paru ba Babirun we mtakur da!”
9Niqan dungal tg3 snkgulan baro lmutuc dheya paru hrenang na rmengo: “Nasi thmuku camac kiya ma tikung camac kiya we, ga niqan pnskraya kduruk, uxe uri we pnskraya ga meniq baga daha. 10Dheya we mpiimah sino paru seang Utux Baro. Sino nii we ga stngayan sino bale ba seang Utux Baro. Maha mqraqil berah mrtaso snkgulan baro ma wawa miric, meeniq ckceka puniq ma srana btunux hiya. 11Qrengul pqraqil dheya we ga mgkala baro betaq ani knuwan. Tnhmuku camac ma tikung camac we, mnangal pnskraya ngayan na we, ani gbiyan ani keeman uxe mpbale ka lhebun daha.”
12So nii de, muyu kari pnosa Utux Baro ma seediq snhii pgbale snhii bale kari Yesu we asi ka knremun.
13Mbahang ku hrenang pneyah baro rmengo: “Ptsani, peeyah saya, dseediq mnhuqil ckceka Bukung na we mbleyaq da.” Rmengo ka Bgihur Utux: “Ida bale ba. Dheya we maha mangal ssange daha pneyah rebuk daha nanak. Ado gnhiyan qneepah daha we ida mpsnegul dheya ani knuwan.”
Qbrungun ka Ga Bobo Dxeral
14Qmnita ku dungal, taan mu niqan 1 plabu bhege, bobo ga tleung hiya we mntena so Laqi seediq. Tunux na we ga kbunuh bunuh knledax king. Baga na we ga dmoi kagoh qburung mhungul riyung. 15Niqan 1 dungal ka snkgulan baro pneeyah Sapah Mrtaso Thmkuwan, mquri ga tleung bobo plabu, paru ba hrenang na mlawa: “Psai kagoh qburung su ma qbrungi. Ado dehuk ka ali qbrungun da. Mhada bale kana ka qqbrungun ga bobo dxeral da” 16Maanu so kiya de, ga tleung bobo plabu we pqriun na bobo dxeral qmada ka kagoh qburung na, kiya de ga qburung qqbrungun daha ka bobo dxeral da.
17Dungal we 1 snkgulan baro mcriyu pneeyah Sapah Mrtaso Thmkuwan ga baro. Heya we ga dmoi 1 kagoh qburung mhungul uri. 18Dungal we 1 snkgulan baro mcriyu pneyah spuhan, heya we kiya ka niqan pusu beyax mpqlahang puniq. Heya we mquri ga dmoi kagoh qburung, paru ba hrenang na mlawa: “Psai ka kagoh qburung mhungul su, psseli gnheyi lipas, ado mhada ka lipas da.” 19Snkgulan baro we ga na spquri bobo dxeral qmada ka kagoh qburung na. Psseli lipas, sqada na paru qpean lipas niqan paru seang Utux Baro. 20Ga qqahan nganguc alang ka qpean lipas kiya. Niqan dara qluli pneeyah qpean lipas, qlliyan na we stenge mntena xiluy quwaq dmay knbaro. Maha so 16'00 stati knbragan na.
Currently Selected:
Pntuura 14: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
