Pntuura 13
13
2 Camac
1Taan mu dungal ka 1 camac mnkala pneeyah rcilung, niqan 10 urung ma 7 tunux. Ga kbunuh 10 bunuh knledax ka 10 urung. 7 tunux hiya we niqan ngayan ssngayan. 2Qtaan mu camac we mntena rkelic. Papak na we mntena papak sume, quwaq na we mntena quwaq rkelic rudu. Quyu ubung we sbege na heya kana ka beyax na, tluungan na ma, paru pusu beyax na. 3Ckceka qntaan mu ka tunux camac we, so hari ga niqan paru luqah na, luqah na we wada pklmeun da. Mskluwi kana ka seediq bobo dxeral, kiya de smnegul camac kiya. 4Thmuku quyu ubung kiya ka dheya. Ado wada na sbege camac ka pusu beyax na. Kiya uri we thmuku camac kiya, rmengo: “Ima ka maha so camac nii? Ima ka mpdehuk mccebu heya ho?”
5Quyu ubung we biqan na quwaq psparu rmengo naqah kari ka camac kiya. Kiya uri we biqan na pusu beyax mtduwa meepah 42 idas. 6Kiya de rmaguh quwaq na mquri Utux Baro rmengo kari sngayan ka heya. Smngayan ngayan Utux Baro ma kobu na, kiya ka ga meniq karac baro. 7Ga srwaun tgdiyal seediq snhii, kiya de wada mbeyax. Wada biqan pusu beyax uri, tduwa muruc knkingal klegan rudan, knkingal seediq, knkingal kari ma knkingal qnlhangan. 8Kana mneniq bobo dxeral, ngayan daha we ini ptsani patis knuudus wawa miric wada phqilun pneeyah snlmean bobo dxeral ciida we, maha thmuku heya kana.
9Kana niqan birac na we qbahang kana!
10Ida glekun ka ani ima we, asi ka glekun.
Ida phqilun hlmadac ka ani ima we, asi ka phqilun hlmadac.
So nii de, seediq snhii de asi ka knremun ma snhii.
11Qmita ku 1 camac dungal mcriyu pneeyah dxeral. Heya we niqan 2 urung na, mntena wawa miric. Rmengo kari we mntena quyu ubung. 12Heya we moda meepah pusu beyax tgkingal camac meniq berah tgkingal camac. Kiya uri we pthmuku na tgkingal camac wada pklmeun luqah ka dxeral ma seediq meniq bobo dxeral. 13Qmeepah paru pnskraya ka camac nii. Meniq berah seediq mtduwa ptuting puniq dxeral peeyah karac baro. 14Wada mangal pusu beyax ka heya de mtduwa meepah pnskraya noda meniq berah tgkingal camac. Kiya de bale ba psridil seediq bobo dxeral, tmgesa dheya ssmalu tikung camac mnoda mluqah hlmadac kiya. 15Dungal niqan pusu beyax wada biqan heya, so maha niqan beyax ka tikung camac, mtduwa rmengo uri. Kiya ma seediq ini thmuku camac nii de wada paqun kana.
16Dungal we kana seediq, ani rudan ma laqi, qrinuc ma mbleyaq, tnpusu ma tnqliyan we, pskrean na matis ka narac baga daha, uxe uri we kduruk daha pskrayun na. 17So kiya de, kana ga niqan pnskraya, niqan ngayan camac ma, niqan spegan ngayan camac we, ini tduwa maruy ma mbaruy. 18Quri so nii we, asi ka niqan kkela. So ka seediq mkela lmngelung na we maha rmaguh spegan nii. Ado spegan 1 seediq ka nii, spegan nii we 6'06.
Currently Selected:
Pntuura 13: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
