Pntuura 11
11
2 Seediq Mpgkela
1Niqan 1 brhengil, mntena so hukuc seengan sbege ku na yaku. Kiya uri we rmengo: “Tutuy! Seung ka Sapah Mrtaso Thmkuwan nuUtux Baro, spuhan ma, seediq ga thmuku hiya. 2Wano nganguc Sapah Mrtaso Thmkuwan we iya spengi kiya. Ado bege seediq icil qlhangan ka kiya. Dheya we maha 42 idas qmreqah alang mrtaso.”
3“Mbege ku pusu beyax 2 seediq mpgkela mu. Dheya we mplukus lukus mnbasi 12'60 ali mprengo kari pgeela.” 4Dheya we kiya ka daha qhuni curung ma daha pcmagan ga mheyu berah Bukung bobo dxeral. 5Nasi kmpluqah dheya ka ani ima we, mpcriyu pneeyah quwaq daha ka puniq, mphuqil pais. Kana kmpseeliq heya na we maha so nii phqilun. 6Daha seediq nii we niqan pusu beyax meluk karac. Dheya uri we tduwa ini pquyux ali pllayan na rmengo. Niqan pusu beyax daha maha so dara ka qsiya. Kiya uri we ani knuwan dehuk dmoi lmlamu pqnaqah smebuc dxeral ma kana tnlangan. 7Dheya we mnhedu pgkela ciida de, meyah mccebu dheya ka camac pcriyu pneeyah rangah uka pusu, maha mbeyax ma, phqilun na ka dheya. 8Maha mtakur elu paru alang hiya ka bqerus daha. Squri ta bgihur we Sedom ma Micrayim ka ngayan daha. Kiya ka nniqan wada spteetu jyujika hiya ka Bukung daha. 9Pneeyah kana seediq, knkingal klegan rudan, kana klegan kari ma, kana qnlhangan we teru ali dmeka ka yahan daha sdmeho bqerus na. Kiya uri we ini daha srwai peeniq truma habung ka bqerus na. 10Dseediq meniq bobo dxeral we ririh so heya maha tqqaras bale ppbege bbege. Ado 2 mpgeela kari nii we mnoda pqraqil seediq ga meniq bobo dxeral. 11Bobo teru ali dmeka de, mremux ckceka daha ka hengak knuudus pneeyah Utux Baro, kiya de asi tutui da. Mnita dheya ka seediq de miicu riyung. 122 mpgeela kari nii de, mnbahang hrenang pneyah karac, rmengo: “Eyah bobo hini.” Kiya de paapa plabu mnkala karac baro duma, qmnita dheya ka pais daha uri. 13Gisu bale ciida, nii mlgelu paru ka dxeral. Wada mtakur 1 tnugmxalan ka alang. Ado runu wada mhuqil we niqan 70'00 heyi. Mnsngari na hiya we mskluwi bale, tmdahu Utux Baro ga baro.
14Wada hmrinas ka tg2 mqraqil. Tai, asi eyah ka tg3 mqraqil.
Tg7 Iyuk
15Miyuk ka tg7 snkgulan baro, niqan hrenang paru pneeyah baro rmengo:
“Qnlhangan bobo dxeral we wada ma Bukung ta ma pnheyu na qnlhangan Kiristo da.
Heya we mpqbsuran paru ani betaq knuwan!”
16Ga berah Utux Baro, tleung tluungan daha ka 24 rudan mpqlahang we tgtemaq thmuku Utux Baro kana. 17Kiya de rmengo:
“Bukung saya ma ncbeyo, Utux Baro Pusu Beyax,
mqaras nami sunan!
Ado wada su dmoi paru beyax mqbsuran paru da.
18Msqama seang na icil qnlhangan,
dehuk ka seang su da.
Gisu dehuk ka ali psgeegan wada mhuqil uri da.
Tnqliyan su mpgeela kari, seediq snhii ma, miicu ngayan su we,
peeyah paru betaq biciq dehuk ka ali ngalun daha snadu da.
Ali su mpselaq smneeliq dxeral na we dehuk uri da.”
19So kiya de, wada rwahan ka Sapah Mrtaso Thmkuwan nuUtux Baro ga baro, meniq ckceka Sapah Mrtaso Thmkuwan hiya we, mtqita ka kulu pnsdhegan na. Bobo na de niqan tqwilaq, hrenang, sbruwan, mrunu ma, qmuyux huda.
Currently Selected:
Pntuura 11: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
