Yehudah 1
1
1Tnqliyan Yesu Kiristo, mtswai Yakobu ka Yehudah we, paadis ku patis dseediq pnlawa Utux Baro, ga sgaalu Tama ta Utux Baro ma, ga qnlhangan Yesu Kiristo ka spatis nii. 2Tai so uumal yamu ka huwe, mtbale lhebun ma, gnaalu.
Maangal Pnkdira ka Mberiq Mptgesa
3Kana sgaalu mu, kmpatis ku bale patis yamu ka yaku, mkmrengo ku quri knuudus nangal ta. Kiya de asi ku ka matis patis yamu saya mesa ku. So ta maha tbyaxun moda ka kari bale ba bnege mrtaso snkgulan cuuxal. 4Ado gmruus mremux ka duma seediq. Kiya ka dseediq ga ngalun pkdraun ma ini kstuutux na. Dheya we gisu daha ngalun mnmhemuc kkraguh daha heyi ka gnhuwe Utux Baro ta. Dheya uri we ini pgkela wano kingal ba Yesu Kiristo Bukung ta ka pusu na.
5Kana noda so nii we, ani namu klaun we, mpdakar ku yamu na: Cbeyo, Bukung we mnexal bale wada dmoi baga seediq na mlatac peeyah Micrayim. Bobo na de wada na phqilun kana ka ini snhii na. 6Quri so duma ini qlahang na we, wada malix nniqan daha snkgulan baro. Bukung de sbekuy na ruhu xiluy shiti na malix ckceka mnkuung ani betaq knuwan ma, tmara paru ali ppsgeegan. 7Mntena bale, Sedom, Amorah ma, dseediq ssiyo alang hiya uri ge, mnsuupu dheya mkmhemuc mbesu msuupu, muyu so kkraguh daha naqah noda. So kiya de mangal pnkdira puniq uka pphengan ani betaq knuwan. So nii we gisu pkiicu seediq.
8Mntena nanak, dseediq msepi nii uri we, smrutiq heyi daha, ini psparu ga dmoi beyax, smngayan seediq spruun. 9Ani so Mikael bukung snkgulan baro ge, mquri snbqerus Moseh ma, pkeekan kari qbsuran bgihur naqah ciida we, ini dehuk smngayan heya, wano kari: “Tai so mpkseang sunan ka Bukung!” 10Ani si dseediq nii ge, gisu smngayan uxe daha gnklaan. Dheya we mntena bale camac uka lnglungan. Wano pooda knkela heyi daha smeeliq dheya nanak. 11Mpsdiyal qnnaqah ka dheya! Ado wada moda elu Qayin ka dheya. Tmalang mquri elu qnuuqu Bilam rrihan na mangal pila ma knkkmalu dheya. Dheya we mpkuuka meniq Qorax tbrinah di. 12Seediq so nii ge, meyah smrutiq uqan mggaalu namu hiya. Dheya we uka kniicu daha mtheyaq yamu mqaras mekan hiya. Mntena so mtabu we wano pktengi heya nanak ka lnglungun na. Mntena mplabu ini quyux ka dheya, ga yupan bgihur mtnooda. Mntena qhuni uka heyi mpmisan. Wada mhuqil ma krinah wada mhuqil dungal. Ani gamil na uri we wada gbilun kana. 13Dheya we mntena mbbuwa msqurux bula rcilung, mssbuli na we kiya ka bula qnsiqa daha. Kiya uri we so pngerah ini ptkadi. Ga htiyan peeniq knkuung knrutiq ani betaq knuwan ka dheya.
14Msnpitu knxalan peeyah Adam ka Xanok we seediq nii ka kari spgeela na rmengo: “Tai! Maadis ini dheki smepu knhbragan dmrtaso snkgulan na meyah ka Bukung. 15Meeyah psgao seediq, meeyah pgkela kana noda dseediq ini kstuutux. Meeyah pgkela kari pnbrihan dseediq niqan qnquwan noda so nii ka dseediq ini kstuutux.” 16Dseediq nii we smkuxul smnetur, smmeriq seediq ma, muyu knraguh heyi daha moda meepah. Quwaq daha we peeyah kari psparu, wano knmalu daha nanak ka sqberiq daha seediq.
Pqlahang Rmengo ma Smbeyax Kari
17Yamu sgaalu mu, quri so yamu we, klai bale ka kari rnengo snkgulan Yesu Kiristo Bukung ta cuuxal. 18Rmengo yamu ka dheya, qnhdean ali ciida we niqan ka mphulis na, mpuyu knraguh daha nanak ini kstuutux moda ani maanu. 19Kiya ka dseediq smkuxul ppsaanak, wano mquri heyi, uka Bgihur Utux. 20Yamu sgaalu mu, quri so yamu we, pooda Bgihur Utux dmurun, pgdehu mheyu bobo kari bale ba ka yamu nanak. 21Qlhangi nanak ka yamu, eniq ckceka gnaalu Utux Baro, smtama gnhuwe Yesu Kiristo Bukung ta mremux knuudus ani betaq knuwan. 22So ka duma seediq ptiiyax we, glaani ka dheya. 23Duma we asi ta ka dooyun baga peeyah ckceka puniq. Duma na we asi namu ka pniqun lhebun miicu gmaalu dheya, klhbeni ka lukus snrtiqan mbesu heyi daha.
Smbeyax
24Tai so dehuk qmlahang yamu ma uxe mptakur papak namu, dehuk mege uka qnnaqah, mqqaras riyung mheyu berah knledax, 25kiya ka wano 1 ba Utux Baro Bukung mdoi baga ta, mnoda Yesu Kiristo Bukung ta mangal ta knledax, knpruwan, beyax ma, beyax mpqlahang peeyah pnrdingan betaq saya ma betaq ani knuwan. Ameng!
Currently Selected:
Yehudah 1: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
