Obadyah 1
1
1Qntaan Obadyah ka so tuutux.
Mpkdira Edom ka Utux Tmninun Bukung
Mnangal namu kari pneeyah Utux Tmninun,
niqan ka snkgulan mquri dqnlhangan:
“Tutuy da!
Mptutuy ta ma mpccebu ta Edom!”
Utux Tmninun Bukung we so nii ka rnengo na Edom:
2Qtai! Ngalun maku tgbiciq ba ckceka dqlhangan,
mpsbiciq qmita sunan ka kana dseediq.
3Mberiq sunan nanak ka pnspruwan su,
gaga su meeniq bobo tasil,
sapah su we gaga bobo dgiyaq baro.
Kiya de rmengo su sunan nanak:
“Ima ba ka mpblebil ptuting kenan ho?”
4Ani su mntena qdiro skiya bbaro ba,
smalu rudu su cenga pngerah hiya,
ida misu ppeeyah hiya ptuting.
Rnengo Utux Tmninun Bukung ka nii.
5Nasi meyah isu hiya ka mpgeeguy,
meeyah keeman ka mpgeeguy we,
uxe wano nanak ngngalun daha ka geeguy daha peni?
Nasi meyah isu hiya ka mlamu lipas we,
uxe mrangi tikuh na peni?
Ma su wada qhdean phuqil da!
6Wada daan migin ka Esaw,
wada gimun ka lneing na pusu dnoi!
7Wada lwaqun ka mnsdehu yamu ma betaq ayus qnlhangan,
mpkbeyax sunan mberiq yamu ka tnmalu ba sunan,
mnekan uqun sunan ka ga su daha tllayun pntraki,
kiya we uka ba knkela na ka heya.
8Betaq ali ciida,
uxe ku mpkuuka seediq niqan knkela Edom ho?
Uxe ku mpkuuka seediq niqan knkela dgiyaq Esaw ho?
Rnengo Utux Tmninun ka nii.
9Supi Teyman!
Mpkrkerang ka mnpahung supi su,
kiya ka wada phqilun kana ka dseediq dgiyaq Esaw hiya.
Pusu Ppkdira Edom
10Ado wada su phuqil Yakobu mtswai su ka isu,
kiya ka pqsqaun su,
qada ani knuwan ka isu.
11Meeyah gmeluk qyqeya Yakobu ciida ka seediq uxe nklaan,
meeyah mremux alang na ka seediq icil ciida,
ali gisu daha pdaun blebil qreti maasu ka qyqeya Yerusalem ciida we,
ga su mheyu ssiyo ka isu ma, mntena su so dheya ka isu uri.
12Ali daan mqraqil ka mtswai su,
naka su ini riqo qmita.
Ali wada phqilun ciida ka seediq Yehudah,
naka su ini qqaras mqraqil.
Ali mnoda mqraqil ciida ka dheya,
naka su ini rengo kari psparu.
13Ali mqraqil ka seediq mu ciida,
naka su ini remux rhengun alang daha.
Ali pqrqilan daha,
naka su ini riqo qmita pnqraqil daha.
Ali pqrqilan daha,
naka su ini geeluk dnoi daha.
14Ali pqrqilan daha,
naka su ini heyu elu pstrengun,
phuqil su dseediq qnduriq,
naka su ini bqani dheya ka mnuudus na.
Mpsgao Kana Qlhangan ka Utux Tmninun
15Smdaling kana qqlhangan ka ali Utux Tmninun.
Ndaan su we, mpciyuk ndaan su ka seediq uri,
mciyuk sunan we ida meeyah tunux su.
16Wada namu hmuwa mesa miimah mngihur dgiyaq mrtaso mu we,
maha so kiya uxe mpsange mimah ka dqqlhangan,
miimah ma rmequn,
kiya ka mpkuuka kana ka dheya.
Maha Mbeyax ka Israel
17Kiya de ida mpniqan qnduriq ka dgiyaq Sion,
ngalan mrtaso ka dgiyaq kiya.
Sapah Yakobu we ida maha mangal pusu dnoi daha.
18Sapah Yakobu we mmaha puniq paru,
sapah Yosehu we mmaha rana puniq.
Mmaha nemu mugi ka sapah Esaw,
maha sqmaun ma, mpkuuka,
wano ba sapah Esaw ka mtngari muudus.
Rnengo Utux Tmninun ka nii.
19Maangal Negeb ma dgiyaq Esaw ka dheya,
maangal Sipira ma dxeral Peliset,
dheya we maangal dxeral Eprayim ma Samareia,
maangal Binyamin ma Gilad.
20Supi paru Israel qnerac we,
maangal dxeral Kenaan betaq Carpat,
dseediq Yerusalem qnerac meeniq Separad we,
maangal lualang Negeb.
21Meeyah ka duma mdoi baga, mpgkala dgiyaq Sion, mooda psgao dgiyaq Esaw,
kiya de mpquri Utux Tmninun ka kana dqlhangan da.
Currently Selected:
Obadyah 1: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
