Amos 9
9
Ppsgao ka Utux Tmninun
1Qmita ku gisu mheyu ssiyo spuhan ka Bukung, rmengo:
“Sai smebuc ka dnamux eruc, so mplgelu ka rhengun,
sai phuqil ka gaga ngalun tunux ckceka seediq,
tgbukuy ba we, mpdoi ku hlmadac phuqil dheya uri.
Uka ani ima ka mpqduriq ma, uka ani ima ka mplatac peeyah hiya.
2Ani yaa kmari beling mosa tuxan mnkuung ka dheya we,
ida mu bbilun baga mu peeyah hiya ka dheya.
Ani yaa mnkala karac baro ka dheya,
ida mu ptingun toma peeyah hiya ka dheya.
3Ani lneing bobo dgiyaq Karmel,
ida ku mpsdiyal ma mqerac ku dheya.
Ani yaa mnlatac peeyah berah doriq mu mosa mgleing toma rcilung,
ida ku mposa kari quyu hiya meeyah qmiyuc dheya.
4Ani wada qrapun pais,
ida ku mposa kari hlmadac moda phuqil dheya.
Ida ku mpqita ba heyi daha,
mbege ku pqraqil ma, uxe ku mbege mbleyaq dheya.”
5Tmelung dxeral ka Utux Tmninun Bukung, Mdoi Kana supi de, asi sqsiya ka dxeral,
mneeniq hiya we mptngedux lmingis kana.
Kana dxeral we asi ka pntena yayung Yeor mgkala,
mptena Micrayim ma yayung Yeor mtakur.
6Smalu nniqan na karac baro,
tgkadun na kana dxeral ka karac ma,
mlawa kana rcilung,
sheruy na kana bobo dxeral we,
Utux Tmninun ka ngayan na.
7Rmengo ka Utux Tmninun: “Seediq Israel!
Uxe ku pntena seediq Kusu qmita yamu peni?
Uxe ku dnudul seediq Israel mnlatac peeyah dxeral Micrayim,
dnudul ku seediq Peliset mnlatac peeyah Kaptor,
dnudul ku seediq Aram mnlatac peeyah Qir peni?
8Qtai! Doriq Utux Tmninun Bukung we,
nii qmita qqlhangan niqan qnquwan noda,
phqilun na peeyah bobo dxeral ka dheya,
kiya we uxe na phqilun ka sapah Yakobu.
Rnengo Utux Tmninun ka nii.”
9“Qtai! Mposa ku kari,
mpqluli tnooda dqqlhangan hiya ka sapah Israel,
pntena so sdoi mu rgrigun mugi,
ani kingal uxe mptuting dxeral.
10Kana niqan qnquwan noda seediq mu,
kiya ka rmengo:
Uxe mpdehuk meyah ita ka mqraqil ma, uxe mpsdurak ita ka kiya we,
mphuqil toma hlmadac kana.”
Mtutuy ka Israel
11Meeniq ali ciida, npsalun mu tmutuy dungal ka kobu Dawid mntakur,
cpangun mu ka beling na.
Tgruun mu smalu ka nhurah pnharac qnalang alang,
sbgrahun mu smalu ma pntena mu so ncuxal.
12So maha dehuk qmlahang mnsngari seediq Edom ka seediq Israel ma,
pbrnahun daha dungal maangal ka dxeral gaga ngayan mu.
Rnengo Utux Tmninun ka nii, mooda nii ka heya.
13Qtai! Dehuk ka ali,
tnabul na we, mplutuc pqburung,
qmnleeqah lipas we, mplutuc rmehak.
Mpscuwaq sino malu ka dgiyaq paru,
moda mubung dgiyaq biciq uri.
Rnengo Utux Tmninun ka nii.
14Ddulun mu mbrinah ka dseediq Israel qnerac.
Tgruun daha smalu dungal ka alang pntnemu ma,
meeniq ckceka alang hiya.
Mbarah tmabul phmaan lipas ma, miimah sino pnsino daha nanak,
Brahun daha smmalu ka qnpahan ma, mekan heyi pneeyah hiya.
15Hmaun mu dxeral hini ka dheya,
uxe npsalun gmabil dheya peeyah dxeral bnege mu dheya.
Rnengo Utux Tmninun, Utux Baro ka nii.
Currently Selected:
Amos 9: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
