Naxum 3
3
1So smtali ba! Alang psdara seediq nii,
ini sange mberiq, stngayan gmeluk,
ida ini ba sange ka gmeeluk oda.
2Mhrenang ba ka ssebuc, mhrenang ba ka gukuc rulu,
sbboto ka dapa dmay, skiya tmalang ka rulu mccebu.
3Mtbbiyax mosa tgberah ka supi taapa dapa dmay ma, lmedax ka hlmadac,
tqwilaq ka halung ma, egu ba ka wada phqilun,
mtnegutu ma dgiyaq uka spegan ka mnhuqil,
skripuc mtakur heyi mnhuqil ka seediq.
4Ririh mqedil kbrexun mseediq ba mkmhemuc msuupu,
smkuxul moda pstuutux naqah,
trkian na mmhemuc msuupu ka qqlhangan,
pstuutux naqah moda psridil kana klegan seediq.
5Qtai! Mpkpais ku sunan,
pbrasun misu toma ma, bungun mu ka dqeras su,
mpqita mbberas su ka dqlhangan,
mqita qnsiqa su ka dqlhangan.
Rnengo Utux Tmninun Mdoi Kana Supi ka nii.
6Sqada mu heyi su ka qyqeya qnqihun,
mpsbiciq qmita sunan, mpkeso nii qmita ka seediq.
7Kana qmnita we, mplatac peeyah isu kana ma, mprengo:
Mpptadus laxun ka Nineweh da! Ima ba ka mpqnaqah kuxul sunan ho?
Inu ka saun mu migin mpbleyaq sunan ho?
8Mptduwa su ngalun ka No ho?
Gaga meeniq ckceka rcilung hiya,
niqan qsiya ka ssiyo na,
rcilung ka gaga mtqiri alang,
rcilung ka qnalang alang.
9Kusu ma Micrayim we beyax na,
betaq ani knuwan.
Seediq Put ma seediq Lubi we mdayo heya kiya.
10Kiya de wada sqada ma wada qrapun ka heya,
lqlaqi daha we stgsebuc daha luelu alang uri.
Moda blebil qreti dqbsuran mdudul daha ka seediq,
niqan beyax mdudul na we wada bkean xiluy kana.
11Mpkbsukan su ma mpkuni ka tunux su,
ririh supi su meyah su migin qqlahang uri.
12Mptena so heyi nunuh hani mhada ka kana snbangan su,
lgleegun de, asi tuting quwaq dseediq meekan.
13Qtai! Supi su we dmqedil,
gisu traguh mquri supi su ka rhengun alang qnlhangan su,
ruhu rhengun su we psqmaun puniq.
14Buli qsiya psrmali kkremux pais.
Pgdehu ba qmburang,
osa rmumu celaq ma,
psrmali muduh dxeral!
15Meeniq hiya, mphuqil sunan ka puniq,
mphuqil sunan ka hlmadac,
mptena so utun mphuqil sunan.
Ani mntena so mduku knhbaro namu,
mntena so utun ka pnrana.
16Pnrana su dmbbaruy we mgkala kneegu pngerah karac.
Mntena mduku mnalix qraqil wada skiya.
17Dqbsuran mdudul su we, mntena utun knuegu,
Qbsuran supi su we, mntena so rahul utun.
Msuupu meeniq bobo qnalang ka msekuy karac han,
meeyah ka hido de asi skiya mlatac,
uka seediq mkela ka wada quri inu.
18Qbsuran paru Asur!
Gaga mtaqi ka mtabu su,
gaga msange ka qbsuran mdudul su,
gisu mkrehak meeniq cngcenga ddgiyaq ka seediq su,
uka ka meeyah psseli dheya.
19Nngalan su luqah we uka klaan pkhuwe,
luqah su we paru bale.
Kana mnbahang kari nii we mptapaq baga sunan.
Ima ka ini oda pnqraqil pneeyah sunan ho?
Currently Selected:
Naxum 3: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
