Markos 1
1
Gmarang Kari ka Yohane Ptgaya Smino
(Mat 3:1-12. Ruk 3:1-9, 15-17. Yoh 1:19-28)
1So nii ka pnrdingan malu kari laqi Utux Baro Yesu Kiristo.
2Mntena so pnatis patis Isaya mpgeela kari:
“Tai! Mpskagul ku snkgulan mu mptgeela berah su,
heya we mpsramal elu su ka heya.
3Niqan ka hrenang seediq ga mlawa tadus brenux:
Psramal elu Bukung,
psderux elu na.”
4Spoda kari nii, meyah tadus brenux ka Yohane mptgaya smino ma gmarang kari quri ooda ptgaya psino priyux lnglungan ma, srwaun ka qnquwan. 5Kana seediq qnlhangan Yudaya ma seediq Yerusalem we mosa Yohane hiya ptuura rmengo qnquwan daha ma, ptgaya psino yayung Yarden hiya. 6Mlukus ubal dapa bukung ka Yohane ma hmabik qraqil hwinuk. Mekan beyuq walu bbuyu ma utun. 7Gmarang kari rmengo ka heya: “Gisu bukuy mu ka 1 mgkala beyax mu, ani ku thmuku lmhelah negul ramil na we ini ku pnuglengu. 8Qsiya ka sptgaya mu smino yamu. Heya we Bgihur Utux ka pptgaya na smino yamu.”
Ptgaya Psino ka Yesu
(Mat 3:13-17. Ruk 3:21-22)
9Ciida, peeyah Najare ga Galil ka Yesu ma, meyah ptgaya psino Yohane yayung Yarden. 10Hani peeyah ckceka qsiya ka Yesu de asi na qtai ga mceka ma rmaguh ka karac ma, Bgihur Utux mntena byugu meyah bobo heyi na. 11Peeyah karac baro ka hrenang: “Isu we laqi sgaalu mu. Qrasun misu bale.”
Pssengun Satang ka Yesu
(Mat 4:1-11. Ruk 4:1-13)
12Bgihur Utux we asi na lwaqi tadus breenux ka Yesu. 13Psseung Satang naqah 40 ali meeniq tadus brenux ka heya, msuupu camac ma, meyah smbleyaq heya ka snkgulan baro.
Prading Gmarang Kari Galil
(Mat 4:12-17. Ruk 4:14-15)
14Bobo wada qrapun ka Yohane de meyah Galil ka Yesu, gmarang kari malu Utux Baro. 15Rmengo ka heya: “Mttuku ka ali da! Smdaling ka qnlhangan Utux Baro da! Pryuxi lnglungan namu ma snhii malu kari.”
Mlawa 4 Mptqcurux
(Mat 4:18-22. Ruk 5:1-11)
16Kiya de mkkesa ssiyo rcilung Galil ka Yesu we taan na ka Simon ma mtswai na Andreas ga pkadi qcurux rcilung hiya. Dheya we mptqcurux. 17Rmengo dheya ka Yesu: “Eyah smnegul yaku! Kiya de maha namu sun mptqcurux maangal seediq ka yamu.” 18Asi daha laxi ka kadi daha ma smnegul Yesu da. 19Ini ktheya knksaan na ka Yesu we taan na ka laqi Cebeday Yakobu ma mtswai na Yohane ga pkadi qcurux asu baro. 20Asi plawa dheya ka Yesu. Kiya de htiyan daha malix asu hiya ka tama daha Cebeday ma mpqeepah mosa smnegul Yesu.
Lmiwaq Bgihur Naqah ka Yesu
(Ruk 4:31-37)
21Meyah alang Kaparnaom ka dheya ma ali sngayan we mosa mteme sapah pssliyan tmgesa seediq ka Yesu. 22Mskluwi ba tnugesa na ka kana seediq. Ado ga niqan pusu beyax tmgesa dheya ka Yesu ma ini pntena so dmptpatis.
23Ciida, mdiras meyah sapah pssliyan hiya ka 1 seediq gaga sdooyun bgihur naqah. 24Rmengo: “Yesu seediq Najare, maanu ka pnugluban ta isu ma yami ho? Meyah su pkuuka menan ho? Klaun misu ima ka isu. Isu we mrtaso ba nuUtux Baro!” 25Mseang rmengo heya ka Yesu: “Gmelux! Latac peeyah heyi seediq nii!” 26Tnugsebuc heya ka bgihur naqah ma paru ba quwaq na de wada mlatac peeyah heya da. 27Mskluwi ba kana seediq duma mpprengo: “Maanu ba ka so nii da ho? Ma bgurah tnugsaan ka nii! Spooda na beyax mege kari bgihur naqah, ani bgihur naqah wada mbahang heya.” 28Asi garang kana mtqiri Galil hiya ka ngayan Yesu.
Pkmalu Mnarux ka Yesu
(Mat 8:14-17. Ruk 4:38-41)
29Mlatac peeyah sapah pssliyan ka dheya de msuupu Yakobu ma Yohane mosa sapah Simon ma Andreas. 30Payi Simon we ga mnarux mtilux mtaqi qlapo. Asi daha rngaani Yesu ka heya. 31Meyah berah na ka Yesu ma dooyan na baga, wada asi kuuka ka kntlexan na. Kiya de smbleyaq dheya.
32Bobo wada priyax ka hido ciida de dheya we desun daha berah Yesu ka kana mnarux ma seediq ga qrapun bgihur naqah. 33Msseli rhengun hiya ka kana seediq alang. 34Wada na pklmeun kana ka hbaro seediq lmlamu mnarux ma pqdriqun na ka hbaro bgihur naqah. Ini na srwai prengo ka bgihur naqah, ado mkela ima ka Yesu ka dbgihur naqah.
Gmarang Kari Galil
(Ruk 4:42-44)
35Mgrebu so kusun, ini kledax ka karac na, mtutuy ka Yesu ma mosa tadus brenux ma dmurun hiya. 36Simon ma so ka theyaq heya ka seediq we mosa migin Yesu. 37Slayan daha de rngagan daha: “Ga migin sunan kana ka seediq!” 38Rmengo dheya ka Yesu: “Nita icil ma ssiyo lualang, so ku maha gmarang kari hiya. Ado so kiya pusu ba yahan mu.” 39Kiya de mosa gmarang kari kana lualang Galil ma sapah pssliyan hiya betaq pqduriq bgihur naqah uri.
Pklmeun Yesu ka Msburo Heyi
(Mat 8:1-4. Ruk 5:12-16)
40Meyah tmbqelic berah Yesu ka 1 seediq mnarux msburo heyi ma mesa rmengo: “Nasi su smruwa we mtduwa su pkbgurah buro heyi mu.” 41Wada lmgelu lnglungan gnaalu na ka Yesu ma hmkero baga tmelung heya rmengo: “Smruwa ku. Pkbgurah buro heyi su!” 42Asi kuuka ka buro heyi na ma wada psbgrahun da. 43Yesu we lwaqan na ka heya ma scugan na ba dmurun. 44Rmengo: “Qlahang ka isu. Iya rrngaani ani ima noda nii. Sai pqita msapuh nanak. Ado wada mpkuuka ka buro heyi su ge, prgaani gaya Moseh mege snapuh ppgkeela su seediq.” 45Wada mlatac ka heya ma egu ba kari na wada na ssrengo ka ndaan nii da. Bobo na ciida de ini tduwa mtuura mremux mosa alang ka Yesu. Meniq nanak tadus brenux nganguc alang. Meyah hiya ka hbaro seediq pneyah ani inu.
Currently Selected:
Markos 1: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
