Mikah 4
4
Mtbale Betaq Ani Knuwan
(Isa 2:2-4)
1Ali bobo na hiti,
mpskere mheyu ka dgiyaq sapah thmkuwan Utux Tmninun,
hmrinas ddgiyaq, mpgkala kana ddgiyaq.
Meeyah quri dgiyaq nii ka kana klegan seediq.
2Mpquri hiya ka hbaro seediq ma, mprengo:
“Aguh! Suupu ta mosa dgiyaq Utux Tmninun,
osa ta sapah thmkuwan Utux Baro meeniq Yakobu.
Mptgesa elu na ita ka heya,
kiya we mooda ta elu na ka ita uri.
Ado mpeeyah Sion ka tnugesa,
mpeeyah Yerusalem ka kari Utux Tmninun.
3Heya we moda psgao ckceka egu klegan seediq,
moda psaanak malu ma naqah ckceka dqnlhangan mbbeyax ga theya.
Slmeun daha parih ka hlmadac,
snmalu daha kawir ka smbrangan.
Uxe mdoi hlmadac mccebu qlhangan kiya ka qlhangan nii,
kiya we uxe moda smluhe mccebu ka dheya.
4Txtaxa daha we mptleung toma lipas daha nanak ma,
toma qhuni nunuh daha,
uka ka seediq mpsiicu dheya.
Rnengo ba quwaq Utux Tmninun Mdoi Kana Supi ka nii.
5Kana qlhangan we mooda ngayan utux daha nanak qmeepah,
kiya we yami we mpstama miyan ngayan Utux Tmninun, Utux Baro miyan meepah ka yami,
betaq ani knuwan.
Pbrinah Qlhangan Daha ka Seediq Israel
6Rmengo ka Utux Tmninun: Meeniq ali ciida,
mpsseli ku dseediq mrikic,
mpsseli ku dseediq lnwaqan ma,
dseediq pnkdira mu.
7Ngalun mu dseediq mtngari ka mrikic na,
lnwaqan mu theya we maha ma qnlhangan mbeyax kiya.
Utux Tmninun we mpqlahang dheya meeniq dgiyaq Sion,
peeyah saya betaq ani knuwan.
8Isu, paga Eder,
ddgiyaq Sion!
Mpquri isu ka beyax mpqlahang tgberah,
pbrnahun mu ka beyax qmlahang Yerusalem.
9Saya, hmuwa su mdiras paru ho?
Uka qbsuran paru ckceka su,
wada uka ka ngalan kari su,
kiya ka betaq qmerac sunan ka mnarux,
mntena so mqedil mchedil mptuting ho?
10Sion! Mphlidun su mchedil,
mntena so mqedil nii mptnlaqi.
Ado mplatac su peeyah alang ma, meeniq su qnpahan.
Mosa su Babirun,
meeniq su hiya, doyun su baga,
meeniq su hiya, mpkuudus sunan ka Utux Tmninun ma,
mplatac qapal baga pais su ka heya.
11Saya, mpsseli mccebu sunan ka dqlhangan, mprengo su:
Srtiqi ka Sion!
Qtai ta ba doriq!
12Kiya de dheya we ini kela lnglungan Utux Tmninun,
ini kela sneengan na uri,
psseli dheya ka heya,
mntena so gisu pssliun smebuc qnburung.
13Sion! Tutui qmleqah mugi!
Mptena so xiluy ka urung su,
mptena so limuk ka papak su.
Mpqeeqah su egu klegan seediq,
sbege su Utux Tmninun ka pusu dnoi daha,
sbege su Bukung kana dxeral ka pusu dnoi daha.
Currently Selected:
Mikah 4: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
