Matay 7
7
Iya Snetur Seediq
(Ruk 6:37-38, 41-42)
1“So namu daha uxe snterun ka yamu nanak we iya snetur seediq. 2Ado maanu ka sdoi namu snetur seediq. Maha so kiya sdoi daha snetur yamu nanak uri. Maanu ka sseengan namu seediq. Maha so kiya sneung daha yamu uri. 3Hmuwa, ma su taan ka tihung nemu qhuni meniq doriq mtswai su, ini su qtai ka qhuni ga ckceka doriq su ho? 4Uxe uri we, ga niqan nemu qhuni ka ckceka doriq su. Mphuwa su mesa rmengo mtswai su: ‘Ngalo mu ka tihung nemu pako meniq doriq su ho?’ 5Isu nii we mnnangi malu! Pllai mangal ka qhuni ga ckceka doriq su han! Kiya de mpsleexan su ba qmita aangal su tihung nemu qhuni meeniq doriq mtswai su. 6Iya bqani huling ka mrtaso qyqeya. Iya biqi babuy uri ka btunux mtumun bhege. Maha qqahun babuy ka btunux mtumun bhege, mpspgeriq qmiyuc yamu.”
Pgsai, Gimi, Ttuki
(Ruk 11:9-13)
7“Pgsai, kiya de maangal namu. Gimi, kiya de psdiyan namu. Ttuki rhengun, kiya de rraguh namu na rhengun. 8Ado mesa ka ani ima we maangal. Migin we mpsdiyal. Tmatuk rhengun we rraguh namu na rhengun. 9Uxe uri we so nii kari, ckceka namu ima ka mesa pang ka laqi ma biqan namu btunux peni? 10Uxe uri we, mesa qcurux ka laqi we biqan na quyu peni? 11Ani namu so naqah ba seediq, mkela namu mangal malu qyqeya uri sbege namu lqlaqi. Maanu so kiya de mphuwa ka Tama namu gaga baro da ho? Uxe na maha sbege seediq gaga mesa heya ka malu ba qyqeya peni? 12Maanu so kiya de, ani maanu ooda, mphuwa mesa mpqeepah sunan ka seediq we, kchaya qmeepah seediq ka yamu uri. Ado nii ka gaya ma tnugesa dmpgeela kari.”
Mremux Rhengun Dgehing
(Ruk 13:24)
13“Remux dgehing rhengun ka yamu. Ado rhengun oosa pkuuka we knuglahang kiya. Leexan ba ka elu, hbaro ba mremux hiya ka seediq uri. 14Dgehing ba ka rhengun oosa muudus. Msriqu ba ka elu, ini khbaro ka seediq smdiyal hiya.”
Daha Klegal Qhuni Mheyi
(Ruk 6:43-44)
15“Yamu we qlhangi ka mnnangi mpgeela kari. Meyah yamu hiya ka dheya. Qraqil miric ka splukus daha nganguc, truma de naqah ba huling bbuyu. 16Huwa kesun mangal lipas peeyah ckceka pako ho? Huwa kesun mangal hiyi nunuh qhuni peeyah ckceka srkunux ho? Peeyah gnhiyan na dungal klaun ka dheya. 17Mntena so nii, malu qhuni we mghei malu gnhiyan. Naqah qhuni we naqah gnhiyan na. 18Ini pghei naqah gnhiyan ka malu qhuni, ini pghei malu gnhiyan ka naqah qhuni uri. 19Kana qhuni ini pghei malu gnhiyan we sqetun ma qada puniq. 20Kiya de, spooda ta gnhiyan daha tduwa namu klaun ka dheya.”
Muyu Lnglungan Bukung Mremux Qnlhangan Baro
(Ruk 13:25-27)
21“Uxe ani ima mlawa kenan: ‘Bukung! Bukung!’ ka seediq kiya ka maha mremux Qnlhangan Baro. Wano seediq muyu lnglungan Tama mu ga baro ka mpteme hiya. 22Ali ciida, maha hbaro ba ka seediq mprengo yaku: ‘Bukung, Bukung, Uxe nami pnoda ngayan su gmarang kari, uxe nami pnoda ngayan su lmiwaq utux naqah, uxe nami pnoda ngayan su meepah nami paru ba qneepah peni?’ 23Mpgkela ku dheya: ‘Ini ku ba kela yamu. Yamu seediq naqah bale nii, latac peeyah yaku!’”
Daha Pusu
(Ruk 6:47-49)
24“Kiya de ani ima wada mbahang kari mu nii ma moda qmeepah ka seediq we mntena so seediq niqan knkela smalu sapah bobo tasil. 25Kiya de sbhuran bgihur, qnyexan quyux ma, tbnean rnecux smebuc sapah gaga we uxe mptakur ka sapah. Ado wada smlean bobo tasil ka pusu na. 26Ani ima wada mbahang kari mu nii ma ini oda qmeepah ka seediq we mntena so seediq uka knkela smalu sapah bobo bnaquy. 27Kiya de sbhuran bgihur, sqiexan ma tbnean rnecux ma sbhuran paru bgihur smebuc sapah gaga de asi ktakur ka sapah. Kiya de paru ba tnkuran na.”
28Mnhedu rmengo kana kari nii ka Yesu de mskluwi bale tnugesa na ka hbaro ba seediq. 29Ado tmgesa dheya ciida we so niqan pusu beyax, ini pntena so dmptpatis daha.
Currently Selected:
Matay 7: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
