Ruka 6:27-49

Kiya de yamu nii mnbahang kari, rngagun maku. Glaani ka pais namu! Kmlei ka qmnaqah yamu! Sbleqi ka cmiyus yamu! Drnani ka tmsiiyax yamu. Smebuc icil dqeras su ka seediq we bqani psebuc heya ka icil dqeras su uri! Gmeeluk mangal lukus su mgbaro ka seediq we biqi hiya ka lukus su mgtruma uri! Mesa sunan ka seediq we biqi. Gmeeluk qyqeya su ka seediq we iya pgsai heya dungal. Ani maanu ooda, mphuwa mesa mpqeepah sunan ka seediq we, kesa qmeepah seediq ka yamu uri. Nasi namu sgaalu ka gmaalu yamu we maanu ka sqrasan namu ho? Ani seediq niqan qnquwan noda we sgaalu daha ka gmaalu dheya uri. Nasi namu smbleyaq seediq snbleyaq yamu nanak we maanu ka sqrasan namu ho? Ani seediq niqan qnquwan noda we ida mesa moda uri. Nasi namu pkbarux seediq ma psmeyah namu pkbberih dungal we maanu ka sqrasan namu ho? Ani seediq niqan qnquwan noda we pkbarux seediq niqan qnquwan noda uri, aangal daha dungal ida so pnkbarux daha. Kiya de yamu we glaani ka pais namu, sbleyaq dheya ma pkbrexi uri iya lngelung pbrinah dungal. Kiya de maha egu ka cniyuk ngalun namu. Mmaha laqi namu Utux Tgpusu baro. Ado heya ge, ani seediq ini pqaras heya ma naqah seediq uri we ida na sbgrnahun. Khenuk lhebun namu, pntena so mhenuk lhebun Utux Baro namu uri. “Iya snetur seediq ka yamu, kiya ka uxe namu ngalun psgao. Iya ngali niqan qnquwan ka seediq kika uxe namu ngalun niqan qnquwan uri. Srwai ka seediq, kiya ka maangal namu snrwaan. Biqi ka seediq, kiya ka mpniqan ka mege yamu. Kiya de ndwaun ba pooda seengan. Ptklangun tmquri ma slgelu mepux tmquri ma betaq mccuwaq berah namu tnqriyan. Ado sseengan namu maanu ka seediq we sseengan na yamu ka kiya uri.” Rmengo 1 pnungalan kari dungal ka Yesu: “Mtduwa dmudul mbudu ka mbudu seediq? Yaa uxe mptuting beling ka kana daha di peni? Ini pgkala mptgesa na ka tnugsaan. Kiya de pttkuun psluhe ka ani ima we maha mntena nanak mptgesa. Hmuwa, ma su taan ka pako meniq doriq mtswai su, ini su qtai ka tihung qhuni ga ckceka doriq su ho? Uxe uri we ini su tai ka tihung qhuni ga doriq su nanak ma mphuwa su mesa rmengo mtswai su: ‘Ngalo mu ka pako ga meniq doriq su ho?’ Isu nii we seediq nnangi malu! Pllai mangal ka tihung qhuni ga ckceka doriq su han! Kiya de mpkleexan su ba qmita aangal su pako meniq doriq mtswai su. Ado uka ka malu qhuni mghei naqah heyi, uka ka naqah qhuni mghei malu heyi uri. Klaun peeyah pnugheyi na ka knkingal qhuni. Uxe peeyah pako lmamu qhuni nunuh ka seediq, ini ngali peeyah lpiyux ka lmamu lipas uri. Malu seediq kndalax snkuwan na malu lhebun peeyah malu, naqah seediq kndalax snkuwan na naqah peeyah naqah. Ado stngayun lhebun ka srengo peeyah quwaq. Ma namu mlawa kenan ‘Bukung! Bukung!’ Ini namu puyu rnengo mu ho? Ani ima meyah kenan ma qmbahang kari mu ma moda qmeepah ka seediq, rngage maku so mntena seediq ima ka heya: Heya we mntena seediq smalu sapah, truma ba knriyan na dxeral ma smpusu na bobo tasil. Meyah ka rnecux paru ciida, cmebu sapah ka qsiya de ini na llgaani ka sapah. Ado gaga bobo tasil ka pusu na. Wano so ka mnbahang ma ini oda qmeepah we mntena so seediq smalu sapah bobo dxeral uka pusu na. Cmebu ka qsiya de asi ktakur, kiya de ani kana kntkuran na ka sapah kiya.”