Uyas Tsdamac Yirmeyah 3
3
Pkdira, Priyux Lnglungan, Sntangan
1Ado hukuc seang Utux Tmninun,
seediq pnqraqil ku.
2Lwaqun ku na mquri mnkuung,
uka knledax.
3Gisu tbrinah cmebu kenan ka baga na,
ini ba sange klaali.
4Pkure qraqil ma heyi mu ka heya,
stequn na ka buuc mu.
5Smalu qbrangan cmebu kenan ka heya,
tmlibu mqraqil ma slhebun kenan.
6Pniqun ku na mnkuung,
ngalan ku na so mnhuqil bnsiyaq.
7Tlbuwan ku na, ini ku na ptrwahi,
qdqudan ku na bnekuy limuk mchedil.
8Mdiras ku mlawa ddayo kenan,
ida hmetur dnurun mu ka heya.
9Shetur na btunux qnqriyan ka ooda mu,
bkeun na psridil ka elu mu.
10Mntena so sume tqepi tmara kenan ka heya,
mntena so rkelic rudu tperuc tgleing.
11Psridil elu ddaun mu ka heya,
cmilaq kenan ma so sgaalu taan.
12Hmkero budi ka heya ma, ppheyu kenan,
ngalan ku na so pnskraya bbuun budi ka yaku.
13Budi gbeyuk na we
cmebu mtumun mu.
14Ngalan ku phlisan kana seediq ka yaku,
ngalan ku uyas phlisan daha klaali.
15Pktngiun ku na knhuran ka yaku,
pmahan ku na robo mngihur.
16Sdoi na quru btunux ptnemu rupun mu,
bungun ku na ckceka qbulic.
17Pstheyaq peeyah qmsbleyaq kenan ka isu,
cmhungi ku maanu ka qqbleyaq.
18Kiya de rmengo ku: “Wada uka ka beyax mu,
uka ka satang mu meeniq Utux Tmninun hiya!”
19Braho su lnglungi ka qnrqilan mu ma tnooda mu,
mntena so robo mngihur ma mnpahung nanak.
20Ini psetuq lmngelung nii ka lhebun mu,
kiya de wada nanak msqelung heyi mu.
21Kiya de psbrinah mu ka lhebun mu,
kiya ka niqan smatang mu.
22Ado gnaalu Utux Tmninun we ini qsetuq,
ini sange ka gmhuwe na.
23Sbgrahan mmgrebu klaali ka nii.
Paru ba ka knugbale su!
24Rmengo ka lhebun mu: “Qnbleqan mu ka Utux Tmninun,
kiya ka msatang ku heya.”
25Kana tmara Utux Tmninun ma migin heya ka lhebun na we,
mbege huwe heya ka Utux Tmninun.
26Tmara Utux Tmninun ka seediq,
mgmelux tmara pkuudus na,
malu bale ka nii.
27Mapa kudo nduyung ka riso,
malu bale ka nii.
28Mgmelux tleung ciida,
ririh Utux Tmninun ka pnosa heyi na.
29Tmbqelic dxeral dqeras na!
Nhuwa niqan sntangan na.
30Sbeti seediq ka dqeras na,
betaq mttuku pqsiqa na!
31Uxe lixun Bukung ani betaq knuwan,
32ani pqnaqah kuxul seediq ka heya,
ida mpuyu mttuku gnaalu na mnughuwe ka heya.
33Ini lngelung pqraqil seediq ka heya,
ini pqnaqah kuxul seediq.
34Kana seediq qnerac bobo dxeral,
qntemaq qmleqah dheya.
35Meeniq berah Utux Tgpusu Baro
mpsridil ini psaanak seediq.
36Meeniq pprngagun seediq
mpspaux bale ma qmnuqu,
kana nii we ini sprui qmita Bukung kiya.
37Nasi uxe pnosa kari ka Bukung,
ima ka mprengo ma asi oda ho?
38Yaa naqah, yaa malu,
uxe pneyah quwaq Utux Tgpusu Baro ho?
39Niqan qnquwan noda daha nanak kana seediq,
muudus seediq we mtduwa sqnriqu rmengo na ho?
40Qtae ta nanak, lngelung ka ndaan ta,
psbgrnahe ta quri Utux Tmninun!
41Bqani ta heya ka lhebun ta,
pquri ta Utux Baro gaga baro pheyu ka baga ta!
42Wada miyan niqan qnquwan noda tbrinah,
wada su ini sruwa menan ka isu.
43Msqama stenge seang su mhero yami.
Ini su kraguh phuqil menan.
44Sqeerung su plabu ka isu nanak,
shetur su ka dnurun.
45Ngalan su nami seediq bobo dxeral,
mntena so rkeruk ma sudu qdanun ka yami.
46Kana pais miyan
mnngaha quwaq daha mccebu yami.
47Dehuk menan kana ka kiicu ma ebun tnraki,
pphuqil ma pkuuka we dehuk yami uri.
48Ririh wada phqilun ka seediq mu,
betaq mntena yayung tsrusuq ka doriq mu.
49Ini qsetuq tsrusuq ka doriq mu,
ini qsetuq.
50Ida asi ka betaq psbrinah ka Utux Tmninun,
qmita peeyah baro.
51Ririh dseediq lualang mu,
pqnaqah kuxul mu ka qnita doriq mu.
52Uka ba pusu na kmpais kenan ka seediq we smdurak kenan,
spntena ku daha so qbheni mhero.
53Phqilun ku daha ckceka beling,
gtuun daha btunux ka heyi mu.
54Mcuwaq baro mu ka qsiya,
rmengo ku: “Mphuqil ku ta!”
55Utux Tmninun!
Peeyah beling toma, mlawa ku ngayan su.
56Wada su mbahang ka pnlawa mu,
braho su iya lebi birac,
bhangi ka rengac mu, diras mu mdayo.
57Mlawa ku sunan ciida,
smdaling su kenan ma, rmengo: “Iya kiicu!”
58Bukung! Dmayo su rmengo kenan ka isu,
isu ka rmirih pkuudus knuudus mu.
59Utux Tmninun! Wada su qtaan ka tnraqil daha kenan,
braho su ndwai pooda ini psanak psgao kenan.
60Mciyuk ma mphuqil kenan ka dheya we,
wada su qtaan kana da.
61Utux Tmninun! Wada su qbhangan ka tnsiyax daha,
kana pphuqil daha kenan.
62Kana kari pneeyah quwaq dseediq nii mtutuy cmebu kenan ma,
kana klaali ddaun daha mccebu kenan.
63Tlesi ku heya qmita!
Ani yaa nii tleung ma gaga mtutuy,
yaku ka phlisun daha.
64Utux Tmninun! Braho su pdai noda baga daha,
cyuki pkdira ka dheya.
65Braho su pskrai ka lhebun daha,
hrigi dheya ka sniyus su.
66Braho su dsani seang su phero ka dheya,
pkuuka peeyah bobo dxeral Utux Tmninun ka dheya.
Currently Selected:
Uyas Tsdamac Yirmeyah 3: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
