Uyas Tsdamac Yirmeyah 2
2
Qnrqilan Yerusalem
1Ah! Betaq mseang ka Bukung, tgkadun na plabu mqalux ka Sion!
Speeyah na karac qmada dxeral ka knledax Israel,
ali seang na ciida, ini na lnglungi ka qqahun na.
2Wada pkuuka kana nniqan Yakobu ka Bukung, ini na ba krwahi.
Mseang ma hrahun na ka qbrangan Yehudah,
wada na psbrnuxun,
psqaun na ka qlhangan ma dqbsuran mdudul na.
3Sqama seang na ka heya ma, gremun na kana ka urung Israel,
smeku narac baga na berah pais.
Wada na sqmaun ka Yakobu, mntena so rana puniq pqhedu psqama.
4Mntena so pais kmugah budi,
mtutuy ma pheyu narac baga na,
mntena so pais smkuxul phuqil qqtaun ta.
Gaga meeniq kobu Sion,
hmeruy seang na, mntena so rana puniq.
5Bukung we mntena pais rmequn pkuuka Israel,
pkuuka kana sapah qbsuran,
hmurah kana qbrangan alang.
Malan nnaqah kuxul ma rengac ka Yehudah.
6Smeeliq kobu na nanak mntena smeeliq qnpahan,
hrahun na ka mrtaso spuhan na.
Utux Tmninun we pchngiun na Sion hiya ka ali smseman ma sngayan,
tperuq seang na sqada na ka qbsuran paru ma msapuh.
7Utux Tmninun we klhbenun na ka spuhan,
qnrquun na ka malu niqan,
sbege na pais ka qnalang sapah qbsuran paru.
Mdiras sapah thmkuwan Utux Tmninun ka dheya,
mntena so ali smseman.
8Lmngelung phurah pnharac qnalang alang Sion ka Utux Tmninun.
Gaga dmoi negul seengun,
ini alix baga na asi na ka sgliqun.
Ppqnqihun na kuxul ka qbrangan ma pnharac qnalang alang,
wada msuupu mhurah kana.
9Skrebu dxeral ka rhengun alang Sion,
Bukung we smeeliq ma tnmeun na ka ruhu na.
Meeniq icil qlhangan ka qbsuran paru ma dmpdudul, tena wada uka ka gaya daha.
Ini qita so tuutux peeyah Utux Tmninun uri ka mpgeela kari na.
10Mgmelux tleung dxeral ka drudan Sion.
Murus bengux tunux daha, mlukus lukus mbasi.
Tgqemul dxeral tunux daha ka weewa Yerusalem.
11Stenge rusuq ka doriq mu, betaq mbudu.
Mrmari ka lhebun mu ma, mspaux dxeral ka iraq mu,
ado wada phqilun ka seediq mu,
wada mpsetuq elu alang hiya ka laqi biciq ma laqi muunuh.
12Dheya we mntena dseediq mluqah mtakur ckceka elu alang hiya,
meeniq berah bubu na mphuqil da,
kiya de rmengo bubu na: Gaga inu ka pang ma sino ho?
13Weewa Yerusalem! Mdoi ku manu pgkela sunan ho?
Mdoi ku manu mptena so isu ho?
Weewa Sion! Pntena misu maanu smbleyaq sunan ho?
Ado mntena rcilung knpruwan ka nngalan su luqah.
So ba ima ka mpkmalu sunan?
14Dmpgeela kari su we qmita qqberiq ma uxe bale so tuutux,
ini ptuura qnquwan noda su,
uxe mpbrinah qnerac su.
Kiya de mpgarang mberiq ma, mpsridil dmudul seediq ka pnskraya.
15Kana mooda elu heya ka seediq we tmapaq baga sunan.
Mhulis quri Yerusalem ma gmkuwak tunux daha:
“Kiya ka kesun qnsdiqan bale seediq ka nii,
alang qrasun kana bobo dxeral da ho?”
16Kana pais su,
gisu rmaguh quwaq mccebu sunan.
Mhulis ma pgdegic rupun daha rmengo:
“Wada miyan phqilun ka heya,
kiya ka ali tnara ta ba bale!
Nii bale dehuk ita, nii ta ba qtaan saya da!”
17Ida mooda sneengan na ka Utux Tmninun,
ida na dhekan mooda ka pntqlahang rmengo pneeyah cuxal.
Ini kraguh pkuuka,
quri sunan pqrasun na ka pais,
phyegun na baro ka urung pais su.
18Lhebun daha we mdiras mlawa Bukung.
Qnabil alang Sion!
Tai su so mntena yayung mpsrusuq doriq ma, uxe su mpsange isu nanak,
ini sange ka rusuq doriq ckceka doriq su.
19Keeman, kmpryuxan sncaman we tutuy ma tddiras,
pntnaani qsiya hmeruy berah Utux Baro ka lhebun su.
Mpuure mtakur elu alang ka lqlaqi su,
pquri Bukung pheyu baga su dmurun knuudus daha.
20Utux Tmninun! Braho su qita,
qlahang ba ima ka ga su daun so nii.
Mqedil we huwa kesun mekan laqi pntuting na ma, laqi biciq snmayan na dmanga ho?
Msapuh ma dmpgeela kari we huwa kesun phuqil ckceka mrtaso nniqan hiya ho?
21Mtaqi elu alang ka laqi ma rudan,
wada phqilun hlmadac ka weewa ma riso mu.
Wada su phqilun ali mseang su ciida ka dheya,
Phqilun su ma su, ini su glaani ka dheya.
22Speeyah su ssiyo psseli ka seediq kcugun mu,
mntena so ali smseman.
Ali seang Utux Tmninun ciida,
uka ani 1 ka seediq qduriq ma msngari.
Pnkdakil mu dmanga betaq paru,
wada qhdeun phuqil ka kana pais da.
Currently Selected:
Uyas Tsdamac Yirmeyah 2: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
