Uyas Tsdamac Yirmeyah 1
1
Tsdamac Yerusalem
1Ah! Stenge seediq cuuxal ka alang han,
hmuwa ma wano heya nanak tleung hiya da!
Paru ba ckceka kana qqlhangan ka alang nii han,
mntena so mqedil mqrinuc ka saya da!
Qbsuran paru mqedil ckceka qqlhangan ka heya han,
nii ptqliyan ka saya da!
2Pksrabi lmingis ka heya, rusuq doriq nanak ka dqeras na.
Kana ckceka gmaalu heya we uka ani 1 ka smbleyaq heya.
Tbrinah heya ka kana dadal na,
wada kmpais heya.
3Wada qrapun ka Yehudah,
smterung mqraqil, egu ba ka daun daha qmeepah.
Gaga meeniq icil qlhangan uka ani biciq sange na.
Smmkela mnhero heya we sklaun daha elu biciq.
4Ado uka seediq mosa smseman ka elu Sion, kiya ka mnbasi,
nlaxan msgaliq ka rhengun na,
rmengac ka msapuh,
naqah kuxul ka dweewa na,
thngayan mbqerus ba ka heya.
5Tnpusu sapah ka pais na,
mrana ooda na ka kmpais heya.
Utux Tmninun we ririh egu ba qnnaqah noda na pqraqil heya,
lqlaqi na we wada qrapun berah pais na.
6Wada asi kuuka kana ka knledax Sion.
Mntena rqenux ini sdiyal speriq hiya ka dqbsuran na,
uka beyax daha mkkesa berah dseediq smdurak dheya.
7Ali pqrqilan na ka Yerusalem ciida,
kiya ka lnglungun kana knmalu na cuxal.
Seediq na we gaga baga pais, uka seediq mdayo.
Qmita ka pais we, ado wada mtakur betaq mhulis.
8Niqan paru qnquwan noda ka Yerusalem,
kiya ka mrutiq ba.
Kana smparu heya we qmita knbberas na de sbciqun daha mita,
rmengac nanak ka heya ma mqquri bukuy.
9Betaq palic lukus toma ka qnrutiq na,
ini na lnglungi ka qnhdean na,
betaq ba sklwiun ka qnnaqah na,
uka ani 1 heyi ka smbleyaq heya.
“Utux Tmninun! Psbgrnahi ku heya ka qnrqilan mu,
ado nii mbeyax bale ka pais.”
10Hmkero baga wada qmhedu gmeeluk kana dnoi na ka pais.
Betaq qmnita mnremux mrtaso nniqan na ka diicil qlhangan,
mndakar su ini tduwa mremux pnssliyan su ka dheya.
11Rmengac kana ka seediq na ma, migin uqun.
Dmoi qyqeya mkere brigun rmiyux uqun ppkuudus knuudus daha.
“Utux Tmninun! Braho su qtai,
tgleus qmita gisu ku tgseesu ba.”
Rengac Yerusalem
12Kana seediq nii mkleelu!
Tai so uxe meeyah heyi namu ka noda nii.
Tlleus ba qmita ka yamu,
yaa niqan ka so nii pqraqil kenan ali nii ho?
Utux Tmninun we meeniq ali seang na pnkdira na kenan.
13Speeyah na baro ka puniq psaun na ckceka buuc mu,
betaq meruc kenan.
Rmaguh ami ptakur papak mu ka heya,
asi ku pquri bukuy,
betaq ku mtkuny mnnarux 1 ali.
14Dmoi baga na mekuy kudo qnquwan noda mu,
qriyan na ma spaapa na nduyung mu.
Asi kuuka ka beyax mu.
Bukung mu we sbege ku na baga pais.
15Bukung we betaq malix kana mnpahung ckceka ta,
psseli dseediq mccebu kenan,
wada na qhdeun pstemaq ka rsriso mu.
Bukung we pstmaqun ma qmleqah ka weewa Yehudah,
Mntena qntemaq smlean sino hiya.
16Ririh ba noda nii, lmingis ku,
ini qsetuq ka rusuq doriq mu.
Ado mpsbleyaq kenan ma, mpsbgurah mege beyax we,
wada smtheyaq kenan.
Nii sgalu ba ka laqi mu,
ado wada mbeyax ka pais da.
17Hmkero baga ka Sion, uka ka mpsbleyaq heya.
Quri so Yakobu we, tena wada posa kari ka Utux Tmninun,
ma pais heya ka seediq ssiyo na.
Wada mrutiq ka Yerusalem meeniq ckceka daha.
18Msderux noda ka Utux Tmninun!
Wada ku tbrinah kari pnoda na ka yaku.
Kana seediq! Qbahang!
Eyah qmita pngqraqil mu.
Wada qrapun maadis ka dweewa mu ma driso mu.
19Mlawa ku sgaalu mu ka yaku,
mberiq kenan ka dheya.
Migin uqun pkuudus ciida ka dmsapuh mu ma rdrudan mu,
wada asi qsetuq hengak ckceka alang.
20Utux Tmninun! Braho su qita bino,
ado gisu ku nii mqraqil.
Mbbaro ka iraq mu,
nii msppaux ka lhebun mu,
ado wada ku sgcuqi ba tbrinah.
Meeniq ku nganguc, phuqil seediq ka hlmadac,
meeniq sapah we, mntena mhuqil.
21Niqan seediq mbahang rengac mu,
kiya we uka ani 1 ka smbleyaq kenan!
Asi qqaras mbahang pngqrqilan mu ka kana pais mu,
ado ndaan su ka nii.
Pyahi ka ali rnengo su,
tai so maha mntena kenan ka dheya.
22Tai so ptruura berah su ka qnnaqah noda daha.
Wada su hmuwa mesa pkdira kana qnquwan noda mu,
braho su kesi heya pkdira ka dheya uri.
Ado egu ba ka rengac mu, mtkuni ba ka tunux mu.
Currently Selected:
Uyas Tsdamac Yirmeyah 1: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
