Yirmeyah 52
52
Ini Baka ka Yerusalem
(2 Qbs 24:18-25:7)
121 knkawas na mqbsuran paru ka Cidqiyahu de, 11 knkawas qbsranun na Yerusalem hiya. Xamutal ka ngayan bubu na ma weewa Yirimiya pneyah Libnah. 2Cidqiyahu de naqah noda na Utux Tmninun ida so noda kana Yehoyaqim. 3So kiya de, mseang paru mquri Yerusalem ma Yehudah ka Utux Tmninun.
Kiya ka betaq na lwaqun peeyah berah na ka dheya. Tbrinah qbsuran paru Babirun ka Cidqiyahu. 410 ali 10 idas, tg9 knkawas qlhangan Cidqiyahu ciida, maadis supi na ka Nebukadnecar qbsuran paru Babirun. Meyah tmlibu mccebu Yerusalem smalu qbrangan ssiyo alang mccebu. 5Tlbuwan mccebu ka alang nii betaq tg11 knkawas qbsranun paru Cidqiyahu. 69 ali 4 idas, sgcuqi ba ka ure ckceka alang, uka bale uqun daha ka seediq dxeral hiya. 7Kiya de mhurah ka pnharac qnalang alang ma, qduriq kana ka supi. Keeman ciida, mooda rhengun cenga daha pnharac qnalang alang ssiyo qnpahan phepah qbsuran paru qduriq alang nganguc. Seediq Krdiya we gisu kmremux ssiyo alang ma, kiya de mquri Arabah qduriq ka dheya. 8Smdurak qbsuran paru Cidqiyahu ka supi Krdiya. Sklaan daha breenux Yerixo ka heya. Kiya de mkrehak wada malix peeyah qbsuran paru ka supi na. 9Seediq Krdiya we qrapun daha ka qbsuran paru, desun daha qbsuran paru Babirun gaga Riblah dxeral Xamat hiya. Pshugun daha niqan qnquwan noda ka heya. 10Qbsuran paru Babirun ge, phqilun na berah doriq Cidqiyahu lqlaqi na, dungal we wada na paqun Riblah hiya ka kana qbsuran mdayo Yehudah. 11Dungal we wada na ngalun ka 2 doriq Cidqiyahu, bkean bnekuy limuk desun daha Babirun. Rhugan daha sapah kuung betaq ali hnqilan na.
Pkuuka Sapah Thmkuwan
(2 Qbs 25:8-17)
1210 ali 5 idas, tg19 knkawas qlhangan Nebukadnecar qbsuran paru Babirun ciida, meyah Yerusalem ka Nibusaradan qbsuran mpqlahang qmeepah qbsuran paru Babirun. 13Psqmai daha ka sapah thmkuwan Utux Tmninun, sapah qbsuran paru ma, spsapah Yerusalem. Sdoi daha puniq wada psqama paru sapah seediq. 14Msuupu thlangan mpqlahang ka supi Krdiya we, wada daha hrahun kana ka pnharac qnalang alang mtqiri Yerusalem. 15Ciida, Nibusaradan qbsuran mpqlahang we qrapun na maadis ka duma seediq tgqrinuc, seediq nii msngari alang hiya, seediq pnteetu btunux qbsuran paru Babirun ma seediq tgkeela smalu. 16Kiya de Nibusaradan qbsuran mpqlahang ge, rngiyan na hiya ka duma seediq tgqrinuc ba we, ngalan na mpqeepah qnpahan lipas, mpqeepah dxeral.
17Eruc limuk, tlungan limuk ma, smseman limuk sapah thmkuwan Utux Tmninun we, wada gremun seediq Krdiya ma, kana limuk nii we wada daha desun Babirun. 18Dungal we wada daha desun ka kana limuk, dahur, daquc, pngerah sara, dahur begu ma, kana qyqeya xiluy limuk dooyun smapuh. 19Wada desun qbsuran mpqlahang kana ka sara psqmaun sknexan, pngerah, ribo, pcmagan, dahur begu, rusuq biciq ma, kana qyqeya snmalu king. 20Dungal we 2 eruc, 1 ribo, 12 dapa snmalu Selomoh quri sapah thmkuwan Utux Tmninun, nii we ini tduwa seengun ka knchdilan limuk na. 21Quri so eruc we, knkingal knbragan eruc nii we 18 sese, 4 tluding baga ka kndlexan na ma, ssiyo na we 12 sese, niqan rangah ka toma. 22Tqering na baro we gaga pniqan mumul ma 5 sese ka knbragan na. Mtqiri mumul we gaga pdpingan kadi kraga ma qutirodux. Nii we snmalu limuk kana. 234 bbaang eruc we 96 ka qutirodux na ma, mtqiri kadi we 1'00 ka qutirodux na.
Qrapun Maadis Babirun ka Seediq Yehudah
(2 Qbs 25:18-21)
24Qbsuran mpqlahang we, qmerac Serayah pusu msapuh, Cepanyah mdayo msapuh ma, 3 heyi mpqlahang sapah thmkuwan. 25Dungal we qrapi na ka 1 qbsuran mdudul supi meniq ckceka alang ma, slayan na alang hiya ka 7 heyi mdayo qbsuran paru meniq berah na ma, qbsuran supi matis mplawa seediq hiya ma, 60 heyi seediq hiya. 26Nibusaradan qbsuran mpqlahang nii we qrapun na ka dheya ma aadis na qbsuran paru Babirun gaga Riblah hiya. 27Qbsuran paru Babirun we, phuqil dheya ma, wada na phqilun Riblah dxeral Xamat hiya ka dheya. So kiya wada qrapun mlatac dxeral daha nanak ka seediq Yehudah.
28Qnerac Nebukadnecar qbsuran paru ka kneegu seediq we so nii: Tg7 knkawas qbsranun na we 30'23 heyi ka seediq Yehudah. 29Tg18 knkawas qbsranun Nebukadnecar we 8'32 heyi ka qrapun na peeyah Yerusalem. 30Tg23 knkawas qbsranun Nebukadnecar de 7'45 heyi seediq Yehudah ka qrapun maadis Nibusaradan qbsuran mpqlahang. Msuupu kana we 46'00 heyi.
Wada Yehoyakin ka Konyahu
(2 Qbs 25:27-30)
31Ewil Merodaq ka mqbsuran paru knkawas na qnbsrangan Babirun, kiya ka bobo qnrapan 37 knkawas, pkelu 25 ali 12 idas ciida, sbleqan na ka Yehoyakin qbsuran paru Yehudah ma, pltadun na peeyah sapah kuung ka heya. 32Sbleqan daha mege malu kari ma, spgkala daha tluungan mnsuupu qnrapan ma dqbsuran paru mnsuupu Babirun ka heya. 33Dungal we plaxun na ka lukus pnlkusan sapah kuung ma, betaq hnqilan msuupu mekan uqan qbsuran paru Babirun ka heya. 34Qbsuran paru Babirun we, biqan na uqun klaali ka heya, ida kingal ka kingal ali, betaq mhuqil ida so kiya.
Currently Selected:
Yirmeyah 52: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
