Yehosua 4
4
Pskraya Pheyu Btunux
1Bobo wada mhedu mtaril yayung Yarden ka kana seediq ciida, rmengo Yehosua ka Utux Tmninun:. 2“Geegi 12 heyi peeyah 12 pnswayan rdrudan, 3rngagi ka dheya: ‘Osa mangal 12 btunux hnyegan papak msapuh ckceka yayung Yarden hiya ma, phlaani ssaan namu mkrabi hiya keeman kiya.’” 4Kiya de splawa Yehosua ka 12 heyi gneegan daha pneeyah txtaxa pnswayan rdrudan seediq Israel. 5Rmengo dheya ka Yehosua: “Osa ckceka yayung Yarden, kiya ka berah kulu pnsdhegan nuUtux Tmninun, Utux Baro namu, pygaani so kneegu pnswayan rudan seediq Israel pheli pn1 btunux. 6Btunux nii we maha pskraya ckceka namu. Bobo na hiti, smiling yamu ka lqlaqi namu: ‘Maanu pnugluban na yamu ka bbtunux nii ho?’ 7Kiya de kesa cmiyuk dheya ka yamu: ‘Ado wada msetuq berah kulu pnsdhegan nuUtux Tmninun ka qsiya yayung Yarden. Mnoda yayung Yarden ka kulu pnsdhegan de, wada asi setuq ka qsiya yayung Yarden. Bbtunux nii we mpskraya dseediq Israel ani betaq knuwan.’”
8Kiya de muyu rnengo Yehosua ka dseediq Israel. Spuyu daha kneegu pnswayan rudan seediq Israel mosa maangal 12 btunux ckceka yayung Yarden hiya. Mntena so tnugesa Utux Tmninun rnengo na Yehosua. Desun daha tnqiyan daha ka btunux ma, pniqun daha hiya. 9Dungal we pheyu 12 btunux ckceka yayung Yarden, kiya ka hnyegan papak dmsapuh mnheal kulu pnsdhegan ka Yehosua. Betaq saya, ida gaga meniq hiya na. 10Mheyu ckceka yayung Yarden ka dmsapuh mheal kulu pnsdhegan, betaq wada mhedu moda kana tnugesa Utux Tmninun, rnengo na kana seediq ka Yehosua. Mntena so kana kari rnengo na Moseh.
Kiya de seediq we mtgaaguh mtaril yayung ka dheya. 11Mnhedu mtaril kana ka seediq de, hani mtaril mmaha ka kulu pnsdhegan Utux Tmninun ma dmsapuh ma, betaq berah seediq ka dheya. 12Ida so rnengo Moseh, seediq Reuben, Gad ma, dmeka pnswayan rudan Menaseh we bale ba madis qyqeya mccebu mtaril mosa berah kana seediq Israel. 13Pnsramal mccebu ka supi we, yaa ba 4 mang ka supi mnadis qyqeya mccebu mntaril berah Utux Tmninun mqquri breenux Yerixo hiya. 14Ali ciida, Utux Tmninun we pspruun na paru bale meniq seediq Israel ka Yehosua. Kndesan kana Yehosua we, spntena daha so Moseh smparu qmita ka heya.
15Rmengo Yehosua ka Utux Tmninun: 16“Pklai peeyah yayung Yarden ka dmsapuh gaga mheal kulu pnsdhegan.” 17Kiya de rmengo dmsapuh ka Yehosua: “Nkala peeyah yayung Yarden ka yamu.” 18Mnkala peeyah yayung Yarden ka dmsapuh mheal kulu pnsdhegan Utux Tmninun. Qmleqah dxeral mdengu ka qapal papak daha de, asi eyah nniqan daha ka qsiya, betaq stenge ssiyo yayung dungal.
19Mntaril yayung Yarden ka seediq we 10 ali tgkingal idas. Kiya de pkobu Gilgal quri nklaan hido alang Yerixo. 20Yehosua we, spteetu na Gilgal hiya ka 12 btunux nangal daha peeyah yayung Yarden. 21Rmengo seediq Israel: “Bobo na, mpsiling dtama daha ka lqlaqi namu: ‘Maanu pnugluban na yamu ka bbtunux nii ho?’ mesa de, 22pklai ka lqlaqi laqi namu: ‘Mnoda mtaril dxeral mdengu yayung Yarden ka seediq Israel.’ 23Ado Utux Tmninun, Utux Baro namu we, wada psdengu yayung Yarden berah miyan, kiya ka betaq namu mtaril hini. Mntena cuuxal Utux Tmninun, Utux Baro namu wada pkdengu rcilung Mtanah berah ta ma, betaq ta wada mtaril ka ita. 24Pklai ka kana seediq bobo dxeral. Baga Utux Tmninun we niqan paru ba beyax. Kiya ma so namu maha miicu Utux Tmninun, Utux Baro namu uri.”
Currently Selected:
Yehosua 4: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
