Yehosua 24
24
Kari Qnhdean Yehosua Rnengo na Sekem
1Yehosua we, mlawa kana pnswayan rudan Israel meeyah msseli Sekem. Mnlawa ddrudan Israel, dmpdudul, dmpsgao ma, dqbsuran. Meyah mheyu berah Utux Tmninun ka kana daha. 2Rmengo kana seediq ka Yehosua: “Utux Tmninun, Utux Baro nuIsrael we, rmnengo: ‘Cuxal bale, pusu rudan namu, kiya ka Terax, tama Abraham ma Nahor we qmneepah utux icil mneniq yayung Paru hiya. 3Dmnudul ku Abraham pusu rudan namu mlatac pneeyah yayung Paru hiya. Dmnudul ku heya pkkesa kana dxeral Kenaan. Kiya uri we prnaun mu hbaro ka lqlaqi laqi na ma, sbege mu heya ka Yijxaq. 4Dungal we sbege mu Yijxaq ka Yakobu ma Esaw. Sbege mu pusu dnoi Esaw ka ddgiyaq Seir. Kiya de wada mosa Micrayim ka Yakobu ma lqlaqi laqi na. 5Smnkagul ku Moseh ma Aharon, muyu so ndaan mu meniq Micrayim, peyah ku mqraqil Micrayim. Bobo na de, kiya ka ddudul maku mlatac peeyah hiya. 6Dmnudul ku pusu rudan namu mlatac peeyah Micrayim, kiya de dehuk namu rcilung Mtanah. Madis rulu mccebu ma supi mccebu ka seediq Micrayim, meyah smdurak pusu rudan namu betaq rcilung Mtanah. 7Mlawa dmurun Utux Tmninun ka pusu rudan namu de, Utux Tmninun we psnakun na mkuung ka cenga dyamu ma dseediq Micrayim. Kiya uri we spquri na dseediq Micrayim ka qsiya rcilung ma, betaq mubung dheya ka qsiya. Ndaan mu Micrayim nii we, wada namu qtaan bale doriq namu. Bsiyaq hari ali nniqan namu tadus brenux. 8Dmnudul ku yamu mosa dxeral gaga niqan seediq Amori nklaan hido yayung Yarden hiya. Dheya we mnccebu dyamu ka dheya. Kiya we wada mu sbege baga namu ka dheya, kiya ka dehuk namu mangal dxeral daha. Wada mu phqilun berah namu ka dheya uri. 9Ciida, meyah mccebu seediq Israel ka Balaq laqi Cipor qbsuran paru Moab. Smkagul seediq mnosa mlawa Bilam laqi Beor meeyah cmiyus. 10Kiya we, ini ku qbahang kari Bilam, kiya de krnahan mu pooda heya psbleyaq yamu. So kiya de, dmoi ku baga namu mnlatac peeyah baga na. 11Mntaril namu yayung Yarden ma dehuk namu Yerixo. Mneyah mccebu dyamu ka seediq Yerixo, Amori, Perijiy, Kenaan, Xet, Girgas, Xiwiy ma Yebus. Kiya we wada mu sbege baga namu ka dheya. 12Mneeniq berah namu, smnkagul ku mnarux mpunu, kiya ka wada lwaqun peeyah berah namu ka 2 qbsuran paru seediq Amori. Nii we uxe pneeyah hlmadac namu ma budi namu. 13Dxeral namu we bnege mu, uxe namu ndaan tmabul. Lualang namu we bnege mu, uxe namu snmalu. Asi namu eniq ckceka hiya ka yamu ma, mekan namu gnhei pnhuma qnpahan lipas ma curung.’
14Asi namu ka miicu Utux Tmninun saya. Bale ba pneeyah lhebun namu meepah heya. Pkngali ka duutux mneniq yayung Paru hiya ma tnhmkuwan namu mneeniq Micrayim ciida. Wano Utux Tmninun ka qpahi. 15Nasi naqah ka qmeepah Utux Tmninun, tduwa namu gmao saya ima ka qpahun namu. Duutux qneepah pusu rudan namu yayung Paru hiya: Uxe uri we duutux seediq Amori gisu namu niqan hini ho? Quri so yaku ma tnsapah mu we, ida nami mpqeepah Utux Tmninun ka yami.”
16Cmiyuk ka kana seediq: “Uxe miyan malix Utux Tmninun meepah quri utux icil ka yami. 17Ado Utux Tmninun, Utux Baro miyan we dmnudul yami ma pusu rudan miyan mnlatac peeyah Micrayim sapah tnqliyan miyan. Heya we pnooda paru pnskraya noda berah doriq nami. Kiya uri we qmnlahang yami meniq kana elu ma txtaxa klegan seediq ndaan miyan ka heya. 18Utux Tmninun we, lwaqan na peeyah berah miyan kana ka txtaxa klegan seediq ma dseediq Amori mneniq dxeral hini. So kiya de, asi nami ka qmeepah Utux Tmninun. Ado Utux Baro miyan ka heya.”
19Rmengo kana seediq ka Yehosua: “Ini namu tduwa qeepah Utux Tmninun. Ado Utux Baro mrtaso ka heya ma, ptgaya qnnaqah ka heya. Uxe na srwaun ka qnquwan noda namu. 20Nasi namu malix Utux Tmninun, mosa namu qmeepah duutux seediq icil de, maha priyux smeeliq bobo snbleqan na yamu ka heya ma, ida namu na phqilun.” 21Rmengo Yehosua ka kana seediq: “Uxe, mpqeepah miyan Utux Tmninun ka yami.” 22Rmengo kana seediq ka Yehosua: “Gmnao namu Utux Tmninun ma, qqeepah namu heya we, pgkela yamu nanak!” Rmengo ka dheya: “Psruwa miyan pgkela ka yami.” 23“Saya, asi namu ka pkngalun peeyah ckceka namu ka duutux pneeyah icil. Pskingal ba lhebun namu mquri Utux Tmninun, Utux Baro nuIsrael.” 24Rmengo Yehosua ka kana seediq: “Mpqeepah miyan Utux Tmninun, Utux Baro miyan ka yami. Mpqbahang miyan kari na.” 25Ali ciida, moda psdehu kana seediq ka Yehosua. Moda smalu kari pndakar ma gaya bneku meniq Sekem hiya ka dheya. 26Yehosua we spatis na patis Gaya Utux Baro ka kari nii. Dungal we mangal 1 btunux paru, phyegun na toma qhuni raus ga meniq ssiyo mrtaso sapah Utux Tmninun. 27Rmengo kana seediq ka Yehosua: “Qtai! Pgkela ita ka btunux nii. Ado mnbahang kana kari tnugesa Utux Tmninun ka btunux nii. Gisu pgkela ita ka btunux nii, kiya ka uxe ta tbrinah Utux Baro namu.” 28Kiya de Yehosua we psaun na ka seediq ma, mquri dxeral daha nanak ka txtaxa daha da.
Hnqilan Yehosua ma Elajar
29Bobo noda nii, wada mhuqil ka Yehosua laqi Nun tnqliyan Utux Tmninun da. 1'10 knkawas na ciida ka heya. 30Seediq Israel we reesun daha Timnat Serax gaga dgiyaq Eprayim tgdaya dgiyaq Gaas meeniq ckceka dxeral daha ka heya. 31Muudus ka Yehosua ciida ma, gaga muudus ciida ka ddrudan mnkela kana noda Utux Tmninun quri seediq Israel bobo mhuqil Yehosua we, gaga qmeepah Utux Tmninun ka seediq Israel.
32Seediq Israel ge, buuc bqerus Yosehu nadis daha pneeyah Micrayim we, gaga daha reesun Sekem. Kiya ka dxeral dnoi na 1'00 kosita bnaruy Yakobu pneeyah lqlaqi Xamor tama Sekem. Dxeral nii we pusu dnoi lqlaqi laqi Yosehu.
33Mhuqil ka Elajar laqi Aharon uri. Dheya we skuun daha dgiyaq biciq ddgiyaq Eprayim dxeral nangal Pinexas laqi na.
Currently Selected:
Yehosua 24: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
