Dmpsgao 1
1
Ini baka Yehudah dhaka Simeon ka Adoni Bejeq
1Bobo wada mhuqil ka Yehosua, smiling Utux Tmninun ka dseediq Israel: “Ckceka miyan we, ima ka maha plaale kmremux seediq Kenaan ma kmremux dheya ho?” 2Rmengo ka Utux Tmninun: “Yehudah ka plaale maha. Qtai! Wada mu sbege baga na ka dxeral kiya di.” 3Rmengo Simeon mtswai na ka Yehudah: “Braho su theyaq yaku mosa dxeral nangal mu peeyah blebil qreti ma, kmremux seediq Kenaan. Mptheyaq ku isu mosa dxeral nangal su peeyah blebil qreti uri.” Kiya de mtheyaq heya mosa ka Simeon. 4Mosa cmebu ka Yehudah. Utux Tmninun we sbege na baga daha ka seediq Kenaan ma seediq Perijiy. Dheya we phuqil 1 mang heyi mneniq Bise hiya. 5Strengun daha Bise hiya ka Adoni Bejeq de, mccebu heya. Ini baka ka seediq Kenaan ma Perijiy. 6Qduriq ka Adoni Bejeq we bhragun daha ma qrapun daha. Slapun daha ka bbaki tluding baga ma bbaki tluding papak na. 7Rmengo ka Adoni Bejeq: “Cuuxal han we wada mu slapun ka bbaki tluding baga ma baki tluding papak 70 qbsuran paru. Dheya we lnamu pang mntuting peeyah pnuqan mu. Saya, gisu moda ndaan mu cmiyuk kenan ka Utux Baro.” Desun daha Yerusalem ka Adoni Bejeq ma, wada mhuqil hiya ka heya.
8Mosa kmremux Yerusalem ka dseediq Yehudah. Ngalun daha ma phqilun daha hlmadac ka dseediq alang ma, sqmaun daha puniq ka alang. 9Bobo na de hmeruc ka seediq Yehudah, mosa cmebu dseediq gaga meniq ddgiyaq, Negeb ma seediq Kenaan breenux toma. 10Mosa cmebu seediq Kenaan gaga meniq Xebron ka seediq Yehudah. Wada daha phqilun ka Sesay, Aximan ma Talmay. Cuuxal han we Qiryat Arba kesun daha tmngayan ka Xebron.
11Peeyah hiya mosa cmebu seediq Debir ka Yehudah. Cuuxal han we Qiryat Seper kesun daha tmngayan ka Debir. 12Rmengo ka Kaleb: “Ima ka mosa kmremux Qiryat Seper ma ngalun daha alang kiya de, pstrengun mu heya ka weewa mu Aksah.” 13Otniel laqi Qenaj mtswai Kaleb ka mosa mangal alang kiya. Kiya de pstrengun na Kaleb ka Aksah weewa na. 14Meyah ka Aksah ciida, dmudul rseno na mosa mesa dxeral tama na ka heya. Mtuting peeyah dapa roba ka Aksah de, rmengo heya ka Kaleb: “Maanu ka pgsaun su ho?” 15Rmengo Kaleb ka heya: “Braho su biqi ku smbleqan su. Wada sa ku pniqun dxeral Negeb ka yaku de, braho su biqi ku hiya ka pusu qsiya uri.” Kiya de wada na sbege heya ka pusu qsiya daya ma toma.
Mbeyax Mccebu ka Yehudah ma Binyamin
16Baki Moseh we seediq Qeyniy, lqlaqi laqi na we mtheyaq seediq Yehudah mosa alang sbiki paru ma, mosa mquri tghunac Arad tadus brenux Yehudah ma, meniq ckceka seediq hiya. 17Yehudah we msuupu mtswai na Simeon, mosa cnebu phuqil seediq Kenaan ga meniq Cepat. Wada daha asi bale sgliqi cmebu ka alang kiya. Kiya ka kesun daha Xormah ka alang kiya. 18Nangal Ajah, Asqelon ma Eqron kana dxeral daha hiya ka Yehudah. 19Utux Tmninun we, mtheyaq Yehudah, kiya ka dehuk mangal dxeral ddgiyaq. Kiya ma uka beyax daha lmiwaq seediq gaga meniq breenux, ado niqan rulu xiluy mccebu ka dheya. 20Seediq Israel we muyu rnengo Moseh, sbege daha Kaleb ka Xebron. Kaleb we lmiwaq 3 lqlaqi lutuc na Anaq peeyah hiya. 21Quri so dseediq Yebus gaga meniq Yerusalem di ge, seediq Binyamin we ini daha lwaqi ka dheya. Kiya de mtheyaq meniq Yerusalem hiya ka seediq Yebus ma Binyamin betaq ali saya.
Mangal Beytel ka Eprayim ma Menaseh
22Tnsapah Yosehu we mosa cmebu Beytel. Theyaq dheya ka Utux Tmninun. 23Tnsapah Yosehu we mosa kmuuruy Beytel. Cuuxal han we Luj kesun daha tmngayan ka alang nii. 24Qmita kingal heyi pneeyah ckceka alang kiya ka seediq mpkuuruy de, rmengo heya: “Tgsai miyan elu mremux alang nii. Kiya de mpsbleyaq nami sunan ka yami.” 25Tmgesa elu rremux alang dheya ka seediq kiya. Kiya de wada daha phqilun hlmadac ka seediq ckceka alang hiya. Kiya ma psaun daha ka seediq kiya ma kana tnsapah na. 26Seediq kiya de wada dxeral Xet di ma. Mmaha smmalu 1 alang, Luj kesun ka ngayan na. So nak nii ka ngayan alang kiya betaq ali saya.
Dseediq Ini Lwaqi Israel
27Menaseh we ini na lwaqi ka dseediq ma lualang Bet Sean, Tanak, Dor, Yibolien ma, Megido. Ida gaga mkkere ba meniq hiya ka seediq Kenaan. 28Mbeyax ka Israel han we, ngalan na pqeepah tnqliyan ka seediq Kenaan. Ini daha asi lwaqi kana ka dheya.
29Eprayim we ini na lwaqi ka seediq Kenaan meniq Gejer hiya. Kiya de ida meniq Gejer hiya ka seediq Kenaan ma meniq ckceka Eprayim.
30Jebulun we ini na lwaqi ka seediq meeniq Qitron ma Nahalol. Kiya de ida meeniq ckceka Jebulun ka seediq Kenaan mtnqliyan qmeepah dheya.
31Aser we ini na lwaqi ka seediq Ako ma Cidon, kiya uri we Axlab, Akjib, Xelbah, Apiq ma, Rexob. 32Seediq Aser we, ado ini daha lwaqi ka seediq Kenaan hiya de, ida meniq ckceka daha ka dheya.
33Naptaliy we ini daha lwaqi ka seediq Bic Simis ma Bet Semes. Kiya de meniq ckceka dseediq Kenaan hiya ka Naptaliy. Seediq Bic Simis ma Bet Anat we tnqliyan mqeepah ka dheya.
34Seediq Amori we knkyexun na peeniq bobo dgiyaq ka seediq Dan ma, ini na srwai hmeruc meyah breenux. 35Seediq Amori we ida meniq ddgiyaq Xeres, Ayalon ma, Saping. Mbeyax ciida ka tnsapah Yosehu de, tnqliyan mqeepah ka dheya. 36Ayus dxeral seediq Amori we peeyah hmeruc Aqrabim moda Sela mquri tgbaro.
Currently Selected:
Dmpsgao 1: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
