Yehosua 22
22
Mbrinah ka Dpnswayan Rudan Quri Nklaan Hido
1Bobo na nii de, mlawa seediq Reuben, Gad ma, dmeka pnswayan rudan Menaseh ka Yehosua. 2Rmengo dheya: “Rmnengo yamu ka Moseh tnqliyan Utux Tmninun. Kiya we wada namu pyugun kana da. Kari rnengo mu yamu we, asi namu ka bhangun uri. 3Kana ali nii we, ini namu alix mtswai namu betaq saya. Kiya uri we muyu namu tnugesa Utux Tmninun, Utux Baro namu. 4Saya, Utux Tmninun, Utux Baro namu we, spooda na sntangan na, wada moda pbleyaq mtswai su. Saya de, ani namu nak brinah kobu namu ma dxeral nklaan hido yayung Yarden bnege na yamu ka Moseh tnqliyan Utux Tmninun. 5Kiya we asi namu ka tleus muyu gaya pndakar ma gaya tnugesa Moseh tnqliyan Utux Tmninun. Moda kana elu na, mbahang ba gaya pndakar na smnegul heya ma, peeyah kana lhebun ma lnglungan namu qmeepah heya.” 6Kiya de pbleyaq dheya ka Yehosua ma smkagul dheya mbrinah. Kiya de mbrinah mosa kobu daha ka dheya da.
7Moseh we, bnege dxeral dmeka pnswayan rudan Menaseh mneniq Basan hiya. Kiya dungal we, Yehosua ge sbege na dxeral ka dmeka pnswayan rudan Menaseh meniq pryaxan hido yayung Yarden hiya. Hmaduc mpbrinah mosa kobu daha ciida, smbleyaq dheya ka Moseh. 8Rmengo dheya: “Adis kobu namu kana ka egu bale pusu dnoi ma qpuruh tnbugan, king, ging, limuk, xiluy ma egu ba lukus. Qyqeya gneeluk namu pneeyah pais we, sai maasu mtswai namu.” 9Kiya de mtutuy ka seediq Reuben, Gad ma dmeka Menaseh, mlatac seediq Israel peeyah Siylo dxeral Kenaan ma mbrinah pusu dxeral Gilad nangal daha. Kiya ka pnuyu daha tnugesa Utux Tmninun pnoda na Moseh rmengo.
Spuhan Ssiyo Yayung Yarden
10Dehuk quri dxeral yayung Yarden gaga dxeral Kenaan hiya ka seediq Reuben, Gad ma dmeka Menaseh de, smalu 1 paru ba qtaan spuhan hiya. 11Mbahang ka seediq Israel de, rmengo: “Qtai! Gaga smalu 1 spuhan meniq yayung Yarden sipo dxeral Kenaan hiya ka seediq Reuben, Gad ma dmeka Menaseh.” 12Mnbahang nii ka seediq Israel de, msseli Siylo hiya mkmosa baro mccebu dheya.
13Kiya de seediq Israel we, skgulan daha mosa dxeral Gilad betaq seediq Reuben, Gad ma dmeka Menaseh hiya ka Pinexas laqi Elajar msapuh. 14Mosa theyaq heya we 10 heyi mpdudul. Dheya nii we txtaxa qbsuran pneyah knkingal pnswayan rudan Israel. 15Dehuk dxeral Gilad ka dheya. Mosa seediq Reuben, Gad, dmeka Menaseh hiya ma rmengo dheya: 16“So nii kari daha ka kana seediq Utux Tmninun: ‘Yamu saya we ma namu malix Utux Tmninun, ini snegul heya ma, tbrinah Utux Baro Israel. Tbrinah namu Utux Tmninun ma smalu namu nanak 1 spuhan we, teyal qnquwan noda namu! 17Qnquwan noda nniqan ta Peor hiya we, wada meyah seediq Utux Tmninun ka mnarux mpunu. Ani betaq saya ini qhedu na. So noda nii we ngalun namu tgbiciq peni? 18Betaq namu tbrinah Utux Tmninun saya. Kusun de maha mquri kana seediq Israel mseang ka heya da. 19Nasi namu mesa mrutiq ka dxeral nangal namu nii we, ani namu nak meyah dxeral Utux Tmninun hini. Kiya ka dxeral gaga niqan mrtaso kobu Utux Tmninun ma gaga ckceka dxeral ta. Wada namu tbrinah Utux Tmninun we, iya tbrinah yami ma, betaq namu smalu nanak spuhan Utux Tmninun, Utux Baro ta hini. 20Cuuxal we, mnoda tbrinah ka Akan lqlaqi laqi Jerax ge, wada knhenu seang na betaq kana seediq Israel peni? Wada mhuqil ckceka qnquwan noda na we, uxe wano heya nanak!’”
21Kiya de cmiyuk rmengo dqbsuran pnswayan rudan Israel ka seediq Reuben, Gad ma dmeka Menaseh. Rmengo: 22“Utux Tmninun, Utux Baro Pusu Beyax! Utux Tmninun, Utux Baro Pusu Beyax! Wada mkela ka heya ma, tai so maha mkela ka dseediq Israel uri. Nasi nami wada tbrinah noda miyan ma, niqan qnquwan noda quri Utux Tmninun de, iya nami pkdusi ali saya! 23Nasi miyan smalu spuhan dyami nanak ma, malix nami Utux Tmninun, ini snegul heya. Uxe uri we ini nami bqani bobo snpuhan ka snapuh psqama, snapuh bnege pnhgalang ma, snapuh ptbale de, tai so Utux Tmninun nanak ka mpkdira menan. 24Uxe so kiya! Pusu noda nami nii we, miicu miyan lqlaqi laqi namu hiti de, mprengo dlqlaqi laqi miyan: ‘Maanu pnugluban namu Utux Tmninun, Utux Baro nuIsrael ho? 25Ado ayus dxeral dseediq Reuben ma Gad ka yayung Yarden. So kiya de uka ka pnugluban namu Utux Tmninun ka dyamu.’ Kiya de, maha uxe mpkiicu Utux Tmninun dlqlaqi laqi miyan ka dlqlaqi laqi namu da. 26Kiya de mpprengo miyan: ‘Hmuwa ka smlei ta 1 spuhan, uxe ta ssapuh snapuh psqmaun ma, uxe ta daun smapuh ani manu. 27Wano ba ngalun pnskraya ckceka yamu ma dyami ma, hiti lqlaqi laqi miyan. Kiya de so maha mege snapuh psqmaun, snapuh bnege pnhgalang, snapuh ptbale ma, duma snapuh meepah heya. So uxe mprengo, uka pnugluban namu Utux Tmninun ka lqlaqi laqi menan mesa ka lqlaqi laqi namu.’ 28Kiya ka mprengo nami: ‘Hiti de, nasi rmengo yami ka dheya, uxe uri we rmengo lqlaqi laqi miyan ka dheya de, tduwa nami cmiyuk rmengo: Qtai! Snapuh snmalu pusu rudan miyan we kiya ka hnyegan spuhan Utux Tmninun. Uxe spuhan psqmaan ma uxe daun smapuh kiya. Gisu pskraya ckceka yamu ma menan ka nii.’ 29Wano ba spuhan gaga ckceka mrtaso kobu Utux Tmninun hiya, uka ba lnglungan miyan mbege nami snapuh psqmaun, snapuh bnege pnhgalang ma duma snapuh de, betaq nami smmalu 1 spuhan. Tbrinah Utux Tmninun, betaq malix heya ini snegul heya saya.”
30Mbahang kari dseediq Reuben, Gad ma Menaseh ka Pinexas msapuh ma mpdudul, kiya ka dqbsuran mdudul Israel tnheyaq heya meyah de, malu kuxul daha kana. 31Kiya de rmengo dseediq Reuben, Gad ma Menaseh ka Pinexas msapuh laqi Elajar: “Klaun miyan, ali saya we gisu ckceka ta ka Utux Tmninun. Ado ini ciyuk qnquwan noda namu ka heya. Gisu namu dooyun baga peeyah baga Utux Tmninun ka seediq Israel da.”
32Pinexas msapuh laqi Elajar ma dmpdudul we, mlatac dseediq Reuben ma Gad, peeyah Gilad mosa dxeral Kenaan ka dheya. Dehuk seediq Israel hiya de, srengo daha dheya ka noda nii. 33Kiya de malu kuxul daha kana ka seediq Israel. Kiya ma tmdahu Utux Baro ka seediq Israel ma, ini osa mccebu baro quri seediq Reuben ma Gad ka dheya da. 34Seediq Reuben ma Gad we, pnungalan daha ngayan ka spuhan nii. Ado gisu pgkela Utux Tmninun we, kiya ka Utux Baro ka spuhan nii.
Currently Selected:
Yehosua 22: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
