Yehosua 21
21
Alang Seediq Lewiy
1Dpusu rudan seediq Lewiy we, meyah msdaling Elajar msapuh, Yehosua laqi Nun ma, dmpdudul pnswayan rudan Israel hiya ka dheya. 2Meniq Siylo dxeral Kenaan hiya rmengo dheya: “Cuuxal, spoda na Moseh rmnengo mbege lualang yami ma nganguc lualang tbugun tnbugan miyan mnesa ka Utux Tmninun.” 3Kiya de muyu so rnengo Utux Tmninun, seediq Israel we biqan daha alang ma dxeral ngnganguc alang peeyah dxeral daha ka seediq Lewiy.
4Blebil qreti ka seediq Qahat. Seediq Lewiy we mangal lqlaqi laqi Aharon msapuh. Peeyah dxeral pnswayan rudan Yehudah, Simeon ma Binyamin pnooda blebil qreti mangal 13 alang. 5Duma lqlaqi laqi Qahat we mangal peeyah pnswayan rudan Eprayim, Dan ma dmeka Menaseh pnooda blebil qreti mangal 10 alang. 6Lqlaqi laqi Gerson we mangal peeyah dxeral pnswayan rudan Yisaskar, Aser, Naptaliy ma dmeka Menaseh gaga meeniq Basan pnooda blebil qreti mangal 13 alang. 7Lqlaqi laqi Merariy we, pnooda pnswayan rudan mnangal peeyah dxeral Reuben, Gad ma Jebulun mnangal 12 alang. 8Seediq Israel we muyu tnugesa Utux Tmninun rnengo Moseh spoda daha blebil qreti mege seediq Lewiy ka lualang ma nganguc lualang.
9Peeyah dxeral pnswayan rudan Yehudah ma Simeon we, wada daha sbege lualang ngayan nii ka dheya. 10Kiya ka wada sbege tnsapah Qahat seediq Lewiy, lqlaqi laqi Aharon. Ado heya ka wada mangal tgplaale ba qreti: 11Qiryat Arba, kiya ka Xebron gaga dgiyaq Yehudah ma, ssiyo lualang wada sbege dheya. Arba we pusu rudan seediq Anaq. 12Kiya de, qnpahan alang nii ma lualang biciq ssiyo na hiya we wada daha sbege Kaleb laqi Yepuneh kiya.
13Xebron, kiya ka alang qdriqan uxe nseung phuqil seediq ma, ssiyo alang we wada sbege lqlaqi laqi Aharon msapuh kiya. Kiya uri we wada daha sbege ka ssiyo alang Libnah, 14Yatir, Estemoa, 15Xolon, Debir, 16Ayin, Yutah ma, ssiyo alang Bet Semes. Kana ba we 9 alang. Ida pneeyah ckceka pnswayan rudan nii kiya. 17Dungal we peeyah dxeral Binyamin we, sbege daha ka ssiyo alang Gibon, Geba, 18Anatot ma, Almon. Kana ba we 4 alang. 19Lqlaqi laqi Aharon we 13 alang ma ssiyo lualang na hiya.
20Tnsapah Qahat dseediq Lewiy we, kiya ka lqlaqi laqi Qahat we, lualang bnlebil daha qreti we pneeyah pnswayan rudan Eprayim kiya. 21Dheya we sbege daha duma lqlaqi laqi Qahat ka alang qdriqan ma ssiyo alang Sekem, kiya ka alang qdriqun dseediq uxe nseung phuqil seediq gaga dgiyaq Eprayim hiya. Dungal we sbege daha ka ssiyo alang Gejer, 22Qibcayim ma, Bet Xoron. Kana ba we 4 alang. 23Dungal we peeyay dxeral pnswayan rudan Dan we, sbege daha ka alang ma ssiyo alang Elteqe ma Gibton, 24Ayalon ma Gat Rimon. Kana ba we 4 alang. 25Dungal we peeyah dxeral dmeka pnswayan rudan Menaseh we sbege daha ka alang ma ssiyo alang Tanak, ma Gat Rimon. Kana ba we 2 alang hiya. 26Duma lqlaqi laqi Qahat we kana ba alang ma ssiyo alang we 10 alang.
27Lqlaqi laqi Gerson pnswayan rudan Lewiy we, mangal dxeral peeyah dmeka pnswayan rudan Menaseh. Kiya ka alang qdriqan seediq uxe nseung phuqil seediq ma ssiyo alang Golan dxeral Basan ma Beesterah ma ssiyo alang. Kana ba we 2 alang. 28Nangal daha pneeyah pnswayan rudan Yisaskar ka alang ma ssiyo alang we Qisyon, Dabrat, 29Yarmut ma, Eyn Gagim. Kana ba we 4 alang. 30Nangal daha pneeyah pnswayan rudan Aser ka alang ma ssiyo alang we Misal, Abdon, 31Xelqat ma, Rexob. Kana ba we 4 alang. 32Nangal daha pneeyah pnswayan rudan Naptaliy ka alang qdriqan seediq uxe nseung phuqil seediq ma ssiyo alang we Qedes gaga Galil, Xamot Dor ma, Qartan. Kana ba we 3 alang. 33Spooda pnswayan rudan ka seediq Gerson we, kana ba we 13 alang ma ssiyo alang hiya.
34Duma na seediq Lewiy we, kiya ka lqlaqi laqi Merariy. Spooda pnswayan rudan nangal daha peeyah pnswayan rudan Jebulun ka alang ma ssiyo alang Yoqneam, Qartah, 35Dimnah ma, Nahalal. Kana ba we 4 alang. 36Nangal daha pneeyah pnswayan rudan Reuben ka alang ma ssiyo alang we Becer, Yahcah, 37Qedemot ma, Meypaat. Kana ba we 4 alang. 38Nangal daha pneeyah pnswayan rudan Gad ka alang qdriqan seediq uxe nseung phuqil seediq ma ssiyo alang we Ramot gaga Gilad ma Maxanayim, 39Xesbon ma, Yajer. Kana ba we 4 alang. 40Duma pnswayan rudan Lewiy we, kiya ka lqlaqi laqi Merariy. Nangal daha alang pnooda blebil qreti we 12 alang.
41Kana ba nangal daha alang pneeyah pusu dnoi seediq Israel ka seediq Lewiy we 48 alang ma ssiyo alang. 42Ssiyo alang nii we niqan ka dxeral, ida so kiya kana ka knkingal alang.
Dmoi Dxeral ka Seediq Israel
43So kiya de, sbege na seediq Israel ka kana dxeral pnsdhegan Utux Tmninun quri pusu rudan daha. Kiya ka mangal dxeral ka dheya ma meeniq dxeral hiya. 44Utux Tmninun we, spuyu na kana pnstangan pusu rdrudan daha sbege na mtbale kana ka nniqan daha. Kana pais daha we, uka ani kingal ka dehuk mheyu berah daha. Utux Tmninun we, sbege na baga daha ka pais daha. 45Utux Tmninun we, kari sntangan pbleyaq bbege na sapah Israel we, uka ani 1 ka ini dai. Ida wada daun kana.
Currently Selected:
Yehosua 21: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
